Azü-awla 28

Palɔ lə dala Maltə

1 Alɔ ə̂në ä wûtu də ə̂rɔ̂ akwa ä gâ ye kɔ, əndje pâ kə ä ə pa əɨrɨ dala səkɔ kə də̂ Maltə. 2 Azü dala nə mbrə̂ ä tə ə̂rɔ̂nə. Əndje kô ä nɔ̂ gâ ndɨ âgbɔ̂ əwo ə̂në əndje djê gâ ye mbrə ə̂në yavrɨ sə̂ kə ni nə â əzɨ sə̂ kə mi nə kɔ. 3 Palɔ nə ngbô agrawâ ndə kə ko gâ ala əwo nə. Bale, ə̈bə̈ lɔngɔ wûtu lə grawâ nə alɔ ə̂në gupu əwo nə zâ ətshə gâ ye kɔ ə tɔ̂ popo kəna Palɔ nə. 4 Alɔ ə̂në azü dala nə wû əkrɔ nə ə̂në tshə dâka pə tə̂ kəna Palɔ nə yuru kɔ, əndje pâ lə takpa tə̂ əndje ə pa: «Koshe səye sə ngâ tə̂ awowo azü mbrə ə̂në tshə tshɔ̂ lə kuzu katshä katshä səye la ə̂ngû əngbrʉ, â Ndjapä tə̂ äwä ngbanga nə̂ ye yində nə yi ə pa tshə daka pə tə sorô ne.»

5 Bale, Palɔ nə wûlu əkrɔ nə gâ ala əwo nə â ə̈bə̈ ərə mbrə̂ tə̂ ye mbrə̂ bale ne. 6 Azü nə kâ ə kâ ə pa də kəna ye nə ə merə je wala tshə te ə tshu katshä katshä səye je. Bale, alɔ ə̂në əndje kâ ʉrrr tro gâ ye ə wû ə pa ə̈bə̈ ərə mâ tə̂ ye mâ bale ne kɔ, əndje dô tshelə ama əndje kpî ə pâ tshə sə tə ə̈bə̈ ndjapä.

7 Trö tə̂ ətshe səkɔ, akəndɨ nə̂ âgbɔ̂ əzü prââ lə dala nə sə̂ kôto, əɨrɨ ye kə də̂ Publiwusə. Koshe səkɔ wə̂ra ä tə ə̂rɔ̂nə mâ ndə ye, ä lô kôto əlo vəta. 8 Abä Publiwusə nə shô ə shô gâ tʉ, tshelə akwa ye sə̂ kədji kədji, â tshelə ye gʉ̂ ətshə də ə̈ndjï. Palɔ nə lî gâ tə̂ ye ə yû Ndjapä ə zâ kəna ye gâ pâ ye ə grɔ̂ rəka tə̂ ye. 9 Kpə pâ ərə səkɔ, ə̂dû alayïrəka nə lə dala nə nâ â tshə grɔ̂ ndje arəka tə̂ əndje. 10 Azü dala nə lʉ̂ ä tə bandanə â alɔ kə ro ä na na ye, əndje kô aərə ə̂në ä sə də əgo nə kɔ kə ä.

Palɔ yî kumu ye mâ Rɔmə

11 Alɔ ə̂në ä mâ yipʉ vəta gâ ye kɔ, ä âfɔ ə zâ ə̈bə̈ bato əgɔ Alegəzandri, ə̂në əndje ê ə pa «Diosəkurə» kɔ. Bato səkɔ kâ ətshinə gâ tə̂ ə̂sə̂ kə ka abato tə̂ nə tə̂ ama ə̂ngû dala nə tə̂ tshekɨ əzɨ nə nɔ̂. 12 Ä yî kumu ä mâ Sirakusə ə mâ əlo vəta mâ je. 13 Ä âfɔ kôto ə zâ kʉtə̂ tshe tə̂ ama ə̂ngû nə ə yî kumu ä mâ Rejiɔ. Tshekra, əyi tshepakɔnɔ âfɔ â lə əlo bishi, ä yî kumu ä mâ Puzɔlə. 14 Mâ je, ä sɔ̂tə̂ alaye ə̂në əndje kɨ̂ kə ä ə pa ä də alane daka pə kôto əlo mindû amanə bishi gâ ye kane. Rə də̂ ä nâ na ye mâ Rɔmə kɔ. 15 Alaye lə gala Rɔmə nə djî ndə ä ə nâ pra tshitshi ä ʉrrr ndjɔ mâ Oka Apiwusə, ndje mâ Aanda-Ayirə-Vəta. Alɔ ə̂në Palɔ nə wû əndje kɔ, tshə zâ mərshe kə Ndjapä â tshelə akwa ye wôra. 16 Alɔ ə̂në ä yî kumu ä mâ Rɔmə gâ ye kɔ, əndje zâ äwä kə Palɔ nə ə pa tshə sho ənə̂ ye kpî ə zâ ə̈bə̈ trugu bale ndə kə pa tshə bata ətshə.

Palɔ mʉ̂ əpʉ Əgɔngerə nə̂ Ndjapä kə azü

17 Əlo vəta mandânə, Palɔ nə ê əgbro azü nə̂ Ajuwufu tshe Rɔmə mâ ndə ye. Alɔ ə̂në əndje ngbô tə̂ əndje gâ tə̂ nə gâ ye kɔ, tshə pâ əpʉ kə əndje ə pa: «Alaye əmə, mə mâ ə̈bə̈ əmbrʉ ərə mâ bale gâ tə̂ azü əgɔ nə̂ əzə̂ wala mə ndɨ̂ mandʉ ərə nə̂ alätä əzə̂ ndɨ̂ bale ne, bale əndje kânga əmə mâ Jeruzalamə ə zâ əmə gâ lə kəna azü əgɔ Rɔmə. 18 Azü əgɔ Rɔmə nə yû əmə ə yîndə kə katə̂ əmə, mbrə ə̂në əndje sɔ̂tə̂ ə̈bə̈ əpʉ sɔ̂ bale lə kumu əmə ə̂në ə lï də ngbanga kuzu kɔ ne. 19 Bale, Ajuwufu nə wə̂ra tə̂ əndje â mə wû sɨ̂ɨ̂ ə pa mə yində kə wu âgbɔ̂ əyïngerə əgɔ Rɔmə nə. Kandää, mə sə sə də əgo ndə kə pa mə za əpʉ gâ lə kumu azü əgɔ nə̂ əmə ne. 20 Âdârə ə̂në mə yîndə kə wu e ə pa əpʉ kə e kɔ kə sə̂. Mbrə ə̂në mbrə əpʉ ə̂në azü əgɔ Isərayalə zâ lɔsu əndje gâ pâ nə də̂ əndje zâ əmə gâ lə kânga kɔ.» 21 Əndje kîrə əpʉ kə ətshə ə pa: «Ä sɔ̂tə̂ ə̈bə̈ fraka ə̂në ə tô mâ Jude kɔ sɔ̂ bale gâ pâ əpʉ nə̂ zə ne, ə̈bə̈ aye əzü tô tô ndje mâ je ə nâ ə pâ ndə əpʉ nə̂ zə wala ə pa əmbrʉ əpʉ nə̂ zə ne. 22 Bale, ä yində kə pa bə pa əpʉ ə̂në ə sə tə̂ lɔsu zə kɔ də ə̂tə̂ zə ä dji, mbrə ə̂në ä wusə̂ nə ə pa tə̂ ətshe nɔ̂, azü wə̂ra tə̂ əndje gâ ye tə̂ aangbɔ ə̂në bə sə lə nə kɔ.»

23 Əndje də a-Palɔ nə yîsə̂ ə̈bə̈ əlo, â tə̂ əlo nə səkɔ, əndje nâ ə ngbâ tə bandanə ə tê Palɔ nə mâ tə̂ ətshe ə̂në tshə lo tə̂ nə kɔ. Ə vɔ̂tə̂ nə də əzɨ ʉrrr ngbi, Palɔ nə yîsə̂ tshelə âdâ əpʉ gâ pâ Əgɔngerə nə̂ Ndjapä kə əndje â tə̂ äwä âgbɔ̂ əpʉ nə̂ Mayïzə, də əpʉ nə̂ aawopandəma Ndjapä, tshə prâ äwä ndə kə pa əndje yində əpʉ gâ pâ əpʉ Jezu. 24 Əpʉ nə ə̂në tshə pâ kɔ zâ lɔsu alabə̈ əndje â ə̂dû əndje nə yîndə əpʉ nə yî də lɔsu əndje ne. 25 Alɔ ə̂në əndje djî tə̂ əndje djî lə takpa tə̂ əndje gâ pâ əpʉ səkɔ ne â sə̂ kə ndjɔ tshelə əndje kɔ, Palɔ nə pâ kʉtə̂ əpʉ bale kə əndje ə pa: «Əpʉ ə̂në Âgbɔ̂ Yîrə̂ pâ kə alätä e lə ama awopandəma Ndjapä Ezayi kɔ ə sə tə djatra əpʉ, ə̂në tshə pâ:

26 "Nä ə pä kə azü səye ə pa:

E sə kə dji əpʉ tə ə̂rɔ̂nə,

bale, e sə sə kə dji tshelə nə kpiabale ne.

E sə kə lishi tə ə̂rɔ̂nə,

bale e sə sə kə wu ə̈bə̈ ərə kpiabale ne.

27 Mbrə ə̂në lɔsu azü əgɔ səye gbɔ̂ gâ ye.

Əndje bî ətu əndje gâ tə̂ nə gâ ye,

ə pî ala əndje gâ tə̂ nə gâ ye,

ndə kə pa əndje wu ərə wu də ala əndje ne,

əndje dji əpʉ dji də ətu əndje ne,

ə dji tshelə âdâ əpʉ dji ne

ə tshi äwä angbrɔ kə ma tə̂ əndje tshi tʉ

kanika mə grɔ rəka nə̂ əndje grɔ tə̂ əndje ne."*28.26-27 Wu Eza 6.9-10.»

28 Palɔ nə pâ kwatə̂ye ə pa: «Rəkɔ, e wüsə̂ nə ə pa Ndjapä wlâ əpʉ kə she azü lə kuzu səye kə azü ə̂në əndje sə sə tə Ajuwufu ne kɔ: ənə̂ əndje, əndje sə kə dji əpʉ nə!»

[29 Alɔ ə̂në tshə pâ əpʉ səkɔ, Ajuwufu nə ndjɔ̂ ə sə̂ kə gu na ye ə pâ ashera lə takpa tə̂ əndje tə bandanə.]*28.29 Əpʉ səke sə sə lə alabə̈ aangbrɔ afraka Ndjapä də ama grakə ne. 30 Palɔ nə mâ ə̂ngû bishi nɔ̂ lə anda ə̂në tshə piyi nə ə pi tə̂ alɔ yipʉ kɔ. Tshə wə̂ra azü nɔ̂ ə̂në əndje na ndə kə wu ətshə kɔ tə ə̂rɔ̂nə. 31 Tshə mʉ̂ əpʉ gâ pâ əpʉ Əgɔngerə nə̂ Ndjapä, ə yîsə̂ ərə gâ pâ əpʉ Âgbɔ̂ Əyïngerə Jezu Kristə kə azü, awa mbrə ətshə mbrə bale ne â ə̈bə̈ əzü kânga äwä kânga tə̂ ye bale ne.