1 Âgbɔ̂ əzü Teɔfilə, lə angbʉlî fraka nə̂ əmə, mə pâ ndə aərə nɔ̂ ə̂në Jezu mbrə̂ də aəpʉ nɔ̂ ə̂në tshə pâ kɔ, ə vɔtə̂ nə mâ tə̂ ama nə 2 ʉrrr ndjɔ gâ tə̂ əlo ə̂në Ndjapä zâ ətshə o na ye gâ lafɔ kɔ. Angbʉlînə ndə kə pa Ndjapä zâ ətshə o na ye, tshə zâ ama, tə̂ äwä Âgbɔ̂ Yîrə̂, kə azü ə̂në tshə kê əndje tə azü-awla kɔ.

3 Bale, mandâ kuzu ye, əndje ndje də̂ tshə mâ tə̂ ye kə əndje kɔ ndə kə yisə̂ nə kə əndje tə̂ äwä aərə kpî kpî kpî ə pa əne sə tə sorô. Lə aəlo zazü bishi, tshə wûtu gâ tə̂ əndje ə pâ əpʉ Əgɔngerə nə̂ Ndjapä kə əndje. 4 Ndə ə̈bə̈ alɔ ə̂në tshə sə̂ kə zɨ rəgo də aəndje kɔ, tshə zâ ama kə əndje ə pa: «E däka pə kpə Jeruzalamə kotəye, e kä mbrə ərə ə̂në Abä zâ ama gâ ye ndə kə mbrə nə kɔ, ə̂në mə pâ ndə nə kə e gâ ye kɔ. 5 Mbrə ə̂në Zââ zâ batamo ə̂ngû kə azü, bale, e-e, lə ə̈ndö əlo koye, e sə kə za batamo Âgbɔ̂ Yîrə̂.»

6 Ə̂në əndje ngbô tə̂ əndje gâ ngotə̂ ye kɔ, əndje yû ətshə ə pa: «Âgbɔ̂ Əyïngerə, tə̂ alɔ nə səke də̂ bə mbrə əndʉ əgɔngerə nə̂ Isərayalə nə a?» 7 Jezu kîrə əpʉ kə əndje ə pâ: «Ə də̂ ənə̂ e də̂ ndə kə pa e wusə̂ alɔ nə də əlo nə ə̂në Abä dɨ̂, lə ngerə dje ye də ə̂tə̂ ye gâ ye kɔ ne. 8 Bale, e sə kə sɔtə̂ awlra alɔ ə̂në Âgbɔ̂ Yîrə̂ sə kə jerə gâ pâ e. E sə kə sə tə aawopa əpʉ nə̂ əmə ə̂në e djî də aərə ə̂në e wû gâ ye kɔ lə Jeruzalamə, lə əgɔ Jude nɔ̂ də əgɔ Samari nɔ̂ ʉrrr ndjɔ lə aəgɔ pâ ashɔ nɔ̂.»

9 Mandâ əpʉ səkɔ, ə̂në Jezu sə̂ kə o na ye gâ lafɔ â əndje sə̂ kə shekɔ ətshə kɔ, andra âfɔ â əndje wû ətshə wû kwatəndje ne.Kə o Jezu gu na ye gâ lafɔ

10 Alɔ ə̂në əndje dâka pə kə lishi gâ lafɔ ə̂në Jezu ô na ye tə̂ nə kɔ, alabə̈ akoshe bishi ə̂në əndje yî aə̂mbî aləba kɔ wûtu gâ ngotə̂ əndje 11 ə pâ kə əndje ə pa: «Azü əgɔ Galile, e daka pə kə ka kotə̂ye ə lishi gâ lafɔ mbrə yekɔ? Jezu ə̂në tshə âfɔ lə takpa tə̂ e ə ô na ye mâ lafɔ kɔ, tshə sə kə gu nə kʉ rə mata ə̂në e wû ətshə ə̂në tshə ô na ye kɔ.»

12 Azü-awla nə âfɔ mâ pâ kaga aayɔ ɔlivə nə ə gû mâ Jeruzalamə. Kaga səkɔ dɨ̂ tə̂ Jeruzalamə mata ana ə̈nü lə ə̈ndö ə̈nü alɔ bale. 13 Ə̂në əndje yî kumu əndje mâ Jeruzalamə nə gâ ye kɔ, əndje ô mâ lə anda ə̂në ə sə̂ djoko lafɔ kɔ ə̂në əndje ngbo tə̂ əndje lə nə alɔnɔ̂ kɔ. Azü nə kə də̂: Piarə, Zââ, Zake də Andre, Flipə də Toma, Bartalami də Matiɔ, Zake ɨrɨ Alfe, Shemɔ ə̂në tshə sə̂ kə mbrə awlra ndə kə pa əgɔ nə̂ ye wutu lə kanga kɔ də Zudə ɨrɨ Zake. 14 Əndje nɔ̂ əndje djî tə̂ əndje â sə̂ kə ngbo tə̂ əndje gâ tə̂ nə alɔnɔ̂ ndə kə yu Ndjapä, əndje də alabə̈ ayashe də Marə̂, əyï Jezu, gâ ndə alaye Jezu nə.

15 Ndə ə̈bə̈ alɔ, azü ə̂në əndje yîndə Jezu də lɔsu əndje kɔ ngbô tə̂ əndje gâ tə̂ nə, əndje sə mata ngbangbo də zazü bale (120). Piarə âfɔ lə takpa tə̂ əndje ə pâ kə əndje ə pa: 16 «Alaye əmə, ə lï ndə kə pa ndəma əpʉ ə̂në Âgbɔ̂ Yîrə̂ pâ lə Fraka nə̂ Ndjapä kɔ mbrə: tə̂ äwä Davidə, tshə pâ əpʉ gâ pâ Judasə kerə ə pa tshə sə tə awoyisə̂ äwä kə azü ə̂në əndje zâ Jezu kɔ. 17 Judasə sə̂ leme-e lə takpa tə̂ əzə̂ ə sə̂ ndje də kosəra nə̂ ye lə kosəra ə̂në a sə̂ kə mbrə nə kɔ. 18 Bale, də ngendja ə̂në tshə sɔ̂tə̂ nə mandâ əmbrʉ ərə nə̂ ye kɔ, tshə yɔ̂ ə̈bə̈ kəndɨ. Tshə tê də kumu ye, tshelə ə̈vü ye sɔ̂ â atsheta ye nɔ̂ tû gashu. 19 Azü tshelə Jeruzalamə nɔ̂ wûsə̂ əpʉ səkɔ, âdârə ə̂në əndje djî əɨrɨ kəndɨ səkɔ də ama əgɔ nə̂ əndje ə pa "Hakeldama", âdâ nə kə də̂ "Kəndɨ ə̈ndjï".

20 «Kandää, əndje tâ əpʉ gâ lə fraka Aətshi ə pa:

"Anda nə̂ ye dö tə̂ ye tə amba ətshe,

əzü bale shö shö lə nə ne."*

«Əndje tâ kwatəndje ə pa:

"Ə̈bə̈ ata əzü mbrə̈ kosəra gâ mandâ ye."*

21 «Rəkɔ, lə takpa tə̂ azü ə̂në a də aəndje nâ ana na na ye tə̂ alɔ ə̂në Âgbɔ̂ Əyïngerə Jezu dâka pə lə takpa tə̂ əzə̂ kɔ, 22 ə vɔ̂tə̂ nə tə̂ alɔ ə̂në Zââ zâ batamo kə ətshə ʉrrr ndjɔ gâ tə̂ alɔ ə̂në tshə ô na ye gâ lafɔ kɔ, a kë ə̈bə̈ əzü bale gâ ndə əzə̂ tə awopa ndəma əpʉ kə she Jezu nə.»

23 Bale, əndje ê azü bishi gâ ətshi əndje: Jozafu, ə̂në əndje ê ətshə ə pa Barəsabasə, ə̈bə̈ əɨrɨ ye də̂ Justusə kɔ, gâ ndə Matiasə. 24 Bale, azü nə lə aangbɔ nə yû Ndjapä ə pa: «Əyïlingû, əbə ə̂në bə wusə̂ lɔsu azü nɔ̂, yïsə̂ ətshə ə̂në bə kê ətshə lə əndje bishi kɔ kə ä 25 ndə kə pa tshə sə tə əzü-awla gâ mandâ Judasə ə̂në tshə tshî kosəra nə tʉ ə gû na ye gâ tə̂ ətshe ə̂në ə sə tə ənə̂ ye kɔ.»

26 Mandânə, əndje kô kədi ve gâ tʉ ndə kə wu əzü ə̂në ərə nə ke ətshə kɔ. Ərə nə kê də̂ Matiasə â tshə tê gâ ndə azü-awla morofo amanə bale.