1 Alɔ ə̂në əpʉ nə ə̂në ə âfɔ kɔ nglɔ̂ gâ ye kɔ, Palɔ ê atrawaya nə ə mʉ̂ əpʉ kə əndje ndə kə pa tshə gbɔgbɔ lɔsu əndje. Mandânə, tshə blâ əndje ə rô ə nâ mâ Masedwanə. 2 Tshə rô lə ashɔ əgɔ səkɔ ə pâ əpʉ ngbatshe kə azü nə̂ Kristə ndə kə pa tshə gbɔgbɔ lɔsu əndje. Mandânə, tshə nâ mâ lə ashɔ əgɔ Grasə. 3 Tshə lô mâ je yipʉ vəta. Alɔ ə̂në tshə yîndə kə za bato ə na mâ lə ashɔ əgɔ Siri kɔ, tshə djî ə pa Ajuwufu gâmba tə̂ əndje ndə kə mbrə əmbrʉ ərə tə̂ əne. Bale, tshə zâ ama ə pa əne gu djoko Masedwanə. 4 Agbɔbəngâ ana nə̂ ye nə kə də̂: Sopatarə, ɨrɨ Pirusə, əzü əgɔ Bere, də Arisətarkə gâ ndə Sekundusə nə̂ gala Tesalɔnikə, də Gayusə nə̂ əgɔ Darəbə, də Timɔte, gâ ndə Tishikə də Trɔfimə, azü əgɔ Azi. 5 Azü səkɔ rô ənə̂ əndje ətshinə ə kâ mbrə ä mâ Trowasə. 6 Ənə̂ ä, mandâ sandaga mapa ə̂në əndje mâ mâ də əyï nə ne kɔ, ä zâ bato mâ Flipə. Bale, əlo mindû mandânə, ä tê əndje mâ Trowasə nə je ə mbrə̂ əlo mâ je mindû amanə bishi.

7 Tə̂ əlî əlo dəmashi nə, ä ngbô tə̂ ä gâ tə̂ nə ndə kə pa ä zɨ rəgo nə̂ Âgbɔ̂ Əyïngerə. Palɔ nə pâ əpʉ kə azü ə̂në əndje nâ kɔ mbrə ə̂në əmbʉ, tshə sə kə ro nə; tshə pâ əpʉ ʉrrr tshegrutshe lî tə̂ ye. 8 Alamba sə̂ je ngbatshe lə anda tshe djoko pâ nə ə̂në ä ngbô tə̂ ä lə nə kɔ. 9 Kandää, ə̈bə̈ mɔdɔ sə̂ je, əɨrɨ ye kə də̂ Etikusə. Tshə sə̂ gâ tʉ gâ tə̂ ama äkɔ̈ manda nə. Tshə lô na ye gâ ye, alɔ ə̂në Palɔ nə dâka kə pa əpʉ nə ʉrrr kɔ, əlo nə rô pâ ye gâ ye â tshə âfɔ mâ lafɔ lə vəta anda tshe pâ nə â tê mâ tə̂ ashɔ. Bale, alɔ ə̂në əndje zâ ətshə gâ lafɔ kɔ, tshə tshû gâ ye. 10 Bale, Palɔ nə jêrə ə têrə gâ pâ ye ə zâ ətshə gâ lə kəna ə pâ: «E sə kpirə̂, tshə sə tə sorô!»

11 Mandânə, Palɔ nə ô kwatə̂ye mâ lə anda nə ə ngɔ̂ tshelə mapa ə zɨ̂. Tshə kwatə̂ye ə pâ əpʉ əndʉ nə dɨ̂ ʉrrr ndjɔ gâ tə̂ tshe də əzɨ â rô. 12 Bale, əndje gû də mɔdɔ səkɔ tə sorô nə â lɔsu azü nə nɔ̂ zɨ̂tɨ.

13 Ənə̂ ä, ä zâ bato ə nâ ətshinə mâ Asɔsə, mâ je də̂ ä sə kə za Palɔ nə. Tshə zâ ənə̂ ye äwä ə nâ də ə̈nü ye, mbrə ə̂në tshə yîndə nə rə. 14 Alɔ ə̂në tshə tê ä mâ Asɔsə je, ä zâ ətshə gâ lə bato nə ə nâ mâ Mitilanə. 15 Mâ je, ä nâ la ə̂ngû, tshekra, ä yî kumu ä trö də dala əgɔ Kiɔ. Tshekra, ä yî kumu ä mâ Samɔsə â əlo bale mandânə, ä yî kumu ä mâ Mile. 16 Bale, Palɔ nə zâ ama ndə kə pa əne ka ka mâ Efazə ne, mbrə ə̂në tshə yîndə nə yi ə pa əlo ro əne mâ Azi yera ambanə ne. Tshə yîndə kə na katshä mâ Jeruzalamə, äwä nə â sə je, tə̂ əlo Patekɔtə.Bato

17 Bale, mâ Mile je, Palɔ nə wlâ ətshe kə aâgbɔ̂ azü Laglizə mâ Efazə ə pa əndje na. 18 Alɔ ə̂në əndje nâ ə tê ətshə gâ ye kɔ, tshə pâ kə əndje ə pa: «E wûsə̂ äwä kə mbrə tə̂ əmə alɔnɔ̂ lə takpa tə̂ e gâ ye ə vɔ̂tə̂ nə tə̂ alɔ ə̂në mə dɔ̂ ashɔ Azi kɔ. 19 Mə mbrə̂ kosəra nə̂ Âgbɔ̂ Əyïngerə də kə ma tə̂ əmə tə aya əgblə, də ngɔla lə aərə əyo mbrə ə̂në Ajuwufu yîndə kə mbrə əmbrʉ ərə tə̂ əmə. 20 Mə vʉ̂sə̂ əpʉ vʉ̂ tə̂ e bale ne, mə mʉ̂ əpʉ, ə yîsə̂ ərə ə̂në ə lï ndə kə pa ə mbrə ə̂rɔ̂nə kə e kɔ gâ ye lə ala azü nɔ̂, ndje lə aanda. 21 Mə ê Ajuwufu gâ ndə azü ə̂në əndje sə̂ sə̂ tə Ajuwufu ne kɔ ndə kə pa əndje tshi äwä angbrɔ kə mbrə tə̂ əndje tʉ ə do tə̂ əndje ə gu gâ tə̂ Ndjapä ə za lɔsu əndje kə Âgbɔ̂ Əyïngerə nə̂ əzə̂ Jezu. 22 Bale, kpəsəye, Âgbɔ̂ Yîrə̂ zâ ama kə əmə ndə kə pa mə na mâ Jeruzalamə, mə wusə̂ ərə ə̂në ə ka mbrə əmə mâ je kɔ wu ne. 23 Mə wusə̂ kʉtə̂ nə bale ə pa, lə gala bale bale, Âgbɔ̂ Yîrə̂ yîsə̂ nə kə əmə ətshinə ə pa kânga də aərə əyo sə kə ka tə̂ əmə. 24 Bale, mə wu sorô əmə wu də ə̈bə̈ ərə lə ala əmə bale ne. Ərə ə̂në ə sə tə âgbɔ̂ ərə lə ala əmə bale kə də̂ ə pa mə mbrə kosəra nə̂ əmə ʉrrr ndjɔ gâ tə̂ ama nə ə mbrə ərə ə̂në Âgbɔ̂ Əyïngerə Jezu yîsə̂ nə kə əmə ndə kə pa mə mbrə nə kɔ: mə mʉ Ə̂rɔ̂ Əpʉ gâ pâ ə̂rɔ̂tə̂ Ndjapä kə azü.

25 «Bale, e-e ə̂në mə nâ lə takpa tə̂ e ə mʉ̂ Əgɔngerə nə̂ Ndjapä kə e gâ ye kɔ, mə wusə̂ nə ə pa e sə sə kə wu ala əmə kwatəndje ne. 26 Âdârə ə̂në mə sə kə pa kə e ngâ kpəsəye ə pa: kədə ə̈bə̈ əzü kə tshi äwä əpʉ nə tʉ gâ ye â tshu, ə̈ndjï ye sə sə gâ lə kumu əmə ne. 27 Mbrə ə̂në mə vʉ̂sə̂ ə̈bə̈ əpʉ vʉ̂ tə̂ e bale ne, mə yîsə̂ ərə nɔ̂ ə̂në Ndjapä gâmba gâ ye ndə kə pa tshə mbrə nə kɔ kə e gâ ye. 28 Ala e gbɔ̈ gâ pâ kə sə e, ala e gbɔ̈ ndje gâ pâ ə̂kpû andalimi ə̂në Âgbɔ̂ Yîrə̂ kô e ndə kə pa e bata əndje kɔ. E bäta azü Laglizə nə̂ Âgbɔ̂ Əyïngerə, ə̂në tshə yɔ̂ əndje də ə̈ndjï ye də ə̂tə̂ ye kɔ tə ə̂rɔ̂nə. 29 Mə wusə̂ nə ə pa mandâ kə ro əmə, alabə̈ azü ə̂në əndje sə mata aəmbrʉ atshɔndjɔ kɔ sə kə li gâ lə takpa tə̂ e ə mbrə əmbrʉ ərə gâ tê ə̂kpû andalimi nə. 30 Lə takpa tə̂ e ndje, alabə̈ azü sə kə afɔ ə pa əpʉ əterə ndə kə pa əndje frɔ atrawaya, kanika əndje za äwä alane. 31 Rəkɔ, ala e gbɔ̈, ə̂sə̂ əpʉ nə te gâ lə e ə pa, lə ə̂ngû vəta, sɔ də alɔ sɔ də tsheləbu, mə kâ kâtə̂ kə mʉ əpʉ kə e bale bale də ngɔla ne.

32 «Bale, kpəsəye, mə ko e gâ lə kəna Ndjapä də əpʉ ə̂rɔ̂tə̂ ye ndje. Əpʉ səkɔ sə də awlra ndə kə pa ə gbɔgbɔ e ə ko aə̂rɔ̂ aərə nɔ̂ ə̂në Ndjapä gâmba mbrə azü nə̂ ye gâ ye kɔ kə e. 33 Mə mâ mâ əgo ngendja wala lɔrə wala aləba nə̂ ə̈bə̈ əzü bale ne. 34 E wusə̂ nə də ə̂tə̂ e ə pa kəna əmə səye kə kô aərə kə əmə də agbɔbəngâ əmə kɔ. 35 Lə aərə nɔ̂, mə yîsə̂ nə kə e ə pa e mbrə kosəra rə ndə kə pa e tɨ alayïəyo gâ lafɔ ə li tshelə e gâ pâ əpʉ ə̂në Âgbɔ̂ Əyïngerə Jezu pâ də ə̂tə̂ ye ə pa: "Ə̂rû kə za ərə kə əzü rô ə̂rû kə sɔtə̂ ərə lə kəna əzü!"»

36 Mandâ əpʉ səkɔ, Palɔ nə gbə̂te də aəndje ə yû Ndjapä mbrə əndje nɔ̂. 37 Azü nə nɔ̂ yî ama əndje lə əkɨ ə têgbɔ Palɔ nə lə əkro ye ə ɔ̂ ama ye. 38 Əndje sə̂ də əyo tə̂ lɔsu əndje kʉ mbrə əpʉ ə̂në tshə pâ əndje sə sə kə kwatəndje ə wu ala əne ne kɔ. Mandânə, əndje gî ətshə ndjɔ gâ tə̂ ama bato nə.