1 Palɔ gâ ndə Silasə rô djoko Afipɔlisə də Apɔlini ə yî kumu əndje mâ Tesalɔnikə ə̂në Ajuwufu sə̂ də anda aangbɔ nə̂ əndje lə nə kɔ. 2 Palɔ nə lî gâ lə anda aangbɔ nə, mata ə̂në tshə mbrə tə mandʉnə kɔ. Tə̂ aəlo saaba vəta pə mandânə pə mandânə, əndje də azü nə pâ əpʉ gâ pâ Fraka nə̂ Ndjapä; 3 tshə yîsə̂ əpʉ nə ə yîsə̂ tshelə âdâ nə kə əndje ə pa Kristə lï ndə kə pa tshə wu əyo, ə she lə takpa tə̂ akuzu. Tshə pâ kə əndje ə pa: «Jezu nə ə̂në mə mʉ əpʉ nə̂ ye kə e kɔ, ətshə kə sə tə Kristə nə.»

4 Əpʉ nə zâ lɔsu alabə̈ azü nə lə takpa tə̂ əndje â əndje tê gâ ndə Palɔ nə də Silasə nə. Ə̂kpû Agrakə ə̂në əndje vrɔ Ndjapä kɔ, gâ ndə alabə̈ əgbro ayashe ə̂në əndje ngba ə ngba kɔ mbrə̂ kʉ rə. 5 Bale, Ajuwufu nə mbrə̂ manda gâ tə̂ Palɔ nə də Silasə nə. Əndje kô alabə̈ azü lə äwä ə̂në əndje tɔ̂ tɔ̂ gâ tə̂ ərə ne kɔ ə kpû azü gâ tə̂ nə ə frɔ̂ əndje â əndje âfɔ də əpʉ lə gala nə. Əndje nâ mâ lə anda nə̂ Jasɔ ə prâ Palɔ nə gâ ndə Silasə nə ndə kə pa əndje gu də əndje gâ ətshi azü əgɔ nə. 6 Bale, əndje sɔ̂tə̂ əndje sɔ̂ ne. Rəkɔ, əndje zâ Jasɔ nə gâ ndə alabə̈ alaye ə gbə̂tɔ əndje gu nə gâ ətshi alayïngbanga ə tâ râwâ ə pa: «Azü səye ə̂në əndje nâ də əmbrʉ əpʉ gâ lə aəgɔ pâ ashɔ nɔ̂ kɔ, əndje nâ ndje kotə̂ye 7 â Jasɔ kô əndje mâ ndə ye tə ye! Əndje nɔ̂, əndje sə kə mbrə aərə ə̂në ə lï lï də âgbɔ̂ aəpʉ nə̂ Sezarə ne kɔ, əndje pa ə̈bə̈ ata əyïngerə sə je, əɨrɨ ye kə də̂ Jezu.»

8 Əpʉ səkɔ zâ awa gâ lə ə̂kpû azü nə gâ ndə alayïngbanga nə. 9 Bale, Jasɔ nə gâ ndə ə̂dû azü nə kô ngendja ə̂në alayïngbanga nə dɨ̂ kə əndje gâ ye kɔ kane â əndje kâtə̂ əndje.

10 Kʉ də tsheləbu nə alaye zâ Palɔ nə gâ ndə Silasə nə gâ lə äwä â əndje rô ə gû mâ Bere. Alɔ ə̂në əndje yî kumu əndje mâ je gâ ye kɔ, əndje lî gâ lə anda aangbɔ nə̂ Ajuwufu. 11 Lɔsu Ajuwufu nə mâ je sə̂ tə ə̂rɔ̂nə ə rô lɔsu əndje nə̂ əgɔ Tesalɔnikə nə. Əndje yîndə Əpʉ Ndjapä nə də əgo nə tə̂ lɔsu əndje. Alɔnɔ̂, əndje sə̂ kə pra tshelə Fraka nə̂ Ndjapä ndə kə pa əndje wu, wala əpʉ nə ə̂në Palɔ nə ə pa kə əndje kɔ, ə sə də äwänə a? 12 Ə̂kpû azü lə takpa tə̂ əndje zâ lɔsu əndje kə Jezu. Lə takpa tə̂ Agrakə, alabə̈ ayashe ə̂në əndje lʉ ə lʉ kɔ gâ ndə akoshe ə̂në əndje ngbâ tə bandanə kɔ zâ ndje lɔsu əndje kə Jezu. 13 Bale, alɔ ə̂në Ajuwufu əgɔ Tesalɔnikə nə djî ə pa Palɔ nə sə̂ kə yisə̂ Əpʉ Ndjapä ndje mâ Bere kɔ, əndje nâ ə frɔ̂ ə̂kpû azü nə ə mbrə̂ əndje gâ lafɔ də əpʉ. 14 Bale, alaye zâ Palɔ nə ngbiɔ gâ lə äwä djoko tə̂ ə̂ngû əngbrʉ. Bale, Silasə nə gâ ndə Timɔte dâka pə ənə̂ əndje mâ Bere je. 15 Azü nə ə̂në əndje gî Palɔ nə gâ lə äwä kɔ, əndje nâ də ətshə ʉrrr ndjɔ mâ Atanə. Mandânə, ə̂në əndje sə̂ kə gu na ye kɔ, Palɔ nə zâ ama kə əndje ə pa əndje gu ə pa ndə nə kə Silasə gâ ndə Timɔte nə, əndje jo əne katshä.

16 Alɔ ə̂në Palɔ nə sə̂ kə ka mbrə Silasə nə də Timɔte nə mâ Atanə nə je kɔ, tshelə ye kô ətshə tə bandanə ə̂në tshə wû ə pa azü vrɔ aamba aərə tə andjapä tə bandanə lə gala nə kɔ. 17 Rəkɔ, əndje də Ajuwufu gâ ndə aata azü ə̂në əndje vrɔ Ndjapä kɔ pâ əpʉ lə anda aangbɔ. Bale, alɔnɔ̂, tshə pa əpʉ ndje də azü ə̂në tshə te əndje mâ ə̂sə̂ aangbɔ nə kɔ. 18 Alabə̈ aawoyisə̂ ərə, ə̂në əndje ê əndje ə pa aepikuria gâ ndə astoyisia* kɔ, vɔ̂tə̂ kə pa əpʉ də ətshə. Alabə̈ əndje pâ: «Əyïəpʉ səye yində kə pa atâ?» Alabə̈ aata əndje pâ: «Tshə sə a pa də awoyisə̂ əpʉ nə̂ andjapä nə̂ atshângâ.» Əndje pâ rə mbrə ə̂në Palɔ nə mʉ̂ Ə̂rɔ̂ Əpʉ gâ pâ Jezu də əpʉ kə she akuzu.

19 Bale, əndje zâ ətshə ə nâ də ətshə gâ ətshi aangbɔ gala nə ə̂në əndje ê ə pa Areyɔpajə kɔ ə pâ: «Ä lï ndə kə pa ä wusə̂ ərə gâ pâ tafa kə yisə̂ ərə ə̂në bə yisə̂ nə kɔ a? 20 Mbrə ə̂në bə sə kə pa kʉtə̂ tafa aəpʉ gâ lə ətu ä. Rəkɔ, ä yində kə pa ä wusə̂ tshelə âdâ nə.» 21 Kandää, azü gala Atanə nə nɔ̂ də atshângâ ə̂në əndje nâ gâ lə takpa tə̂ əndje kɔ, kosəra nə̂ əndje kə də̂ kə pa kʉtə̂ atafa aəpʉ wala kə dji atafa aəpʉ.

22 Bale, Palɔ nə kâ gâ lafɔ lə ə̂grû tə̂ aangbɔ Areyɔpajə nə ə pâ: «Azü gala Atanə, mə wû ə pa, e sə tə azü ə̂në e yində əpʉ andjapä ə rô pâ nə lə aərə nɔ̂. 23 Mbrə ə̂në, alɔ ə̂në mə sə̂ kə ro lə gala nə̂ e kɔ, mə wû andjapä ə̂në e gâmba əndje ə vrɔ əndje kɔ. Mə wû ndje ə̈bə̈ gblaka ə̂në əndje tâ fraka gâ tə̂ nə ə pa: "Kə ndjapä ə̂në a wusə̂ ye wu ne kɔ!" Ərə ə̂në e sə kə vrɔ ə wusə̂ nə wu ne kɔ, də̂ mə nâ ndə kə pa mə yisə̂ əpʉ nə kə e kɔ. 24 Ndjapä ə̂në tshə mbrə̂ tshepashɔ də aərə tshepashɔ nɔ̂ kɔ, ətshə ə̂në tshə sə tə Âgbɔ̂ Əyïngerə tshelafɔ də ashɔ kɔ, tshə lo lo gâ lə aanda ə̂në kəna azü kə mbrə̂ kɔ ne. 25 Tshə ka ka mbrə azü ndə kə pa əndje kanika əndje mbrə ərə kə ətshə bale ne, mbrə ə̂në ətshə kə ko sorô də əwu gâ ndə aərə kə azü nɔ̂ kɔ. 26 Tshə mbrə̂ â amarä nɔ̂ wûtu lə əzü bale â tshə kô əndje gâ pâ ashɔ nɔ̂ kɔ. Tshə gâmba mbrə əndje, tshekɨ aərə də ama ashɔ aəgɔ ə̂në əndje ma əgɔ tə̂ nə kɔ gâ ye. 27 Tshə mbrə̂ ərə səkɔ ndə kə pa azü nə pra äwä ye ə sə kə tra ətshe na na ye kanika, äwä nə â sə je, əndje sɔtə̂ ye. Kandää, tshə sə sə ngrʉ̂ tə̂ əzü bale bale lə takpa tə̂ əzə̂ ne, 28 mbrə ə̂në, "tə̂ äwä ye də̂ a sə də sorô, â sə kə mbrə tə̂ əzə̂ â sə tə azü kɔ." Əpʉ ə̂në alabə̈ aawota fraka nə̂ e tâ ndje kɔ kə sə̂ ə pa: "A sə ndje tə angwa ye."

29 «Bale, rəkɔ ə̂në a sə tə angwa Ndjapä kɔ, əzə̂ lï lï ndə kə pa a wu ə pa Ndjapä sə mata lɔrə wala ngbengewle ngendja wala əkpʉ ə̂në azü ə gʉ də aə̈dë tə̂ äwä kə wusə̂ ərə nə̂ əndje də kə tegbɔ kumu əndje kɔ ne. 30 Bale, Ndjapä wâ wâ gâ pâ alɔ ə̂në azü wûsə̂ ərə wû tə̂ nə ne kɔ ne â kpəsəye, tshə mʉ əpʉ kə azü nɔ̂, tə̂ aətshe nɔ̂ ndə kə pa əndje tshi äwä angbrɔ kə mbrə tə̂ əndje tʉ. 31 Mbrə ə̂në tshə dɨ̂ ə̈bə̈ əlo gâ ye ə̂në tshə wa ngbanga gâ pâ azü nɔ̂ tə̂ nə kɔ je tə̂ äwä djatra kə wa ngbanga. Tshə kê ə̈bə̈ əzü gâ ye mbrə kə wa ngbanga nə. Tshə yîsə̂ nə gashu ngâ lə ala azü nɔ̂, alɔ ə̂në tshə shê ətshə lə takpa tə akuzu kɔ gâ ye.»

32 Alɔ ə̂në azü nə djî əpʉ gâ pâ əpʉ kə she akuzu kɔ, alabə̈ əndje mɔ̂ Palɔ nə də amɔ, alabə̈ aata əndje pâ: «Ndə ə̈bə̈ alɔ, ä dji əbə gâ pâ əpʉ səkɔ je.»

33 Rəkɔ, Palɔ nə wûtu lə takpa tə̂ əndje. 34 Bale, alabə̈ əndje bale bale tɔ̂ popo ətshə ə zâ lɔsu əndje kə Jezu. Lə takpa tə̂ əndje nə, Denisə, ə̈bə̈ əzü aangbɔ Areyɔpajə nə də ə̈bə̈ yashe, ə̂në əɨrɨ ye kə də̂ Damarisə kɔ gâ ndə alabə̈ aata azü nə ndje sə̂ je.