1 Alabə̈ azü tô mâ Jude ə nâ mâ Atiɔshə je ə sə̂ kə yisə̂ əpʉ kə alaye ə pa: «Kədə e wa wa gandja Lïndə̂ mandʉ ərə nə̂ Mayïzə ne, e lï lï ndə kə pa e she lə kuzu ne.» 2 Palɔ nə də Barənabasə nə wə̂ra tə̂ əndje tə̂ əpʉ nə ə̂në əndje pâ kɔ â əndje də aəndje pâ ashera ʉrrr sɔ lə kəpʉ. Bale, əndje zâ ama ə pa Palɔ nə də Barənabasə nə gâ ndə alabə̈ azü nə lə takpa tə̂ əndje nə na mâ Jeruzalamə ə wu azü-awla gâ ndə aâgbɔ̂ azü gâ pâ əpʉ səkɔ.

3 Rəkɔ, azü Laglizə nə kô aərə kə əndje mbrə ana nə. Əndje rô lə ashɔ əgɔ Fenesi də ashɔ əgɔ Samari ə sə kə pa ndəma äwä ə̂në azü ə̂në əndje sə sə tə Ajuwufu ne kɔ dô tə̂ əndje gu nə gâ ndə Ndjapä kɔ kə azü â əpʉ nə zâ ə̂rû gâ tə̂ lɔsu alaye. 4 Alɔ ə̂në əndje yî kumu əndje mâ Jeruzalamə nə gâ ye kɔ, azü Laglizə nə də azü-awla gâ ndə aâgbɔ̂ azü nə tê əndje tə ə̂rɔ̂nə. Palɔ nə də Barənabasə nə pâ ndəma aərə nɔ̂ ə̂në Ndjapä mbrə̂ tə̂ äwä əndje kɔ kə azü nə.

5 Bale, alabə̈ azü lə takpa tə̂ Afariza ə̂në əndje zâ lɔsu əndje kə Âgbɔ̂ Əyïngerə gâ ye kɔ, âfɔ ə pâ: «Azü nə̂ Kristə ə̂në əndje sə sə tə Ajuwufu ne kɔ, ə lï ndə kə pa əndje wa gandja ə mbrə ərə Lïndə̂ âgbɔ̂ əpʉ nə̂ Mayïzə.»

6 Azü-awla nə də aâgbɔ̂ azü nə ngbô tə̂ əndje gâ tə̂ nə ndə kə pa əndje wu əpʉ gâ pâ əpʉ səkɔ. 7 Ə̂në əpʉ nə nâ gâ lə âgbɔ̂ ashera gâ ye kɔ, Piarə âfɔ ə pâ kə əndje ə pa: «Alaye, e wusə̂ nə ə pa, tə̂ əlînə, Ndjapä kê əmə lə takpa tə̂ e gâ ye, ndə kə pa, lə ama əmə, ə̂dû amarä dji Ə̂rɔ̂ Əpʉ ə za lɔsu əndje kə ətshə. 8 Bale, Ndjapä ə̂në tshə wusə̂ lɔsu azü kɔ, tshə yîsə̂ nə gashu ə pa əne yîndə əndje â zâ Âgbɔ̂ Yîrə̂ kə əndje gâ ye mata ə̂në tshə zâ ətshə kə əzə̂ kɔ. 9 Tshə wû əzə̂ wû kpî tə̂ əndje ne, mbrə ə̂në tshə yûtu lɔsu əndje mvo gâ ye alɔ ə̂në əndje zâ lɔsu əndje kə ətshə gâ ye kɔ. 10 Rəkɔ, mandânə səye, mbrə yea də̂ e yində kə pra Ndjapä də əpʉ â sə kə za kongbɔ ə̂në əzə̂ də ə̂tə̂ əzə̂ də alätä əzə̂, a lï lï ndə kə pa əzə̂ za gâ pâ əgʉ əzə̂ ne kɔ gâ pâ əgʉ atrawaya a? 11 Bale, a wusə̂ nə ə pa tə̂ äwä ə̂rɔ̂tə̂ Âgbɔ̂ Əyïngerə Jezu də̂ əzə̂ shê lə kuzu äwä bale mata əndje kɔ.»

12 Bale, azü tshelə aangbɔ nə nɔ̂ sə̂ ngboo ə djî kʉtə̂ Barənabasə nə də Palɔ nə ə̂në əndje sə kə pa ndəma aərə kə za awa gâ lə azü də aərə ə̈lü ə̂në Ndjapä mbrə̂ tə̂ äwä əndje lə takpa tə̂ azü ə̂në əndje sə sə tə Ajuwufu ne kɔ. 13 Alɔ ə̂në əndje pâ əpʉ nə ə nglɔ̂ gâ ye kɔ, Zake zâ əpʉ ə pâ: «Alaye, e djï əpʉ nə̂ əmə kane! 14 Shemɔ pâ ndəma äwä ə̂në Ndjapä âfɔ əlînə ə kê, lə takpa tə̂ azü ə̂në əndje sə sə tə Ajuwufu ne kɔ, ə̈bə̈ marä ə̂në tshə zâ kpî mbrə ətshə gâ ye kɔ. 15 Əpʉ nə lï də əpʉ ə̂në aawopandəma Ndjapä pâ leme-e gâ ye kɔ, ə̂në əndje tâ gâ lə Fraka nə̂ Ndjapä ə pa:

16 "Mandânə, mə sə kə gu

ə tɔ əndʉ ngbanda nə̂ Davidə ə̂në ə tê gâ ye kɔ gâ lafɔ.

Aərə anda nə ə̂në ə ngɔ̂ gâ ye kɔ,

mə sə kə ko tɔ gâ lafɔ, ə mbrə əndʉ nə gâ lafɔ.

17 Bale, ə̂dû azü nɔ̂ sə kə pra Əyïlingû,

də amarä nɔ̂ ə̂në əndje djî əɨrɨ əmə gâ pâ əndje kɔ.

Əpʉ ə̂në Əyïlingû pâ kɔ kə sə̂.

18 Tshə yîsə̂ aərə səkɔ gashu leme-e kerə gâ ye."*

19 «Âdârə ə̂në mə wû tə ə̂rɔ̂nə ndə kə pa əzə̂ kânga äwä kânga tə̂ ə̂dû amarä ə̂në əndje dô tə̂ əndje gu nə gâ ndə Ndjapä kɔ ne. 20 Bale, a tä fraka kə əndje ə pa əndje zɨ zɨ rəgo ə̂në azü tô də əkrɔ kə aamba andjapä kɔ ne, əndje kpë äwä əpʉ ə̂trû, ə zɨ̈ zɨ̈ aagia ə̂në əndje têgbɔ tshelə angrɔ əndje ə têgbɔ â əndje tshû kɔ ne ə zɨ̈ zɨ̈ ə̈ndjï ne. 21 Mbrə ə̂në, leme-e ndjɔ kpəsəye, azü sə kə yisə̂ âgbɔ̂ əpʉ nə̂ Mayïzə lə gala bale bale â əndje sə kə dɨ nə lə aanda aangbɔ tə̂ əlo saaba bale bale.»

22 Bale, azü-awla nə də aâgbɔ̂ azü nə gâ ndə azü Laglizə nə nɔ̂ wû tə ə̂rɔ̂nə ndə kə pa əndje ke alabə̈ azü lə takpa tə̂ əndje ə wla əndje də a-Palɔ nə gâ ndə Barənabasə nə mâ Atiɔshə je. Əndje kê Zudə, ə̂në əndje ê ətshə Barəsabasə kɔ, gâ ndə Silasə, azü ə̂në alaye lʉ̂ əndje tə bandanə kɔ. 23 Azü nə zâ fraka kə əndje, ə̂në əndje tâ əpʉ gâ lə nə ə pa:

«Alaye e, azü-awla də aâgbɔ̂ azü, wanda kə e, alaye ə̂në e sə sə tə Ajuwufu ne ə sə lə ashɔ əgɔ Siri, mâ Atiɔshə, də ashɔ əgɔ Silisi kɔ!

24 Ä djî ə pa alabə̈ azü ə̂në ä zâ ama zâ kə əndje ne kɔ, tô mâ ndə ä mâtəye ə nâ ə pâ əpʉ â lɔsu e sə sə kpirə̂ ne â e sə kə li tshelə e. 25 Âdârə ə̂në ä djî tə̂ ä nɔ̂ â kê alabə̈ azü ndə kə pa ä wla əndje kə e gâ ndə a-Palɔ də Barənabasə ə̂në ä yîndə əndje wââ kɔ, 26 mbrə ə̂në əndje kâ tə̂ əndje mbrə əɨrɨ Âgbɔ̂ Əyïngerə nə̂ əzə̂ Jezu Kristə gâ ye. 27 Rəkɔ, ä wlâ Zudə də Silasə kə e ndə kə pa əndje pa əpʉ tshelə fraka nə kə e də ama əndje.

28 Mbrə ə̂në Âgbɔ̂ Yîrə̂ gâ ndə ä ndje wû tə ə̂rɔ̂nə ndə kə pa ä za ə̈bə̈ ata kongbɔ za gâ pâ e ne, kʉtə̂ âgbɔ̂ ərə bale: 29 e zɨ̈ zɨ̈ dɔ̂ngɔ̂ aagia ə̂në əndje tô də əkrɔ kə aamba andjapä kɔ ne, e zɨ̈ zɨ̈ ə̈ndjï aagia də aagia ə̂në aərə têgbɔ angrɔ əndje ə têgbɔ â əndje tshû kɔ ne, e kpë äwä əpʉ ə̂trû. Kədə e kpe aərə səkɔ, e mbrə ə̂rɔ̂ ərə gâ ye.

A bla e!»

30 Azü nə ə̂në əndje wlâ əndje kɔ kâtə̂ ə̂dû azü nə tʉ ə nâ mâ Atiɔshə je ə zâ fraka nə kə ə̂kpû azü nə ə̂në əndje ngbô tə̂ əndje gâ tə̂ nə kɔ. 31 Əndje dɨ̂ fraka nə â tshelə azü nə sə̂ də ə̂rû mbrə ə̂në əpʉ nə gbɔ̂gbɔ lɔsu əndje. 32 Zudə nə də Silasə nə, ə̂në əndje sə̂ ndje tə aawopandəma Ndjapä kɔ, pâ əpʉ kə alaye azü nə ndə kə pa əndje gbɔgbɔ lɔsu əndje ka əndje gbɔgbɔ tə̂ əndje. 33 Əndje dâka pə kôto gâ tə̂ ə̈bə̈ əlo â mandânə, alaye azü nə kô əndje gâ tə̂ äwä lə blatshe â əndje dô tə̂ əndje ə gû gâ tə̂ azü nə ə̂në əndje wlâ əndje kɔ. [34 Bale, Silasə nə wû ənə̂ ye tə ə̂rɔ̂nə ndə kə daka pə mâ je.]*

35 Palɔ nə də Barənabasə nə dâka pə mâ Atiɔshə je. Əndje də alabə̈ azü ə̂në əndje ngba ə ngba kɔ yîsə̂ əpʉ ə mʉ̂ Ə̂rɔ̂ Əpʉ nə̂ Âgbɔ̂ Əyïngerə kə azü.

36 Ndə ə̈bə̈ alɔ mandânə, Palɔ pâ kə Barənabasə ə pa: «A dö tə̂ əzə̂ ə nä ə wü alaye azü lə agala nɔ̂ ə̂në a mʉ̂ əpʉ nə̂ Âgbɔ̂ Əyïngerə lə nə gâ ye kɔ ə wü kə mbrə tə̂ əndje.»

37 Barənabasə nə yîndə kə pa əne za Zââ, ə̂në əndje ê ətshə ndje Markə kɔ, gâ ndə əndje, 38 bale, Palɔ nə wû ənə̂ ye ə pa alane lï lï ndə kə pa alane za əzü ə̂në tshə tshî alane tʉ ə vɔ̂tə̂ nə mâ Pafili ə zâ äwä alane zâ lə kosəra nə ne ʉrrr ndjɔ kɔ ne. 39 Əndje pâ ashera ə djî tə̂ əndje djî ne â tshelə takpa tə̂ əndje sɔ̂. Barənabasə nə zâ Markə nə â əndje də ətshə zâ bato ə rô mâ Shiprə. 40 Bale, Palɔ nə kê Silasə â rô, mandânə ə̂në alaye azü nə zâ ətshə gâ lə kəna Âgbɔ̂ Əyïngerə mbrə ə̂rɔ̂tə̂ ye gâ ye kɔ. 41 Tshə rô lə ashɔ əgɔ Siri də ashɔ əgɔ Silisi ə gbɔ̂gbɔ lɔsu azü Laglizə.