1 Mandânə, Palɔ nə âfɔ mâ Atanə je ə nâ mâ Kɔratə. 2 Tshə sɔ̂tə̂ ə̈bə̈ Juwufu mâ je ə̂në əɨrɨ ye kə də̂ Akilasə kɔ, tshə sə̂ tə əzü əgɔ Pɔ. Ətshə də əwɔ nə, Prisilə, âfɔ mâ Itali â yî kumu əndje mâ je kɔ əndʉ nə dɨ̂ dɨ̂ ne, mbrə ə̂në âgbɔ̂ əyïngerə Klɔdə zâ ama kə Ajuwufu nɔ̂ ndə kə pa əndje afɔ lə əgɔ Rɔmə gâ ye. Palɔ nə nâ ə tê Akilasə nə də əwɔ nə, 3 bale, ə̂në kosəra nə̂ ye də ənə̂ əndje sə̂ äwä bale kɔ, əndje sə̂ tə aawombrə agbanda də ləba, tshə lô mâ ndə əndje je â əndje də aəndje mbrə̂ kosəra kpə ə̂sə̂ nə bale. 4 Alɔnɔ̂ tə̂ əlo saaba, Palɔ nə sə kə pa əpʉ mâ lə anda aangbɔ ə prâ äwä ndə kə pa əpʉ nə za lɔsu Ajuwufu də Agrakə. 5 Bale, alɔ ə̂në Silasə gâ ndə Timɔte âfɔ mâ Masedwanə ə yî kumu əndje gâ ye kɔ, Palɔ nə zâ tə̂ ye nɔ̂ kʉ mbrə kə yisə̂ Əpʉ Ndjapä. Tshə pâ orâ kə Ajuwufu nə ə pa Jezu sə tə Kristə nə. 6 Bale, ə̂në Ajuwufu nə wə̂ra tə əndje tə̂ əpʉ nə̂ ye nə ə sə̂ kə gu ətshə kɔ, tshə grɔ̂ ashɔ tshe tə̂ aləba nə̂ ye gbo əndje ə pâ: «Ə̈ndjï e sə gâ lə kumu e! Ə sə sə gâ lə kumu əmə ne. Mandânə səye, mə sə kə na gâ tə̂ azü ə̂në əndje sə sə tə Ajuwufu ne kɔ.»

7 Tshə âfɔ kôto ə nâ mâ lə anda nə̂ ə̈bə̈ əzü ə̂në tshə vrɔ Ndjapä kɔ, əɨrɨ ye kə də̂ Titusə Justusə, ə̂në anda nə̂ ye sə popo anda aangbɔ nə kɔ. 8 Bale, Krispusə, makɔndji anda aangbɔ nə, zâ lɔsu ye kə Âgbɔ̂ Əyïngerə də azü tshelə bəngʉ nə̂ ye nɔ̂. Ə̂kpû azü gala Kɔratə, ə̂në əndje djî əpʉ ə̂në Palɔ nə ə pa kɔ, zâ lɔsu əndje kə Âgbɔ̂ Əyïngerə ə zâ batamo.

9 Də tsheləbu, Âgbɔ̂ Əyïngerə mâ tə̂ ye kə Palɔ nə lə ərə mata ə̈lü ə pâ kə ətshə ə pa: «Awa mbrə̈ əbə mbrə̈ ne, bale, pä əpʉ, ngbö ama zə ngbö gâ tə̂ nə ne, 10 mbrə ə̂në əmə, mə sə də əbə, əzü bale sə sə kə za əbə ə mbrə ə̈bə̈ əmbrʉ ərə tə̂ zə ne, mbrə ə̂në mə sə də azü nə̂ əmə lə gala səye ngbatshe.» 11 Palɔ nə mâ ə̂ngû bale də yipʉ mindû amanə bale mâ Kɔratə je ə yîsə̂ Əpʉ Ndjapä kə azü.

12 Tə̂ alɔ ə̂në Galiɔ sə̂ tə komandâ əgɔ Akayi də əɨrɨ əgɔ Rɔmə kɔ, Ajuwufu nɔ̂ djî tə̂ əndje ə âfɔ də əpʉ gâ tə̂ Palɔ nə, ə zâ ətshə ə nâ də ətshə gâ ətshi ngbanga 13 ə pâ: «Koshe səye sə kə pa əpʉ kə azü ndə kə pa əndje vrɔ Ndjapä də ə̈bə̈ äwä ə̂në ə lï lï də âgbɔ̂ əpʉ ne kɔ.» 14 Palɔ nə yîndə kə a ama ye, alɔ ə̂në Galiɔ pâ kə Ajuwufu nə ə pa: «Kədə əpʉ nə sə̂ kəmə tə əpʉ kə wo əzü wala tə âgbɔ̂ ə̈bə̈ əpʉ, mə sə kə sə kəmə ngboo ə dji əpʉ nə̂ e ngâ, e-e Ajuwufu. 15 Bale, ə̂në əpʉ nə sə tə əpʉ ashera gâ pâ aamba aəpʉ də aəɨrɨ gâ ndə âgbɔ̂ əpʉ nə̂ e də ə̂tə̂ e kɔ, əpʉ nə wu kʉtə̂ e. Mə yi yində nə ndə kə pa əmə də ə̂tə̂ əmə, mə sə tə awowa tshelə əpʉ rə ne.» 16 Bale, tshə grɔ̂ əndje lə anda ngbanga nə gashu. 17 Bale, azü nə nɔ̂ zâ Sɔstanə, makɔndji anda aangbɔ nə, ə vɔ̂tə̂ kə da ətshə ətshi anda ngbanga nə â Galiɔ nə gâ ndə əndje gâ bale ne.

18 Palɔ nə dâka pə kôto kwatə̂ye əndʉ nə dɨ̂. Mandânə, tshə kâtə̂ alaye tʉ ə zâ bato ə nâ mâ lə ashɔ əgɔ Siri, ətshə də Prisilə gâ ndə Akilasə nə. Tshə lʉ̂ sukumu ye mâ Sanəkre mbrə ə̂në tshə drâ ama ye lə ala Ndjapä. 19 Əndje yî kumu əndje mâ Efazə â Palɔ nə kâtə̂ agbɔbəngâ nə tʉ kôto. Tshə lî gâ lə anda aangbɔ ə pâ əpʉ kə Ajuwufu. 20 Əndje pâ tshə daka pə kôto teashe kane, bale, tshə wə̂ra tə̂ ye. 21 Tshə kâtə̂ əndje tʉ ə pâ: «[Mə lï ndə kə pa tə yekɔ yekɔ, mə mbrə sandaga mâ Jeruzalamə ye.]* Mə sə kə gu gâ ndə e, kədə Ndjapä â yində nə.»

Bale, tshə âfɔ mâ Efazə je ə zâ bato ə rô. 22 Alɔ ə̂në tshə yî kumu ye mâ Sezare gâ ye kɔ, tshə nâ ətshinə mâ Jeruzalamə, ə blâ azü Laglizə â nâ mâ Atiɔshə mandânə. 23 Ə̂në tshə lô mâ je əndʉ nə dɨ̂ teashe gâ ye kɔ, tshə rô kwatə̂ye, ə rô lə əgɔ Galasi, ə rô lə əgɔ Friji ə gbɔ̂gbɔ lɔsu atrawaya nɔ̂.

24 Ə̈bə̈ Juwufu ə̂në əɨrɨ ye kə də̂ Apolɔsə kɔ, tə əzü gala Alegəzandri, yî kumu ye mâ Efazə. Tshə sə̂ tə ə̂rɔ̂ awowusə̂ kə pa əpʉ, ə wûsə̂ Fraka nə̂ Ndjapä tə bandanə. 25 Əndje yîsə̂ əpʉ äwä Âgbɔ̂ Əyïngerə kə ətshə gâ ye. Də ə̂rû tə̂ lɔsu ye, tshə mʉ̂ əpʉ ə yîsə̂ ərə də äwänə gâ pâ əpʉ nə̂ Jezu. Bale, tshə wûsə̂ kʉtə̂ batamo nə̂ Zââ. 26 Tshə vɔ̂tə̂ kə pa əpʉ orâ orâ lə anda aangbɔ nə. Bale, alɔ ə̂në Prisilə nə gâ ndə Akilasə nə djî əpʉ nə̂ ye gâ ye kɔ, əndje zâ ətshə gâ ngotə̂ əndje ə yîsə̂ tshelə âdâ əpʉ äwä Ndjapä kə ətshə də äwänə. 27 Bale, ə̂në tshə yîndə kə ro mâ Akayi kɔ, alaye yîndə nə kə ətshə ə tâ fraka kə atrawaya lə ashɔ əgɔ səkɔ ndə kə pa əndje wəra ətshə tə ə̂rɔ̂nə. Alɔ ə̂në tshə yî kumu ye mâ je gâ ye kɔ, tshə mâ ə̂rɔ̂nə kə azü ə̂në əndje zâ lɔsu əndje kə Âgbɔ̂ Əyïngerə gâ ye kɔ tə̂ äwä ə̂rɔ̂tə̂ Ndjapä. 28 Mbrə ə̂në tshə wə̂ra tə̂ ye ngâ tə̂ əpʉ nə̂ Ajuwufu lə ala azü nɔ̂ â yîsə̂ nə tə̂ äwä Fraka nə̂ Ndjapä ə pâ Jezu sə tə Kristə nə.