1 Palɔ lîshi kpə lə ala azü aangbɔ ngbanga nə ə pâ: «Alaye əmə, ə̈bə̈ əpʉ sə sə lə kumu əmə lə kə ma tə̂ əmə lə ala Ndjapä ʉrrr ndjɔ kpəsəye ne.»

2 Bale, âgbɔ̂ awotokrɔ nə, Ananiasə, zâ ama kə azü ə̂në əndje sə̂ trö də Palɔ nə kɔ ə pa əndje da ama ye. 3 Bale, Palɔ nə pâ kə ətshə ə pa: «Əbə, dati anda ə̂në əndje mbrə̂ ə̂mbî əmbru gâ tə̂ nə kɔ, Ndjapä ə da əbə je! Bə sə gâ tʉ ndə kə pa bə wa ngbanga əmə Lïndə̂ âgbɔ̂ əpʉ, bale, bə zâ ama ə pa əndje da əmə, ə sə sə Lïndə̂ âgbɔ̂ əpʉ nə ne.» 4 Azü nə ə̂në əndje sə̂ je kɔ, əndje pâ: «Bə gû âgbɔ̂ awotokrɔ nə̂ Ndjapä!» 5 Bale, Palɔ nə pâ: «Alaye əmə, mə wûsə̂ nə wû ə pa âgbɔ̂ awotokrɔ kə sə̂ ne â gû ətshə kɔ. Mbrə ə̂në, Əpʉ Ndjapä pa: "Pä əmbrʉ əpʉ pä gâ tə̂ âgbɔ̂ əzü əgɔ nə̂ zə ne."»*

6 Palɔ nə wûsə̂ nə ə pa lə anda aangbɔ ngbanga nə, alabə̈ azü nə sə̂ tə Asadusa, â alabə̈ əndje sə̂ tə Afariza; âdârə ə̂në tshə tâ râwâ tə̂ azü aangbɔ ngbanga nə ə pa: «Alaye əmə, əmə, mə sə tə Fariza, əgblə nə̂ Afariza. Mbrə əpʉ kə she akuzu də kə za lɔsu əmə gâ pâ əpʉ səkɔ də̂ əndje nâ də əmə gâ ətshi ngbanga kɔ.» 7 Alɔ ə̂në tshə pâ əpʉ səkɔ, ashera tê lə takpa tə̂ Afariza nə də Asadusa nə â tshelə takpa tə̂ əndje sɔ̂. 8 Mbrə ə̂në Asadusa nə pa ənə̂ əndje ə pa akuzu sə sə kə she nə ne, atrawaya nə̂ Ndjapä sə sə je ne, ayirə̂ sə sə je ne. Bale, Afariza nə pa ənə̂ əndje ə pa aərə səkɔ nɔ̂ sə je. 9 Azü nə tâ râwâ rô pâ nə gâ ye â alabə̈ aawoyisə̂ âgbɔ̂ əpʉ nə̂ Mayïzə, ə̂në əndje sə̂ djoko ndə Afariza nə kɔ, âfɔ ə shêra kprû ə pa: «Ä sɔtə̂ ə̈bə̈ əmbrʉ əpʉ sɔ lə kumu koshe səye ne. Ə̈bə̈ ngandrə wala ə̈bə̈ trawaya nə̂ Ndjapä pâ əpʉ əte kə ətshə a?»

10 Â ə̂në ashera nə nâ gâ lə əgerə nə gâ ye kɔ, komandâ nə̂ atrugu nə mbrə̂ awa ndə kə pa azü nə sɔ tshelə Palɔ nə ngendje ngendje. Bale, tshə zâ ama kə atrugu nə ndə kə pa əndje jerə ə za Palɔ nə ə wutu də ətshə lə takpa tə̂ azü nə ə gu də ətshə mâ lə kɔpiɔ nə̂ atrugu nə.

11 Mandânə, də tsheləbu nə, Âgbɔ̂ Əyïngerə nâ gâ tə̂ Palɔ nə ə pâ kə ətshə ə pa: «Gbɔ̈ ə gbɔ̈! Mata ə̂në bə pâ əpʉ nə̂ əmə kə azü mâ Jeruzalamə kɔ, bə sə ndje kə pa əpʉ nə̂ əmə kə azü əgɔ Rɔmə.»

12 Alɔ ə̂në ətshe nə krâ gâ ye kɔ, alabə̈ Ajuwufu djî tə̂ əndje lə angbanə ə drâ ama əndje ə pa alane ə zɨ rəgo zɨ ne ə ndju ə̂ngû ndju ne ʉrrr ə wo Palɔ gâ ye kane. 13 Azü nə ə̂në əndje djî tə̂ əndje nə ndə kə pa əndje ma əmbrʉ ərə gâ tə̂ Palɔ nə kɔ, əndje rô zazü bishi gâ ye. 14 Əndje nâ ə tê aâgbɔ̂ azü nə̂ aawotokrɔ gâ ndə aâgbɔ̂ azü ə pâ kə əndje ə pa: «Ä drâ ama ä ə pâ rəgo bale sə sə kə goro ama ä ne ʉrrr ä wo Palɔ gâ ye kane. 15 Rəkɔ, ə̂në a lə ye, e djï tə e də azü aangbɔ ngbanga ə wlä ətshe kə komandâ nə̂ atrugu nə ndə kə pa tshə na də Palɔ nə gâ ətshi e. E mbrə̈ a pa də e yində kə tegbɔ kumu e gâ pâ əpʉ nə̂ ye nə də äwänə gâ ye kane, bale, ä-ä, ä sə kə sə trö ndə kə pa ä wo ətshə angbʉlînə ndə kə pa tshə wutu mâtəye.»

16 Bale, əgblə koshe nə̂ kobɔ Palɔ nə djî ndə əpʉ ə̂kû sə̂ ə̂në əndje lê kɔ ə nâ mâ lə kɔpiɔ nə̂ atrugu nə je ə lî ndə kə pa ndə nə kə Palɔ nə. 17 Palɔ nə ê ə̈bə̈ âgbɔ̂ əzü nə̂ atrugu nə bale ə pâ kə ətshə ə pa: «Nä də mɔdɔ səye kə komandâ nə̂ atrugu nə, mbrə ə̂në tshə sə də ə̈bə̈ əpʉ ndə kə pa kə ətshə.»

18 Âgbɔ̂ əzü nə̂ atrugu nə zâ mɔdɔ səkɔ ə nâ də ətshə kə komandâ nə̂ atrugu nə ə pâ: «Əyïkânga Palɔ ê əmə ə pâ mə na də mɔdɔ səye kə əbə, tshə sə də ə̈bə̈ əpʉ ndə kə pa kə əbə.» 19 Komandâ nə̂ atrugu nə têgbɔ kəna mɔdɔ səkɔ ə gî tə̂ ye də ətshə teashe ə yû ətshə ə pâ: «Əpʉ yekɔ də̂ bə yində kə pa nə kə əmə?» 20 Tshə kîrə əpʉ ə pa: «Ajuwufu djî tə̂ əndje ndə kə pa əndje yu əbə, bə na də Palɔ əmbʉ gâ ətshi aangbɔ ngbanga, a pa də alayïngbanga nə yində kə wusə̂ əpʉ də äwänə gâ pâ əpʉ nə̂ ye nə. 21 Bale, djï djï əpʉ nə̂ əndje nə ne. Mbrə ə̂në alabə̈ əndje ə̂në əndje rô zazü bishi gâ ye kɔ, əndje lê ə̂kû tə̂ ye, ə drâ ama əndje ə pa alane ə zɨ rəgo zɨ, ə ndju ə̂ngû ndju ne ʉrrr ə wo ətshə gâ ye kane. Ə̂në a lə ye, əndje gâmba tə̂ əndje gâ ye ə ka kʉtə̂ əpʉ ama zə.» 22 Komandâ nə̂ atrugu nə pâ kə mɔdɔ nə ə pa tshə do tə̂ ye ə gu na ye ə zâ ama kə ətshə ə pa, tshə pa pa ndə əpʉ sə̂ ə̂në tshə pâ kə əne kɔ kə ə̈bə̈ əzü bale ne.

23 Bale, mandânə, komandâ nə̂ atrugu nə ê alabə̈ aâgbɔ̂ azü nə̂ atrugu nə bishi ə pâ kə əndje ə pa: «E gämba atrugu ngbangbo bishi (200), də aawokpe də ambrata zazü vəta də morofo gâ ndə aawotɔ aə̈dü ngbangbo bishi (200) ndə kə pa əndje afɔ də tsheləbu səye ə na ndjɔ mâ Sezare. 24 E gämba ndje alabə̈ ambrata nə ndə kə pa e na də Palɔ də ə̂rɔ̂ akwa ye kə Felikəsə, komandâ əgɔ nə.» 25 Mandânə, komandâ nə̂ atrugu nə tâ ngrowô ə pâ gâ lə nə ə pa:

26 «Əmə, Klɔdə Liziasə, mə tâ fraka səye kə əbə, âgbɔ̂ əzü, Felikəsə. Wanda, komandâ əgɔ!

27 Ajuwufu zâ koshe səye ə yîndə kə wo ətshə. Alɔ ə̂në mə djî ə pa tshə sə̂ tə əzü əgɔ Rɔmə, mə kô atrugu ə nâ â zâ ətshə lə kəna əndje. 28 Mə yîndə kə wusə̂ âdâ əpʉ ə̂në əndje lêa ətshə tə̂ nə kɔ, mə nâ də ətshə gâ ətshi aangbɔ ngbanga nə̂ əndje. 29 Mə wû ə pa əpʉ nə ə̂në əndje lêa ətshə tə̂ nə kɔ ə sə̂ gâ pâ âgbɔ̂ əpʉ nə̂ əndje. Bale, ə̈bə̈ əpʉ lə kumu ye ə̂në ə lï də kuzu wala də kânga kɔ sə̂ sə̂ je ne. 30 Mandânə, mə djî ə pa Ajuwufu nə gâmba tə̂ əndje ndə kə pa əndje mbrə əmbrʉ ərə tə̂ ye, mə wlâ ətshə katshä kə əbə ə pa kə aawolea ətshə nə ə pa əndje na də əpʉ nə gâ ətshi zə.»

31 Atrugu nə mbrə̂ ərə nə Lïndə̂ ama ə̂në əndje zâ kə əndje kɔ, əndje zâ Palɔ nə ə nâ də ətshə də tsheləbu ʉrrr ndjɔ mâ Atipatrisə. 32 Tshekra, əndje dô tə̂ əndje ə gû gâ lə kɔpiɔ nə̂ atrugu nə ə kâtə̂ aawokpe də ambrata nə â əndje rô də ətshə. 33 Alɔ ə̂në əndje yî kumu əndje mâ Sezare je, aawokpe də ambrata nə zâ fraka nə kə komandâ nə ə mâ Palɔ nə kə ətshə. 34 Komandâ nə dɨ̂ fraka nə ə yû Palɔ nə ə pa tshə sə tə əzü tshekotâ. Ə̂në tshə djî ə pa Palɔ nə sə tə əzü tshe Silisi kɔ, 35 tshə pâ kə ətshə ə pa: «Mə dji əpʉ nə̂ zə je alɔ ə̂në aawolea əbə ndje â yi kumu əndje.» Bale, tshə zâ ama ndə kə pa əndje bata ətshə gâ lə anda ngerə nə̂ Erɔdə.