1 Palɔ yî kumu ye mâ Darəbə, ndje mâ Listrə. Mâ je, ə̈bə̈ trawaya sə̂ je, əɨrɨ ye kə də̂ Timɔte, əyï nə sə̂ tə Juwufu â dô tə̂ ye tə əzü nə̂ Kristə kɔ, bale abä nə sə̂ tə grakə. 2 Alaye azü lə gala Listrə gâ ndə gala Ikɔniɔmə pâ ə̂rɔ̂ əpʉ nə̂ ye wââ. 3 Bale, Palɔ nə yîndə kə pa tshə za ətshə gâ ngotə̂ ye ə na ana də ətshə. Rəkɔ, tshə zâ ətshə ə wâ ətshə də gandja mbrə Ajuwufu ə̂në əndje sə̂ lə ashɔ əgɔ nə mâ je kɔ. Mbrə ə̂në azü nɔ̂ wûsə̂ nə ə pa abä nə sə tə grakə. 4 Lə agala nɔ̂ ə̂në əndje rô lə nə kɔ, əndje pâ ndəma əpʉ ə̂në azü-awla də aâgbɔ̂ azü gala Jeruzalamə gâmba gâ ye kɔ kə azü nə̂ Kristə nə, ndə kə pa əndje mbrə ərə Lïndə̂ nə. 5 Bale, azü Laglizə nə gbɔ̂gbɔ tə̂ əndje lə əpʉ lɔsu â əlo bale bale, kumu əndje sə kə ngba nə alɔnɔ̂.

6 Alɔ ə̂në Âgbɔ̂ Yîrə̂ shêra Palɔ gâ ndə Silasə nə ndə kə pa əndje yisə̂ Əpʉ Ndjapä yi lə ashɔ Azi ne kɔ, bale əndje ro ə ro lə əgɔ Friji gâ ndə əgɔ Galasi. 7 Alɔ ə̂në əndje yî kumu əndje trö də əgɔ Misi gâ ye kɔ, əndje trâ ndə kə pa əndje na mâ lə ashɔ əgɔ Bitini. Bale, Yîrə̂ Jezu zâ äwä zâ kə əndje ndə pa əndje na mâ je ne. 8 Bale, əndje rô lə əgɔ Misi nə ə nâ mâ lə gala Trowasə. 9 Də tsheləbu nə, Palɔ nə wû ərə: ə̈bə̈ əzü əgɔ Masedwanə kâ gâ lafɔ ə kɨ̂ kə ətshə ə pa: «Rö mâ lə ashɔ əgɔ Masedwanə ə nä ə tɨ̈ ä gâ lafɔ!» 10 Mandâ kə wu ərə səkɔ ə̂në Palɔ nə wû kɔ, ä âfɔ katshä ndə kə pa ä pra äwä ə na mâ lə ashɔ əgɔ Masedwanə je, mbrə ə̂në ä wûsə̂ nə kpro ə pa Ndjapä ê ä ndə kə pa ä mʉ Ə̂rɔ̂ Əpʉ kə azü mâ je.

11 Alɔ ə̂në ä zâ bato mâ Trowasə, ä nâ ndji mâ Samotrasə. Tshekra, ä nâ mâ Neapɔlisə. 12 Ä âfɔ kôto ə nâ mâ lə gala Flipə, ə̂në ə sə̂ tə əlî gala lə ashɔ əgɔ Masedwanə nə kɔ, ə sə̂ ndje gâ tshekudu əgɔ Rɔmə kɔ. Ä mâ alabə̈ aəlo kpə lə gala nə kôto. 13 Tə̂ əlo saaba, ä wûtu lə gala nə ə nâ mâ tə̂ ama ə̈bə̈ ə̂ngû ə̂në ä wû ə pa ə̈bə̈ ətshe kə yu Ndjapä tə̂ nə sə̂ je mbrə Ajuwufu kɔ. Alɔ ə̂në ä sə̂ gâ tʉ gâ ye kɔ, ä pâ əpʉ kə ayashe ə̂në əndje ngbô tə̂ əndje gâ tə̂ nə kɔ. 14 Ə̈bə̈ nə bale, əɨrɨ ye kə də̂ Lidji; tshə sə̂ tə əzü tshe Tiatirə ə sə̂ kə ka aəworo aləba ə̂në ə sə̂ tə aə̂rɔ̂ nə kɔ. Tshə sə̂ kə vrɔ Ndjapä ətshinə. Tshə sə̂ kə dji əpʉ ə̂në ä sə̂ kə pa nə kɔ, Âgbɔ̂ Əyïngerə krɔ̂ lɔsu ye â tshə drâ ətu ye ndə kə pa tshə dji aəpʉ nə̂ Palɔ nə. 15 Alɔ ə̂në tshə zâ batamo də azü tshelə anda nə̂ ye nɔ̂ gâ ye kɔ, tshə ê ä ə pa: «Kədə e wu ə pa mə zâ lɔsu əmə ngâ kə Âgbɔ̂ Əyïngerə gâ ye, e nä ə lö mâ ndə əmə-e.» Bale, tshə shêra ä â ä yîndə nə.

16 Ndə ə̈bə̈ alɔ, ä sə̂ kə na mâ ə̂sə̂ kə yu Ndjapä tə̂ nə, ə̈bə̈ əyïkosəra tə yashe nâ ə tê ä. Afrɔ yîrə̂ sə̂ lə ye ə zâ äwä kə ətshə ndə kə pa tshə pa əpʉ aərə ə̂në ə wutu je kɔ kə azü. Mbrə nə, aâgbɔ̂ azü nə̂ ye sɔ̂tə̂ ngendja ngbatshe. 17 Tshə vɔ̂tə̂ kə za äwä ä, ä-ä də a-Palɔ nə, ə tâ râwâ ə pa: «Azü səye sə tə alayïkosəra nə̂ Ndjapä ə̂në tshə sə mâ ngâ lafɔ kɔ! Əndje sə kə yisə̂ äwä ə̂në ə she azü lə kuzu kɔ kə e!» 18 Tshə mbrə̂ kʉ rə lə aəlo ngbatshe. Bale, ə kô Palɔ nə rô pâ nə â tshə dô tə̂ ye â pâ kə afrɔ yîrə̂ nə ə pa: «Mə za ama kə əbə, də əɨrɨ Jezu Kristə, wütu lə ye gashu!» Kʉ pə kôto, afrɔ yîrə̂ nə wûtu lə ye. 19 Aâgbɔ̂ azü nə̂ əyïkosəra nə tə yashe səkɔ wû ə pa äwä kə sɔtə̂ ngendja tə̂ äwä ye nglɔ̂ gâ ye kɔ, əndje têgbɔ Palɔ nə gâ ndə Silasə nə ə nâ də əndje gâ ə̂sə̂ aangbɔ gâ ətshi alayïngbanga. 20 Əndje nâ də əndje kə alayïngbanga ə̂në əndje sə̂ tə azü əgɔ Rɔmə kɔ ə pâ: «Azü səye sə kə na də əpʉ gâ lə gala nə̂ əzə̂. Ajuwufu kə sə̂, 21 ə̂në əndje sə kə yisə̂ mandʉ ərə ə̂në əzə̂ də̂ azü əgɔ Rɔmə, a lï lï ndə kə pa a yində nə wala a mbrə ərə Lïndə̂ nə ne kɔ.»

22 Ə̂kpû azü nə âfɔ də koshe tə̂ əndje. Alayïngbanga nə pâ əndje wlerə aləba tə̂ Palɔ nə gâ ndə Silasə nə ə zâ ama ə pa əndje da əndje də djakwa. 23 Bale, alɔ ə̂në əndje dâ əndje ʉrrr gâ ye kɔ, əndje kô əndje wli gâ lə anda kânga ə zâ ama kə awobata anda kânga nə ə pa tshə ko ala ye tə̂ əndje tə ə̂rɔ̂nə. 24 Bale, awobata anda kânga nə, ə̂në əndje zâ ama səkɔ kə ətshə rəkɔ, kô əndje ə yî əndje mâ lə anda ə̂në ə sə̂ mâ tə̂ budu nə kɔ ə î aə̈nü əndje gâ lə əpro əgbro aayɔ.

25 Trö də tshegrutshe, Palɔ nə gâ ndə Silasə nə sə̂ kə yu Ndjapä ə sə̂ kə wli ətshi ndə kə tɔlɔ Ndjapä, â ə̂dû alayïkânga nə sə̂ kə dji əndje. 26 Bə pa bə dji, ashɔ vɔ̂tə̂ kə meme tə̂ ye tə bandanə â même ndje ə̈nü anda kânga nə. Kʉ pə kôto, amanda kânga nə krɔ̂ â aə̂wû kowɔ ə̂në əndje î də alayïkânga nə nɔ̂ kɔ djɔ̂. 27 Awobata anda kânga nə jô lə əlo; alɔ ə̂në tshə wû ə pa amanda kânga nə krɔ̂ gâ ye kɔ, tshə gbə̂tɔ ə̈ngrʉ̈ kamba nə̂ ye lə akwa nə ə yîndə kə wo tə̂ ye, mbrə ə̂në tshə wû ənə̂ ye ə pa alayïkânga nə kpê gâ ye. 28 Bale, Palɔ nə tâ râwâ tə âgbɔ̂ ə pa: «Mbrə̈ əmbrʉ ərə mbrə̈ tə̂ zə ne! Ä lə nɔ̂ koye je!»

29 Bale, awobata anda kânga nə yû tshuku əwo ə gbɔ̂gbɔ tə̂ ye ə gbɔ̂gbɔ na nə ə lî ə tê gâ tshekudu Palɔ nə də Silasə nə ə sə̂ kə gugu nə. 30 Tshə kô əndje ə wûtu də əndje gashu ə yû əndje ə pa: «Aâgbɔ̂ azü, mə mbrə atâ â she lə kuzu u?» 31 Əndje kîrə əpʉ ə pa: «Zä lɔsu zə kə Âgbɔ̂ Əyïngerə Jezu kanika ə she lə kuzu, əbə də azü tshelə anda nə̂ zə nɔ̂.» 32 Bale, əndje yîsə̂ əpʉ nə̂ Âgbɔ̂ Əyïngerə kə ətshə də azü nɔ̂ ə̂në əndje sə̂ lə anda nə̂ ye kɔ. 33 Tshə kô əndje kôto kʉ də tsheləbu səkɔ ə yûtu tshela aəku nə̂ əndje ə zâ batamo trale də azü tshelə bəngʉ nə̂ ye nə.

34 Bale, tshə zâ Palɔ nə gâ ndə Silasə nə ə gû də əndje mâ ndə ye ə kô rəgo kə əndje. Tshelə ye də azü tshelə bəngʉ nə̂ ye nɔ̂ sə̂ də ə̂rû mbrə ə̂në əndje zâ lɔsu əndje kə Ndjapä gâ ye kɔ. 35 Alɔ ə̂në tshe nə krâ gâ ye kɔ, alayïngbanga nə wlâ alabə̈ atrugu kə awobata anda kânga nə ə pa: «Wöra azü səkɔ!» 36 Awobata anda kânga nə pâ ndəma əpʉ səkɔ kə Palɔ nə ə pa: «Alayïngbanga wlâ ətshe ə pa mə wora e. Rəkɔ, ə̂në a lə ye, e wütu ə gü na ye lə blatshe.» 37 Bale, Palɔ nə pâ kə atrugu nə ə pa: «Əndje zâ ama ə pa əndje da ä də ala azü nɔ̂ ə wâ ngbanga wâ gâ lə kumu ä ne, ä-ä ə̂në ä sə tə aneshe əgɔ Rɔmə kɔ! Mandânə, əndje kô ä ə wlî ä gâ lə anda kânga. Kpəsəye, əndje yində kə pa əndje wutu də ä lə angbanə? Bale ne! Əndje nä də ə̂tə̂ əndje ə wöra ä!»

38 Atrugu nə gû ə pâ ndəma əpʉ səkɔ kə alayïngbanga nə â awa mbrə̂ əndje ə̂në əndje djî ə pa Palɔ nə də Silasə nə sə tə azü əgɔ Rɔmə kɔ. 39 Rəkɔ, əndje nâ ə zɨ̂tɨ lɔsu əndje ə kâtə̂ əndje ə kɨ̂ ə̂sə̂ əyo tə̂ əndje kə əndje ə pa əndje wutu lə gala nə ə ro. 40 Alɔ ə̂në Palɔ nə gâ ndə Silasə nə wûtu lə anda kânga nə gâ ye kɔ, əndje gû mâ ndə Lidji. Mandânə, ə̂në əndje wû alaye ə pâ əpʉ kə əndje ə gbɔ̂gbɔ lɔsu əndje gâ ye kɔ, əndje zâ äwä ə rô.