1 Lə Laglizə ə̂në ə sə̂ mâ Atiɔshə kɔ, aawopandəma Ndjapä də aawoyisə̂ ərə sə̂ je ə̂në əɨrɨ əndje kə də̂: Barənabasə, də Shemeyɔ ə̂në əndje ê ətshə Əbu əzü kɔ, də Lusiyusə nə̂ əgɔ Siranə, də Manayanə ə̂në əndje də Komandâ Erɔdə Atipasə gêrə kpə ə̂sə̂ nə kɔ, gâ ndə Sɔlə. 2 Ndə ə̈bə̈ alɔ, əndje ngbô tə̂ əndje gâ tə̂ nə ndə kə vrɔ Âgbɔ̂ Əyïngerə ə rû tshelə əndje tə̂ rəgo ndə kə yu Ndjapä, Âgbɔ̂ Yîrə̂ pâ: «E kö a-Barənabasə gâ ndə Sɔlə kpî gashe mbrə kosəra ə̂në mə ê əndje ndə nə kɔ.»

3 Bale, mandânə ə̂në əndje rû tshelə əndje tə̂ rəgo nə ə yû Ndjapä gâ ye kɔ, əndje kô kəna əndje gâ pâ azü sə̂ bishi kɔ ə kâtə̂ əndje â əndje rô.

4 Rəkɔ, Âgbɔ̂ Yîrə̂ wlâ Barənabasə gâ ndə Sɔlə nə â əndje nâ mâ Seləsi. Mâ je, əndje zâ bato ə nâ mâ Shiprə. 5 Alɔ ə̂në əndje yî kumu əndje mâ Salaminə, əndje mʉ̂ Əpʉ nə̂ Ndjapä lə aanda aangbɔ nə̂ Ajuwufu. Zââ Markə sə̂ gâ ndə əndje ndə kə pa tshə tɨ əndje gâ lafɔ lə kosəra nə.

6 Mandânə ə̂në əndje rô lə dala əgɔ nə nɔ̂ ʉrrr ndjɔ mâ Pafɔsə gâ ye kɔ, əndje sɔ̂tə̂ ə̈bə̈ əyïkifi, ə̈bə̈ afrɔ awopandəma Ndjapä tə Juwufu, əɨrɨ ye kə də̂ Bar-Jezu. 7 Tshə sə̂ tə əzü tshe ngotə̂ komandâ əgɔ nə, Serəjiyusə Pɔlusə ə̂në tshə sə̂ tə awowusə̂ ərə. Komandâ nə ê Barənabasə nə gâ ndə Sɔlə nə mbrə ə̂në tshə sə̂ də əgo ngbatshe ndə kə dji Əpʉ nə̂ Ndjapä. 8 Bale, əyïkifi nə ə̂në əɨrɨ ye də ama grakə nə kə də̂ Elimasə kɔ, yîndə kə kânga äwä tə̂ əndje ə prâ äwä ndə kə pa komandâ nə yində əpʉ nə yi də lɔsu ye ne. 9 Bale, Âgbɔ̂ Yîrə̂ sû Sɔlə nə, ə̂në əndje ê ətshə ndje Palɔ kɔ â tshə shêkɔ ətshə ʉrrr 10 ə pâ: «Əbə, ɨrɨ djablo! Âgbɔ̂ əyïəterə də awofrɔ ətshe, awokânga äwä tə̂ ərə nɔ̂ ə̂në ə sə də äwänə kɔ, bə sə sə kə katə̂ kə djingli azü tə̂ äwä nə̂ Âgbɔ̂ Əyïngerə ne a? 11 Kpəsəye, kəna Âgbɔ̂ Əyïngerə sə kə te gâ pâ zə, ala zə sə kə bu nə gâ tə̂ ə̈bə̈ əlo, bə sə sə kə wu alɔ ne.»

Kʉ pə kôto səkɔ, ala Elimasə nə bû â tshə sə̂ lə əbutshe, ə nâ djitshe djitshe ə prâ azü ndə kə pa əndje gbətɔ ətshə. 12 Alɔ ə̂në komandâ nə wû ərə nə ə̂në ə mbrə̂ kɔ, tshə yîndə əpʉ nə də lɔsu ye; əpʉ nə ə̂në əndje yîsə̂ nə gâ pâ Âgbɔ̂ Əyïngerə kɔ zâ lɔsu ye.

13 Palɔ nə də agbɔbəngâ nə zâ bato mâ Pafɔsə ə nâ mâ Perjə lə ashɔ əgɔ Pafili. Zââ Markə kâtə̂ əndje tʉ kôto ə gû mâ Jeruzalamə. 14 Əndje âfɔ mâ Perjə nə, ə nâ ʉrrr ə yî kumu əndje mâ Atiɔshə lə ashɔ əgɔ Pisidi. Tə̂ əlo saaba, əndje lî gâ lə anda aangbɔ ə sə̂ gâ tʉ. 15 Alɔ ə̂në əndje dɨ̂ fraka âgbɔ̂ əpʉ də ənə̂ aawopandəma Ndjapä gâ ye kɔ, amakɔndji anda aangbɔ nə wlâ əzü kə əndje ə pâ: «Alaye, kədə e â sə də ə̈bə̈ əpʉ ndə kə pa e gbɔgbɔ də lɔsu azü nə, e pä.» 16 Palɔ âfɔ ə mâ kəna ye kə əndje ə pâ: «E-e, azü əgɔ Isərayalə də azü ə̂në e vrɔ Ndjapä kɔ, e djï əpʉ səye! 17 Ndjapä nə̂ azü əgɔ Isərayalə kê alätä ä. Tshə mbrə̂ â marä səkɔ sə̂ tə əgerə marä alɔ ə̂në əndje sə̂ lə əgɔ tshângâ mâ Ejipətə kɔ. Mandânə, tshə kô əndje ə wûtu də əndje lə əgɔ səkɔ tə̂ äwä awlra nə̂ ye. 18 Tshə bâta əndje lə ə̂ngû mata zazü bishi lə ngbûndû. 19 Tshə yî angwa azü nɔ̂ lə amarä mindû amanə bishi lə əgɔ Kanaa. Mandânə, tshə zâ ashɔ nə̂ əndje kə azü nə̂ ye tə ənə̂ əndje 20 ə mâ mata ə̂ngû ngbangbo vəna də zazü bishi də morofo (450). Mandâ ərə səkɔ, tshə kô aawowa ngbanga kə əndje ʉrrr ndjɔ gâ tə̂ alɔ awopandəma Ndjapä Samuwalə. 21 Mandânə, əndje yû tshuku ə̈bə̈ əyïngerə. Bale, Ndjapä zâ Sawulə, ɨrɨ Kishə, lə əngʉ marä nə̂ Bejama kə əndje â tshə mâ ə̂ngû zazü bishi lə ngerə nə.

22 «Mandânə ə̂në Ndjapä wə̂ra tə̂ ye tə̂ Sawulə nə gâ ye kɔ, tshə zâ Davidə kə əndje tə əyïngerə â pâ əpʉ gâ pâ ye ə pa: "Mə sɔ̂tə̂ Davidə, ɨrɨ Jese tə əzü ə̂në lɔsu əmə yîndə ye, tshə sə kə mbrə ərə nɔ̂ ə̂në tshelə əmə yində nə."* 23 Lə angwa ye, Ndjapä mbrə â əndje zu Jezu tə Awoshe azü mbrə azü əgɔ Isərayalə Lïndə̂ əpʉ ama ye. 24 Əlînə ndə kə pa Jezu na, Zââ yîsə̂ əpʉ kə azü əgɔ Isərayalə ə pa əndje tshi äwä angbrɔ kə mbrə tə̂ əndje tʉ ə za batamo. 25 Bale, alɔ ə̂në kosəra nə̂ Zââ nə sə̂ kə nglɔ nə, tshə pâ: "E pa ənə̂ e ə pa mə sə tə əde? Mə sə sə tə əzü ə̂në e ka mbrə ətshə kɔ ne. Bale, e djï əpʉ səye: tshə sə kə na mandâ əmə, ətshə ə̂në mə lï lï ndə kə wlerə tama tə̂ ə̈nü ye ne kɔ." 26 Alaye, e-e, alätä Abraamo də azü ə̂në əndje vrɔ Ndjapä lə takpa tə̂ e kɔ: əzə̂ də̂ Ndjapä wlâ əpʉ sə̂ ə̂në ə she azü lə kuzu kɔ kə əzə̂ kɔ! 27 Mbrə ə̂në azü tshelə Jeruzalamə də amakɔndji nə̂ əndje yêrɔ Jezu yêrɔ kpro ne ə djî tshelə aəpʉ nə̂ aawopandəma Ndjapä ə̂në əndje dɨ alɔnɔ̂ tə̂ əlo saaba kɔ djî ne â mbrə̂ ndəma əpʉ səkɔ â wâ ngbanga gâ lə kumu Jezu nə. 28 Ə̂në əndje sɔ̂tə̂ ə̈bə̈ âdâ əpʉ ngbanga kuzu sɔ̂ lə kumu ye ne kɔ, əndje pâ Pilatə wo ətshə. 29 Rəkɔ, əndje mbrə̂ ndəma aərə nɔ̂ ə̂në Fraka nə̂ Ndjapä pâ əpʉ nə gâ pâ ye kɔ: əndje djɔ̂ ətshə la masheyɔ nə gâ tʉ ə zâ ətshə gâ lə ə̂dû. 30 Bale, Ndjapä shê ətshə lə takpa tə̂ akuzu gâ ye. 31 Tshə mâ tə̂ ye, lə aəlo ə̂në ə ngba ə ngba kɔ, kə azü ə̂në əndje də aəndje âfɔ mâ Galile ə nâ mâ Jeruzalamə kɔ. Kpəsəye, əndje sə tə aawowu ətshə də ala əndje ndə kə pa əndje pa ndə əpʉ nə kə azü əgɔ Isərayalə nə. 32 Bale, ä-ä, ä sə kə mʉ Ə̂rɔ̂ Əpʉ səye kə e, ə̂në Ndjapä zâ ama də əpʉ nə kə alätä əzə̂ gâ ye kɔ. 33 Ndjapä mbrə̂ ndəma nə kpəsəye mbrə əzə̂, alätä əndje, alɔ ə̂në tshə shê Jezu nə, Lïndə̂ əpʉ ə̂në əndje tâ gâ lə fraka Aətshi bishi kɔ, ə pa:

"Bə sə tə Ɨrɨ əmə,

kpəsəye, əmə kə zû əbə."*

34 Ndjapä shê ətshə lə takpa tə̂ akuzu kanika tshə gu gu gâ ə̂sə̂ əfu ərə ne. Ndjapä pâ əpʉ səkɔ ə pa: "Mə sə kə ko aə̂rɔ̂ aərə ə̂në ə sə kpî ə sə tə djatra aərə kɔ ə̂në mə zâ ama də əpʉ nə kə Davidə gâ ye kɔ kə e."* 35 Âdârə ə̂në tshə pâ kwatə̂ye tə̂ ə̈bə̈ ətshe ə pa: "Bə sə sə kə katə̂ ətshə ə̂në bə kê ətshə gâ ye kɔ, tshə fu lə ə̂dû ne."*

36 «Kandää, Davidə nə, lə sorô tə̂ ye, mbrə̂ aərə ə̂në Ndjapä gâmba gâ ye kɔ. Mandânə, tshə tshû, əndje shî ətshə gâ ngotə̂ alabä nə â tshə fû. 37 Bale, ətshə ə̂në Ndjapä shê ətshə gâ ye kɔ, tshə fû fû ne. 38 Alaye, e lï ndə kə wusə̂ nə ə pa tə̂ äwä Jezu, əndje mʉ̂ əpʉ kə gba tshelə anyaka lə kumu azü kə e gâ ye. Âgbɔ̂ əpʉ nə̂ Mayïzə lï lï ndə kə djɔ e lə anyaka nə̂ e ne. 39 Bale, əzü ə̂në tshə za lɔsu ye kə Jezu nə, tshelə anyaka nə̂ ye nɔ̂ gbâ gâ ye. 40 Rəkɔ, ala e gbɔ̈ kanika ərə ə̂në aawopandəma Ndjapä pâ əpʉ nə gâ lə fraka kɔ wu wutu gâ tə̂ e ne. Əndje pâ:

41 "E lïshi, e-e ə̂në e neke aərə kɔ,

kumu e kpe pâ əndu e, e yü!

Mbrə ə̂në, mə sə kə mbrə ə̈bə̈ ərə tə̂ alɔ nə̂ e.

Ə̈bə̈ ərə ə̂në əndje â pa ndəma nə kə e,

e sə sə kə yində nə ne kɔ."*»

42 Alɔ ə̂në Palɔ nə gâ ndə Barənabasə nə sə̂ kə wutu lə anda aangbɔ nə, azü nə pâ kə əndje ə pa əndje na kwatəndje tə̂ əlo saaba mandânə, ə pa əpʉ gâ pâ əpʉ səkɔ. 43 Bale, mandâ aangbɔ nə, ə̂kpû Ajuwufu də aata azü ə̂në əndje yində Əpʉ Ndjapä nə̂ Ajuwufu kɔ, zâ äwä Palɔ də Barənabasə nə. Palɔ nə də Barənabasə nə pâ əpʉ kə əndje ə gbɔ̂gbɔ əndje ndə kə pa əndje za tə̂ əndje gâ tə ə̂rɔ̂tə̂ Ndjapä.

44 Tə̂ əlo saaba nə mandânə, azü tshelə gala nə, mata əndje nɔ̂, ngbô gâ tə̂ nə ndə kə pa əndje dji əpʉ nə̂ Âgbɔ̂ Əyïngerə. 45 Alɔ ə̂në Ajuwufu wû aə̂kpû azü nə kɔ, manda rô pâ əndje gâ ye. Əndje gû ə̂gû ə pâ əpʉ ə pa əterə də̂ Palɔ nə ə pa kɔ. 46 Bale, Palɔ nə gâ ndə Barənabasə nə pâ kə əndje orâ ə pa: «E-e də̂ ətshinə əndje lï ndə kə mʉ Əpʉ nə̂ Ndjapä kə e. Bale, mata ə̂në e wə̂ra tə̂ e tə̂ nə gâ ye kɔ ə wû tə̂ e ə pa e lï lï də sorô nə̂ alɔnɔ̂ ne kɔ, ä sə kə na mandânə səye gâ tə̂ azü ə̂në əndje sə sə tə Ajuwufu ne kɔ. 47 Mbrə ə̂në əpʉ ə̂në Âgbɔ̂ Əyïngerə zâ ama də nə kə ä kɔ kə səye:

"Mə za əbə tə ə̂yîalɔ nə̂ amarä

ndə kə pa bə na də əpʉ ə̂në ə she azü lə kuzu kɔ

ʉrrr ndjɔ mâ tə̂ ama tshepashɔ."*»

48 Ə̂në azü nə ə̂në əndje sə̂ sə̂ tə Ajuwufu ne kɔ djî əpʉ səkɔ, tshelə əndje mɔ̂ â əndje mbê əpʉ nə̂ Âgbɔ̂ Əyïngerə nə. Azü nɔ̂ ə̂në Ndjapä kê əndje mbrə sorô nə̂ alɔnɔ̂ gâ ye kɔ, əndje yîndə əpʉ nə də lɔsu əndje.

49 Əpʉ nə̂ Âgbɔ̂ Əyïngerə nə zâ ətshe lə əgɔ nə nɔ̂. 50 Bale, Ajuwufu nə frɔ̂ ayashe ə̂në azü lʉ əndje ə lʉ kɔ ə̂në əndje vrɔ Ndjapä kɔ gâ ndə əgbro azü gala nə ndə Palɔ nə də Barənabasə nə. Əndje mbrə̂ azü nə ndə Palɔ nə gâ ndə Barənabasə nə ndə kə pa əndje gi əyo tə̂ əndje ə grɔ əndje lə ashɔ əgɔ nə̂ əndje nə. 51 Bale, akoshe bishi səkɔ grɔ̂ ashɔ ə̈nü əndje gbo azü nə â rô â nâ mâ Ikɔniɔmə. 52 Ənə̂ atrawaya nə, mâ Atiɔshə je, lɔsu əndje sə̂ də âgbɔ̂ ə̂rû â sû də Âgbɔ̂ Yîrə̂.