1 Ndə ə̈bə̈ alɔ, Piarə gâ ndə Zââ sə̂ kə na mâ lə Anda Ndjapä ndə kə yu Ndjapä də lɔkədɨ. 2 Kandää, ə̈bə̈ koshe ə̂në ə̈nü ye ndɨ̂ pə lə əyï nə kɔ sə̂ je. Əndje sə̂ kə za ətshə na nə alɔnɔ̂ gâ lə manda Anda Ndjapä nə ə̂në əndje ê ə pa «Kəfʉ Manda» kɔ, ndə kə pa tshə e tshe ndə aərə lə kəna azü ə̂në əndje li gâ lə Anda Ndjapä nə kɔ. 3 Tshə wû Piarə nə gâ ndə Zââ nə ə̂në əndje sə̂ kə na ndə kə li Anda Ndjapä nə kɔ ə yû tshuku ngendja kə əndje. 4 Piarə nə gâ ndə Zââ nə shêkɔ ətshə ʉrrr ə pâ kə ətshə ə pa: «Lïshi ə wü ä!» 5 Koshe nə shêkɔ əndje tirrr ə pâ ənə̂ ye ə pa əne sɔtə̂ ə̈bə̈ ərə lə kəna əndje je. 6 Bale, Piarə nə pâ kə ətshə ə pa: «Mə sə sə də ngendja wala lɔrə bale ne; bale, ərə ə̂në mə sə də nə, mə sə kə za kə əbə: də əɨrɨ Jezu Kristə nə̂ Nazaratə, äfɔ ə nä ana!»

7 Mandânə, tshə têgbɔ ətshə tə̂ kəna ye ndə ndəkɔ ə gbə̂tɔ ətshə gâ lafɔ. Kʉ pə kôto, aə̈nü ye də akəshe ə̈nü ye gbɔ̂gbɔ tə̂ əndje. 8 Tshə rɨ̂ ə kâ gâ lafɔ ə vɔ̂tə̂ kə na ana. Əndje də aəndje lî gâ lə Anda Ndjapä nə, tshə sə̂ kə na ana ə sə̂ kə rɨ gâ lafɔ ə sə̂ kə tɔlɔ Ndjapä. 9 Ə̂kpû azü nə nɔ̂ wû ətshə də ana nə də kə tɔlɔ Ndjapä nə. 10 Ə̂në əndje yêrɔ ətshə kpro tə koshe ə̂në tshə sə̂ gâ lə manda Anda Ndjapä, Kəfʉ Manda, ndə kə e tshe ndə aərə kɔ, awa mbrə̂ əndje â kumu əndje kpê pâ aəndu əndje mbrə ərə ə̂në ə wûtu gâ tə̂ ye nə kɔ.

11 Ə̂në koshe nə gî tə̂ ye gî tə̂ Piarə də Zââ nə ne kɔ, kumu azü nə nɔ̂ kpê pâ əndu əndje â əndje kpê na nə gâ tə̂ əndje tə̂ tshekudu anda ə̂në əndje ê ə pa «Tshekudu anda nə̂ Salomɔ» kɔ. 12 Alɔ ə̂në Piarə nə wû ərə səkɔ, tshə pâ əpʉ kə ə̂kpû azü nə ə pa: «Azü əgɔ Isərayalə, mbrə yea də̂ kumu e kpê pâ əndu e mbrə ərə səye kɔ? Mbrə yea də̂ e shekɔ ä, a pa də, tə̂ äwä awlra nə̂ ä wala tə̂ äwä kə za tə̂ ä kə Ndjapä, də̂ koshe səye nâ ana kɔ? 13 Ndjapä nə̂ Abraamo, Ndjapä nə̂ Izakə, Ndjapä nə̂ Jakɔbə, Ndjapä nə̂ alätä əzə̂ yîsə̂ ə̂yî Əyïkosəra nə̂ ye Jezu gashu, Jezu nə ə̂në, e-e, e kâ ətshə kə azü ə wə̂ra tə̂ e tə̂ ye lə ala Pilatə ə̂në ətshə, tshə yî ənə̂ ye ndə nə ndə kə pa tshə katə̂ ye kɔ. 14 E wə̂ra tə̂ e tə̂ ətshə ə̂në tshə sə kpî ə sə tə ə̂rɔ̂ əzü kɔ. Bale, e yû Pilatə ə pa tshə wora də̂ awowo azü kə e. 15 Rə də̂ e wô əyïngerə kə za sorô kə azü kɔ. Bale, Ndjapä shê ətshə lə takpa tə̂ akuzu gâ ye, ä wû ətshə də ala ä. 16 Tə̂ äwä kə za lɔsu ä gâ pâ əɨrɨ Jezu də̂ koshe səye ə̂në e wu ətshə kɔ ə yerɔ ətshə kpro kɔ â tshə kâ gâ lafɔ kɔ. Kə za lɔsu kə Jezu kə zâ äwä kə ətshə ndə kə pa rəka nə̂ ye nglɔ gbrä mata ə̂në, e-e nɔ̂, e wu kɔ.

17 «Bale, alaye əmə, kpəsəye mə wusə̂ nə kpro ə pa ərə ə̂në e-e də əgbro azü nə̂ e mbrə̂ tə̂ Jezu kɔ, e wûsə̂ nə wû ne. 18 Bale, Ndjapä mbrə̂ ndəma əpʉ ərə ə̂në tshə mʉ̂ əpʉ nə angbʉlînə, leme-e kerə, lə ama aawopandəma Ndjapä nɔ̂ kɔ. Tshə pâ əpʉ ə pa Kristə sə kə wu əyo. 19 Rəkɔ, e tshï äwä angbrɔ kə mbrə tə̂ e tʉ ə dö tə̂ e gu nə gâ tə̂ Ndjapä ka tshə gba tshelə anyaka nə̂ e. 20 Bale, Əyïlingû sə kə za ə̈bə̈ alɔ kə e ndə kə pa e wu tə̂ e, tshə sə kə wla Jezu Kristə, ə̂në tshə kê ətshə angbʉlînə kerə mbrə e gâ ye kɔ. 21 Kpəsəye, Jezu lï ndə kə daka pə mâ lafɔ ʉrrr ndjɔ gâ tə̂ alɔ ə̂në aərə nɔ̂ sə kə gamba tə̂ əndje gâ mandânə də äwänə, mata ə̂në Ndjapä pâ ndə nə, leme-e, lə ama aawopandəma ye ə̂në əndje lə kpî kɔ. 22 Mayïzə pâ əpʉ ə pa: "Əyïlingû tə Ndjapä nə̂ e sə kə e ə̈bə̈ awopandəma Ndjapä gashu kə e mata əmə lə takpa tə̂ alaye e. E djï əpʉ aərə nɔ̂ ə̂në tshə sə kə pa ndə nə kə e kɔ. 23 Bale, əzü ə̂në tshə sə sə kə dji əpʉ nə̂ awopandəma Ndjapä səkɔ ne, əndje sə kə gi ətshə ngrʉ̂ gashe lə ə̂grû tə̂ azü nə̂ Ndjapä ə wo ətshə."* 24 Aawopandəma Ndjapä nɔ̂ ə̂në əndje pâ əpʉ kɔ, ə vɔ̂tə̂ nə mâ tə̂ Samuwalə də əndje ə̂në əndje nâ mandâ ye kɔ, əndje mʉ̂ əpʉ gâ pâ aəlo səke. 25 Əpʉ ə̂në Ndjapä pâ lə ama aawopandəma Ndjapä kɔ sə mbrə e. E sə lə mbʉkʉ ə̂në Ndjapä mbrə̂ də alätä e kɔ alɔ ə̂në tshə pâ kə Abraamo ə pa: "Mə sə kə to ngwarə gâ pâ azü tshelə abəngʉ nə̂ azü nɔ̂ pâ ashɔ tə̂ äwä angwa zə."* 26 Mbrə e əlînə də̂ Ndjapä ê əyïkosəra nə̂ ye gashu â wlâ ətshə ndə kə to ngwarə gâ pâ e, tə̂ äwä kə gi əzü bale bale gashe tə̂ äwä əmbrʉ aərə nə̂ ye.»