1 Azü-awla nə də alaye ə̂në əndje sə̂ lə əgɔ Jude nə kɔ djî ə pa azü ə̂në əndje sə sə tə Ajuwufu ne kɔ yî ndje ndə Əpʉ nə̂ Ndjapä. 2 Alɔ ə̂në Piarə nə gû mâ Jeruzalamə kɔ, azü nə̂ Jezu nə ə̂në əndje sə̂ tə Ajuwufu nə kɔ pâ tə̂ ye 3 ə pa: «Bə nâ gâ lə anda nə̂ azü ə̂në əndje wâ gandja wâ ne kɔ ə zɨ̂ rəgo də aəndje!»

4 Bale, Piarə nə vɔ̂tə̂ kə pa ndəma aərə nɔ̂ ə̂në ə mbrə̂ kɔ bale bale kə əndje. Tshə pâ kə əndje ə pa:

5 «Mə sə̂ mâ lə gala Jope â alɔ ə̂në mə sə̂ kə yu Ndjapä kɔ, mə wû ə̈bə̈ ərə. Mə wû ə̈bə̈ ərə ə ko ə̈bə̈ əgerə kumu ləba ə̂në əndje dû ama nə vəna gâ tə̂ aərə, ə tô mâ lafɔ ə sə̂ kə jerə nə ʉrrr â jêrə ndjɔ gâ tə̂ əmə. 6 Mə shêkɔ tshelə nə ʉrrr â wû aagia ə̂në əndje na ana də aə̈nü əndje vəna kɔ də aagia güsü də aagia ə̂në əndje orɔ də tshela ə̈vü əndje kɔ gâ ndə ayanu. 7 Bale, mə djî ndje ə̈bə̈ tshema ə̂në ə pâ kə əmə ə pa: "Piarə, äfɔ ə wö aagia nə ə zɨ̈ əndje!" 8 Bale, mə pâ: "Bale ne, Âgbɔ̂ Əyïngerə! Mbrə ə̂në alɔ bale, ə̈bə̈ əmbrʉ ərə wala ə̈bə̈ rəgo ə̂në əndje shêra azü tə̂ nə kɔ, lî ama əmə lî bale ne." 9 Bale, tə̂ bishi nə, mâ lafɔ-e, tshema nə pâ kwatə̂ye ə pa: "Ərə ə̂në Ndjapä pâ ə sə̂ mvo gâ ye kɔ, wü wü tə əmbrʉ ərə ne!" 10 Ərə səkɔ mbrə̂ rə ʉrrr äwä vəta, â mandânə, əndje kô ərə nə nɔ̂ o na ye gâ lafɔ. 11 Bale, trale mandânə, akoshe vəta ə̂në əndje wlâ əndje mâ Sezare kə əmə kɔ, yî kumu əndje mâ lə anda ə̂në ä sə̂ lə nə kɔ. 12 Âgbɔ̂ Yîrə̂ pâ kə əmə ə pa ä də aəndje gu na ye, mə li tshelə əmə li bale ne. Alaye mindû amanə bale ə̂në əndje lə ye, gî əmə na na ye mâ Sezare je, ä lî gâ lə anda nə̂ Kɔrənayə. 13 Kɔrənayə nə pâ ndəma äwä ə̂në tshə wû trawaya nə̂ Ndjapä ə̂në tshə nâ ə kâ mâ lə anda nə̂ ye kɔ kə ä, ə̂në tshə pâ kə ətshə ə pa: "Wlä ətshe mâ Jope ndə Shemɔ ə̂në əndje ê ətshə ə pa Piarə kɔ. 14 Tshə pa ndə əpʉ ə̂në tə̂ äwä nə, bə sə kə she lə kuzu, əbə gâ ndə azü tshelə anda nə̂ zə, tə̂ nə kɔ kə əbə je." 15 Alɔ ə̂në mə vɔ̂tə̂ kə pa əpʉ kə azü nə, Âgbɔ̂ Yîrə̂ jêrə gâ pâ əndje, mata ə̂në tshə jêrə ndje gâ pâ əzə̂ pə tə̂ ama nə kɔ. 16 Bale, ə̂sə̂ əpʉ ə̂në Âgbɔ̂ Əyïngerə pâ kɔ tê gâ lə əmə, ə̂në ə pâ: "Zââ zâ batamo ə̂ngû kə azü, bale, e-e, e sə kə za də̂ batamo Âgbɔ̂ Yîrə̂." 17 Rəkɔ, Ndjapä â krâ tə̂ əndje mata ə̂në tshə krâ tə̂ əzə̂ kɔ, əzə̂ ə̂në a zâ lɔsu əzə̂ kə Âgbɔ̂ Əyïngerə Jezu Kristə kɔ, əmə, mə sə tə əde ndə kə pa mə kânga äwä tə̂ Ndjapä a?» 18 Mandânə ə̂në əndje djî əpʉ səkɔ, lɔsu əndje zɨ̂tɨ â əndje mbê Ndjapä ə pa: «Ndjapä zâ ndje äwä rə kə azü ə̂në əndje sə sə tə Ajuwufu ne kɔ ndə kə pa əndje tshi äwä angbrɔ kə mbrə tə̂ əndje tʉ kanika ə sɔtə̂ sorô.»

19 Mandâ kuzu Etianə, azü vɔ̂tə̂ kə gi əyo tə̂ azü nə̂ Jezu â əndje ndjɔ̂ tshelə əndje â rô tə̂ aətshe na na ye. Əndje nâ ʉrrr ndjɔ mâ lə əgɔ Fenesi də aəgɔ Shiprə gâ ndə Atiɔshə, bale, əndje yîsə̂ Əpʉ nə̂ Ndjapä nə kʉ kə Ajuwufu. 20 Bale, lə takpa tə̂ əndje nə, alabə̈ azü nə tə azü əgɔ Shiprə də azü əgɔ Siranə nâ mâ Atiɔshə nə ə pâ əpʉ ndje kə azü ə̂në əndje sə̂ sə̂ tə Ajuwufu ne kɔ, ə mʉ̂ Ə̂rɔ̂ Əpʉ nə̂ Âgbɔ̂ Əyïngerə Jezu kə əndje. 21 Kəna Âgbɔ̂ Əyïngerə sə̂ gâ pâ əndje âdârə ə̂në ə̂kpû azü zâ lɔsu əndje kə Âgbɔ̂ Əyïngerə â dô tə̂ əndje gu nə gâ ndə ye kɔ kə sə̂.

22 Azü Laglizə gala Jeruzalamə djî ndə əpʉ səkɔ â wlâ Barənabasə ndjɔ mâ Atiɔshə nə je. 23 Alɔ ə̂në tshə yî kumu ye mâ je ə wû äwä ə̂në Ndjapä mbrə̂ ə̂rɔ̂tə̂ ye kə azü nə kɔ, tshelə ye mɔ̂ tə̂ nə â tshə mʉ̂ əpʉ kə əndje ndə kə gbɔgbɔ lɔsu əndje ə pâ əndje nɔ̂, əndje tɔ popo Âgbɔ̂ Əyïngerə də lɔsu əndje bale. 24 Barənabasə nə sə tə ə̂rɔ̂ əzü, Âgbɔ̂ Yîrə̂ sû ətshə â tshə sə̂ tə əyï âgbɔ̂ lɔsu. Rəkɔ, ə̈bə̈ əgerə ə̂kpû azü dô tə̂ əndje tə azü nə̂ Âgbɔ̂ Əyïngerə.

25 Mandânə, Barənabasə nə nâ mâ Tarsə ndə kə pa tshə pra Sɔlə mâ je. 26 Alɔ ə̂në tshə sɔ̂tə̂ ye mâ je gâ ye kɔ, tshə gû də ətshə mâ Atiɔshə nə je. Lə ə̂ngû bale nɔ̂, əndje bishi nɔ̂ mbrə̂ kosəra lə takpa tə̂ azü Laglizə nə kôto ə yîsə̂ əpʉ kə ə̂kpû azü nə. Mâ Atiɔshə nə je də̂, tə̂ angbʉlînə, əndje ê atrawaya tə azü nə̂ Kristə kɔ.

27 Tə̂ alɔ nə səkɔ, alabə̈ aawopandəma Ndjapä âfɔ mâ Jeruzalamə ə nâ mâ Atiɔshə nə je. 28 Ə̈bə̈ ngâ əndje bale, ə̂në əɨrɨ ye kə də̂ Agabusə kɔ, âfɔ ə pâ əpʉ tə̂ äwä Âgbɔ̂ Yîrə̂ ə pa ə̈bə̈ əgerə əgo sə kə te gâ pâ ashɔ nɔ̂. Əgo səkɔ tê ngâ tə̂ alɔ ə̂në Klɔdə sə̂ tə əyïngerə əgɔ Rɔmə kɔ. 29 Bale, atrawaya nə zâ ama ndə kə pa əzü bale bale ko aərə ə̂në ə lï də aərə ə̂në tshə sə də nə kɔ ə wla kə alaye ə̂në əndje sə lə ashɔ əgɔ Jude kɔ. 30 Ərə ə̂në əndje mbrə̂ kɔ kə sə̂, əndje kô aərə səkɔ ə wlâ lə kəna Barənabasə nə gâ ndə Sɔlə kə aâgbɔ̂ azü Laglizə lə əgɔ Jude nə.