1 Sɔlə nə ndje yîndə əpʉ kə wo Etianə nə ə̂në azü wô ətshə kɔ.

Kʉ pə tə̂ əlo nə səkɔ, azü vɔ̂tə̂ kə gi əyo tə̂ azü Laglizə ə̂në əndje sə̂ lə gala Jeruzalamə nə kɔ. Azü nə nɔ̂ ə̂në əndje zâ lɔsu əndje kə Jezu kɔ ndjɔ̂ tshelə əndje lə ashɔ aəgɔ Jude, də Samari, kʉtə̂ azü-awla nə kə dâka pə lə gala nə. 2 Alabə̈ azü ə̂në əndje yîndə Ndjapä də lɔsu əndje nɔ̂ kɔ, shî Etianə nə ə kɨ̂ ətshə tə bandanə. 3 Kandää Sɔlə nə sə̂ kə mbrə nɔ̂ ndə kə pa tshə liwu Laglizə nə. Tshə lî aanda ə têgbɔ akoshe də ayashe ə gû də əndje ə wlî əndje gâ lə anda kânga.

4 Azü nə ə̂në əndje ndjɔ̂ tshelə əndje nə kɔ, əndje rô tə̂ aətshe na na ye ə mʉ̂ Ə̂rɔ̂ Əpʉ kə azü tə̂ aətshe səkɔ. 5 Flipə nâ mâ lə ə̈bə̈ gala lə əgɔ Samari ə yîsə̂ əpʉ nə̂ Kristə mâ je kə azü. 6 Ə̂kpû azü nə nɔ̂ drâ ətu əndje ə drâ â djî aəpʉ nə̂ Flipə nə kɔ, əndje djî ətshə ə wû aərə ə̈lü ə̂në tshə mbrə̂ kɔ. 7 Mbrə ə̂në aafrɔ ayirə̂ wûtu lə azü ngbatshe ə tâ râwâ tə âgbɔ̂, tshekotə̂ awurtʉ də alayïgbanu gâmba tə̂ əndje gâ mandânə. 8 Bale, tshelə azü sə̂ də âgbɔ̂ ə̂rû lə gala səkɔ.

9 Ə̈bə̈ koshe, ə̂në əɨrɨ ye kə də̂ Shemɔ kɔ, sə̂ je lə gala nə əlînə. Tshə sə̂ tə əyïkifi â kumu azü əgɔ Samari nə kpê pa əndu əndje mbrə aərə ə̂në tshə mbrə kɔ. Tshə pâ əne sə̂ tə ə̈bə̈ âgbɔ̂ əzü 10 â azü nə nɔ̂, ə vɔ̂tə̂ nə tə̂ əngʉ əzü ʉrrr ndjɔ gâ tə̂ âgbɔ̂ əzü, əndje drâ ətu əndje ə drâ ndə kə pa əndje dji aəpʉ nə̂ ye. Əndje pâ: «Koshe səye sə tə awlra nə̂ Ndjapä ə̂në əndje ê ə pa "âgbɔ̂ awlra" kɔ.»

11 Əndje drâ ətu əndje ə drâ ndə kə pa əndje dji aəpʉ nə̂ ye nə, mbrə ə̂në kerə də̂ kumu əndje ə kpê pâ əndu əndje mbrə aərə kifi nə ə̂në tshə mbrə kɔ. 12 Bale, alɔ ə̂në əndje yîndə Ə̂rɔ̂ Əpʉ, ə̂në Flipə nə mʉ̂, də lɔsu əndje, gâ pâ ngerə nə̂ Ndjapä ndje gâ pâ Jezu Kristə gâ ye kɔ, akoshe də ayashe zâ batamo. 13 Shemɔ nə də ə̂tə̂ ye ndje yîndə əpʉ nə də lɔsu ye, â mandânə ə̂në tshə zâ batamo gâ ye kɔ, tshə dâka pə kʉ gâ ngotə̂ Flipə nə. Tshə wû aərə ə̈lü də aərə kə za awa gâ lə azü ə̂në Flipə nə ə mbrə kɔ â kumu ye kpê pâ əndu ye.

14 Bale, alɔ ə̂në azü-awla nə, ə̂në əndje sə̂ mâ Jeruzalamə kɔ, djî ə pa azü əgɔ Samari yîndə Əpʉ nə̂ Ndjapä də lɔsu əndje gâ ye kɔ, əndje wlâ Piarə gâ ndə Zââ kə əndje. 15 Alɔ ə̂në Piarə nə gâ ndə Zââ nə yî kumu əndje mâ je, əndje yû Ndjapä mbrə azü nə ndə kə pa əndje sɔtə̂ Âgbɔ̂ Yîrə̂. 16 Mbrə ə̂në Âgbɔ̂ Yîrə̂ nə tê tê pa ə jerə gâ pâ ə̈bə̈ əzü bale lə takpa tə̂ əndje ne. Əndje zâ kʉtə̂ batamo də əɨrɨ Âgbɔ̂ Əyïngerə Jezu. 17 Bale, Piarə nə gâ ndə Zââ nə kô kəna əndje gâ pâ azü nə â əndje sɔ̂tə̂ Âgbɔ̂ Yîrə̂ nə.

18 Alɔ ə̂në Shemɔ nə wû ə pa azü nə sɔ̂tə̂ Âgbɔ̂ Yîrə̂ tə̂ äwä ə̂në azü-awla nə kô kəna əndje gâ pâ əndje kɔ, tshə nâ də ngendja kə azü-awla nə ə pâ: 19 «E zä awlra səkɔ kə əmə ndje ndə kə pa əzü ə̂në mə za kəna əmə gâ pâ ye, tshə sɔtə̂ Âgbɔ̂ Yîrə̂ nə.» 20 Bale, Piarə nə pâ kə ətshə ə pa: «Əbə də ngendja nə̂ zə nə nɔ̂ gü gâ ala əwo, mbrə ə̂në, bə wû ənə̂ zə ə pa əzü sɔtə̂ âkrâ nə̂ Ndjapä tə̂ äwä ngendja! 21 Ə̈bə̈ ərə nə̂ zə wala əpʉ nə̂ zə sə sə lə ərə səye bale ne, mbrə ə̂në lɔsu zə sə sə ndji lə ala Ndjapä ne. 22 Tshï äwä angbrɔ əmbrʉ kə ma tə̂ zə tʉ ə yü Âgbɔ̂ Əyïngerə ndə kə pa, äwä nə â sə je, tshə gba tshelə əmbrʉ əpʉ ə̂në ə sə tə̂ lɔsu zə kɔ. 23 Mə wû ə pa bə sə də əgo əmbrʉ aərə tə̂ lɔsu zə wââ â sə tə kanga nyaka.» 24 Shemɔ nə kîrə əpʉ ə pa: «E-e də ə̂tə̂ e, e yü Âgbɔ̂ Əyïngerə nə mbrə əmə, ndə kə pa ə̈bə̈ əmbrʉ ərə ə̂në e pâ ndə nə kɔ, wu wutu bale gâ tə̂ əmə ne.»

25 Mandânə ə̂në Piarə nə gâ ndə Zââ nə yîsə̂ əpʉ aərə ə̂në əndje wû gâ ye kɔ ə yisə̂ əpʉ nə̂ Âgbɔ̂ Əyïngerə gâ ye kɔ, əndje gû mâ Jeruzalamə. Tə̂ äwä nə gu na ye, əndje mʉ̂ Ə̂rɔ̂ Əpʉ lə aaya aəgɔ ə̂në ə ngba ə ngba kɔ lə ashɔ əgɔ Samari.

26 Ə̈bə̈ trawaya nə̂ Əyïlingû pâ kə Flipə ə pa: «Äfɔ ə nä djoko tshepakɔnɔ, tə̂ äwä Jeruzalamə gu na ye gâ Gaza, tə̂ äwä səkɔ ə̂në azü sə sə tə nə ne kɔ.» 27 Bale, tshə âfɔ ə rô. Lə äwä nə, ə̈bə̈ koshe sə̂ je, tshə sə̂ tə əzü əgɔ Etiɔpi, tə mbayïwa, tə âgbɔ̂ əzü kosəra də awobata aərə nɔ̂ nə̂ Kandasə, yashe ngerə əgɔ Etiɔpi nə. Tshə nâ mâ Jeruzalamə ndə kə pa tshə vrɔ Ndjapä. 28 Tshə dô tə̂ ye ə sə̂ kə gu nə ə sə̂ gâ lə kutu ambrata nə̂ ye, ə sə̂ kə dɨ fraka nə̂ awopandəma Ndjapä Ezayi. 29 Bale, Âgbɔ̂ Yîrə̂ pâ kə Flipə ə pa: «Nä ə të kutu ambrata səye.»

30 Flipə nə nâ də ärɔ̈ ə djî əzü əgɔ Etiɔpi nə ə̂në tshə sə̂ kə dɨ fraka nə̂ awopandəma Ndjapä Ezayi nə kɔ. Tshə yû ətshə ə pa: «Bə dji tshelə əpʉ səye ə̂në bə dɨ kɔ a?» 31 Tshə kîrə əpʉ kə Flipə nə ə pa: «Ə̂në əzü kə yisə̂ tshelə âdâ nə kə əmə sə sə je ne kɔ, mə dji tshelə âdâ nə atâ?» Bale, tshə pâ kə Flipə nə ə pa tshə o ə sə gâ tʉ gâ ngotə̂ əne. 32 Ə̂sə̂ əpʉ nə lə Fraka nə̂ Ndjapä nə ə̂në tshə sə̂ kə dɨ nə kɔ ə pâ:

«Əndje nâ də ətshə mata ndalimi

ə̂në əndje sə kə na də ətshə gâ ə̂sə̂ kə wo aagia kɔ,

mata aya ndalimi ə̂në tshə kɨ kɨ ətshi əzü

ə̂në tshə sə kə wa aəsu ye kɔ ne,

tshə â ama ye â ne.

33 Əndje mbrə̂ tə̂ ye tə amba ərə,

əzü kə pa ngbanga ye gûta gû ne.

Əde əte kə pa ndə angwa ye?

Mbrə ə̂në əndje wô ətshə pâ ashɔ gâ ye.»*

34 Bale, mbayïwa nə yû Flipə nə ə pa: «Mə tegbɔ ə̈nü zə, əde də̂ awopandəma Ndjapä nə ə pa əpʉ ye rəkɔ? Tshə pâ əpʉ nə gâ pâ ye də ə̂tə̂ ye wala gâ pâ ə̈bə̈ ata əzü kpî a?»Mbayïwa əgɔ Etiɔpi

35 Bale, Flipə nə zâ əpʉ ə vɔ̂tə̂ kə pa əpʉ gâ pâ ə̂sə̂ əpʉ səkɔ ə̂në ə sə̂ lə Fraka nə̂ Ndjapä nə kɔ, ə mʉ̂ Ə̂rɔ̂ Əpʉ nə̂ Jezu kə ətshə. 36 Ə̂në əndje dâka pə kə na na ye kɔ, əndje yî kumu əndje gâ tə̂ ə̈bə̈ ətshe ə̂në ə̂ngû sə̂ tə̂ nə kɔ. Bale, mbayïwa nə pâ kə ətshə ə pa: «Ə̂ngû kə səye, ərə yekɔ kə gbo tə̂ äwä tə̂ əmə ndə kə pa mə za batamo?» [37 Flipə nə pâ kə ətshə ə pa: «Bə â yində əpʉ nə də lɔsu zə ngâ, äwä kə za batamo sə je.» Mbayïwa nə kîrə əpʉ ə pa: «Mə wusə̂ nə mâ tə̂ lɔsu əmə ə pa Jezu Kristə sə tə Ɨrɨ Ndjapä.»]*

38 Tshə zâ ama ə pa kutu ambrata nə ka. Əndje bishi nɔ̂, Flipə nə gâ ndə mbayïwa nə, jêrə gâ lə ə̂ngû nə â Flipə nə zâ batamo kə ətshə. 39 Alɔ ə̂në əndje wûtu lə ə̂ngû nə gashu gâ ye kɔ, Yîrə̂ Âgbɔ̂ Əyïngerə nə zâ Flipə nə ə rô də ətshə â mbayïwa nə wû ətshə wû kwatə̂ye ne. Bale, tshə zâ äwä ə gû na ye də ə̂rû tə̂ lɔsu ye. 40 Flipə nə ənə̂ ye, sə̂ mâ lə gala Azɔtə. Tshə mʉ̂ Ə̂rɔ̂ Əpʉ kə azü lə agala nɔ̂ ə̂në tshə rô lə nə kɔ ʉrrr ndjɔ, ə yî kumu ye mâ lə gala Sezare.