1 Ə̈bə̈ əyïrəka sə̂ je, əɨrɨ ye kə də̂ Lazarə, əzü əgɔ Betani, əgɔ nə̂ a-Marə̂ də aye nə də Martə. 2 Marə̂ sə̂ tə yashe sə̂ ə̂në tshə sɨ̂ yombo gâ pâ aə̈nü Âgbɔ̂ Əyïngerə â trû də sukumu ye kɔ. Kobɔ nə də Lazarə kə sə̂ də rəka nə kɔ. 3 Akobɔ nə wlâ ətshe kə Jezu ə pâ kə ətshə ə pa: «Âgbɔ̂ Əyïngerə, əzü ə̂në bə yində ye kɔ sə də rəka.» 4 Alɔ ə̂në Jezu djî əpʉ səkɔ, tshə pâ: «Rəka nə̂ Lazarə səkɔ sə sə tə rəka kə wo ətshə ne, bale ə sə mbrə kə mbe Ndjapä, kanika azü mbe Ɨrɨ Ndjapä nə mbrə nə.»

5 Kandää, Jezu yîndə Martə nə də aye nə də Marə̂ gâ ndə Lazarə nə. 6 Alɔ ə̂në Jezu djî ə pa Lazarə sə̂ də rəka kɔ, tshə mâ kwatə̂ye əlo bishi tə̂ ətshe ə̂në tshə sə̂ tə nə kɔ. 7 Mandânə, tshə pâ kə atrawaya nə̂ ye ə pa: «A dö tə̂ əzə̂ ə gü mâ Jude.» 8 Atrawaya nə pâ kə ətshə ə pa: «Awoyisə̂ ərə, katshä katshä səye də̂ Ajuwufu prâ äwä ndə kə gbo əbə də badja ə wo əbə kɔ, bə do tə̂ zə ə gu ma je!» 9 Jezu kîrə əpʉ ə pa: «Ə̈nü alɔ sə sə morofo amanə bishi lə əlo bale ne a? Kədə ə̈bə̈ əzü kə sə kə na ana də alɔ, tshə sə sə kə za ə̈nü ye da ə̈bə̈ ərə ne, mbrə ə̂në tshə sə kə lishi ngbʉ̂ʉ̂. 10 Bale, kədə ə̈bə̈ əzü kə na ana də tsheləbu, tshə sə kə za ə̈nü ye da ə̈bə̈ ərə, mbrə ə̂në ə̂yîəwo sə sə ndə ye ne.» 11 Mandâ aəpʉ səkɔ, tshə pâ kə əndje ə pa: «Lazarə, gbɔbəngâ əzə̂ lô gâ ye, bale, mə sə kə na ndə kə jo ətshə lə əlo nə.» 12 Atrawaya nə pâ kə ətshə ə pa: «Âgbɔ̂ Əyïngerə, kədə tshə lô, rəka nə ə nglɔ je.» 13 Jezu nə pâ ndə əpʉ kuzu Lazarə nə, bale atrawaya nə wû ənə̂ əndje ə pa tshə pâ ndə əpʉ amba əlo ə̂në azü ə lo kɔ. 14 Bale, Jezu pâ kə əndje orâ ə pa: «Lazarə tshû gâ ye. 15 Bale, mbrə e, mə sə də ə̂rû ə̂në mə sə̂ sə̂ mâ je ne kɔ, kanika e za lɔsu e kə əmə. Bale, ə̂në a lə ye, a nä na ye gâ ngotə̂ ye.» 16 Bale, Toma, ə̂në əndje ê ətshə Mêya kɔ, pâ kə ə̂dû atrawaya nə ə pa: «A nä na ye, əzə̂ ndje, ndə kə pa a də aəndje tshu.»

17 Alɔ kə yi kumu Jezu nə, tshə djî ə pa əndje shî Lazarə nə ə mâ əlo vəna gâ ye. 18 Kandää, tshelagɔ Betani sə̂ trö də Jeruzalamə ə lï də kə dɨ tshelə ə̈nü mata sake vəta. 19 Ə̂kpû Ajuwufu nâ gâ ngotə̂ a-Martə nə də Marə̂ nə ndə kə tru ngɔla əndje mandâ kuzu kobɔ əndje nə.

20 Alɔ ə̂në Martə nə djî ə pa Jezu yî kumu ye gâ ye kɔ, tshə nâ pra tshitshi ye, â Marə̂ nə sə̂ pə gâ tʉ mâ lə manda. 21 Martə nə pâ kə Jezu ə pa: «Âgbɔ̂ Əyïngerə, kədə bə sə̂ kəmə kotəye, kobɔ əmə sə̂ sə̂ kə tshu kəmə ne. 22 Bale, ə̂në a ləye ndje, mə wusə̂ nə ə pa ərə nɔ̂ ə̂në bə yu tshuku nə kə Ndjapä, Ndjapä sə kə za kə əbə.» 23 Jezu pâ kə ətshə ə pa: «Kobɔ zə sə kə she nə.» 24 Martə nə kîrə əpʉ kə ətshə ə pa: «Mə wusə̂ nə ə pa tshə she tə̂ alɔ kə she akuzu je, tə ə̂dû əlo.» 25 Jezu pâ kə ətshə ə pa: «Əmə, mə də̂ əpʉ kə she akuzu də əpʉ sorô. Əzü ə̂në tshə za lɔsu ye kə əmə, tshə sə kə sə tə sorô, kədə tshə â tshû kəmə. 26 Â əzü nɔ̂ ə̂në tshə sə tə sorô â za lɔsu ye kə əmə, tshə sə sə kə tshu alɔ bale ne. Bə zä lɔsu zə gâ pâ əpʉ səkɔ a?» 27 Tshə kîrə əpʉ kə Jezu ə pa: «Ayî, Âgbɔ̂ Əyïngerə, əmə, mə wusə̂ nə mâ tə̂ lɔsu əmə ə pa əbə əbə də̂ Kristə nə, Ɨrɨ Ndjapä nə, ətshə ə̂në tshə lï kəmə kə na gâ pâ ashɔ kɔ.»

28 Mandânə ə̂në Martə nə pâ əpʉ səkɔ, tshə nâ ə ê aye nə də Marə̂ nə, ə pâ kə ətshə lə wâyâ ə pa: «Awoyisə̂ ərə yî kumu ye kotəye gâ ye, tshə e əbə.»

29 Pa nə ə̂në Marə̂ nə djî əpʉ səkɔ, tshə âfɔ katshä ə nâ gâ tə̂ ye, 30 mbrə ə̂në Jezu nə tê tê pa ə li gâ lagɔ nə ne; tshə sə̂ pə tə̂ ətshe nə ə̂në Martə nə nâ ə tê ətshə tə̂ nə kɔ. 31 Ajuwufu nə ə̂në əndje də a-Marə̂ nə sə̂ lə anda nə ndə kə pa əndje tru ngɔla ye nə kɔ, əndje wû ətshə ə̂në tshə âfɔ katshä ə wûtu kɔ, əndje zâ äwä ye, ə wû ənə̂ əndje ə pa tshə sə̂ kə na mâ pâ ə̂dû ndə kə kɨ nə. 32 Alɔ ə̂në Marə̂ nə yî kumu ye mâ tə̂ ətshe nə ə̂në Jezu nə sə̂ tə̂ nə ə wû ətshə kɔ, tshə tê gâ tshekudu ye ə pâ kə ətshə ə pa: «Âgbɔ̂ Əyïngerə, kədə bə sə̂ kəmə kotəye, kobɔ əmə sə̂ sə̂ kə tshu kəmə ne.» 33 Alɔ ə̂në Jezu nə wû Marə̂ nə gâ ndə Ajuwufu nə ə̂në əndje də aəndje nâ kɔ, ə̂në əndje sə̂ kə kɨ nə kɔ, tshə sə̂ də əyo tə̂ lɔsu ye, kumu ye nâ duuu. 34 Tshə pâ əpʉ ə pa: «E shî ətshə kotâ a?» Əndje kîrə əpʉ kə ətshə ə pa: «Âgbɔ̂ Əyïngerə, nä gâ əmə ə wü.» 35 Jezu kɨ̂. 36 Rəkɔ, Ajuwufu nə pâ: «E wu kə yində ye ə̂në tshə yində ye kɔ.» 37 Bale, alabə̈ azü nə lə takpa tə̂ əndje pâ: «Ətshə ə̂në tshə mbrə̂ â ala əyïbula sɔ̂ kɔ, tshə lï lï ndə kə pa tshə mbrə ka Lazarə nə tshu tshu ndje ne a?»

38 Əyo kwâtə̂ye ə zâ lɔsu Jezu nə â tshə nâ mâ tə̂ ama ə̂dû nə. Ə̂dû nə sə̂ tə ə̈bə̈ grokpɔ ə̂në əndje kânga ama nə də ə̈bə̈ əgerə əkpʉ. 39 Jezu pâ əpʉ ə pa: «E gï əkpʉ nə gashe!» Martə, kobɔ kuzu nə pâ kə ətshə ə pa: «Âgbɔ̂ Əyïngerə, tshefʉ ye vɔ̂tə̂ kə fu nə gâ ye, mbrə ə̂në vəna əlo nə kə səye.» 40 Jezu pâ kə ətshə ə pa: «Mə pâ pâ kə əbə ə pa: "Kədə bə za lɔsu zə kə əmə, bə sə kə wu ə̂yî Ndjapä ne a?"»

41 Rəkɔ, əndje gî əkpʉ nə gashe. Jezu lîshi gâ lafɔ ə pâ əpʉ ə pa: «Abä, mə za mərshe kə əbə mbrə ə̂në bə djî əmə gâ ye. 42 Ənə̂ əmə, mə wusə̂ nə ə pa bə sə kə dji əmə alɔnɔ̂. Bale, mə pa əpʉ səye mbrə ə̂kpû azü ə̂në əndje ka kotəye kɔ, kanika əndje yində nə ə pa əbə kə wlâ əmə kɔ.» 43 Mandânə ə̂në tshə pâ əpʉ səkɔ, tshə tâ râwâ tə âgbɔ̂ ə pa: «Lazarə, wütu gashu!» 44 Â kuzu nə wûtu gashu, əndje î aə̈nü ye də akəna ye də ama ləba, əndje wôle tshitshi ye də ə̈bə̈ ləba. Jezu pâ kə əndje ə pa: «E wöra aə̂wû nə tə̂ ye, ə kätə̂ ye tshə gu na ye.»Jezu shê Lazarə

45 Ajuwufu ngbatshe lə takpa tə̂ əndje ə̂në əndje nâ mâ ndə Marə̂ nə kɔ, ə̂në əndje wû ərə nə ə̂në Jezu nə mâ kɔ, əndje zâ lɔsu əndje kə ətshə. 46 Bale, alabə̈ əndje lə takpa tə̂ əndje nə nâ ə tê Afariza ə pâ ndə əpʉ ərə nə ə̂në Jezu nə mâ kɔ kə əndje. 47 Bale, aâgbɔ̂ azü nə̂ aawotokrɔ gâ ndə Afariza nə ê aangbɔ ngbanga nə̂ Ajuwufu nə ə pâ: «A sə kə mbrə atâ a? Mbrə ə̂në koshe səye sə kə mbrə aərə ə̈lü ngbatshe kɔ! 48 Kədə a katə̂ ye â tshə sə pə kə mbrə aərə səkɔ, azü nɔ̂ sə kə za lɔsu əndje kə ətshə. Â əgbro azü əgɔ Rɔmə sə kə na ndə kə ndɨ Anda Ndjapä nə̂ əzə̂, ndje gâ ndə əgɔ nə̂ əzə̂.»

49 Ə̈bə̈ əzü bale lə takpa tə̂ əndje, ə̂në əɨrɨ ye kə də̂ Kayifə kɔ, ə̂në tshə sə̂ tə âgbɔ̂ awotokrɔ nə lə ə̂ngû nə səkɔ, pâ kə əndje ə pa: «E-e, e wusə̂ ərə wu bale ne! 50 E wü wü ə pa ə sə tə ə̂rɔ̂nə mbrə e, ndə kə pa kʉtə̂ əzü bale tshu mbrə azü əgɔ nə nɔ̂ kanika əzə̂ lə marä nə nɔ̂ tshu tshu ne.»

51 Kandää, əpʉ ə̂në tshə pâ kɔ, tshə pâ pâ ndə kumu ye ne, bale tshə sə̂ tə âgbɔ̂ awotokrɔ nə lə ə̂ngû nə səkɔ, â tshə pâ ndəma Ndjapä ə pa ə lï ndə kə pa Jezu tshu mbrə marä nə̂ Ajuwufu nɔ̂. 52 Â ə də̂ kʉ mbrə marä nə̂ Ajuwufu nə də̂ ə lï ndə kə pa tshə tshu ne, bale ndje ndə kə pa tshə ngbo aneshe nə̂ Ndjapä ə̂në əndje krû tshelə əndje lə aəgɔ yɔɔɔ kɔ gâ tə̂ nə kʉ bale.

53 Kʉ pə tə̂ alɔ nə səkɔ, əndje zâ ama gâ ye ndə kə wo Jezu. 54 Rəkɔ, Jezu nâ ana nâ kwatə̂ye lə ala azü nɔ̂ lə takpa tə̂ Ajuwufu nə ne. Bale, tshə âfɔ kôto ə nâ lə ə̈bə̈ ətshe ə̂në ə sə̂ trö lə ngbûndû kɔ, lə ə̈bə̈ gala ə̂në əndje ê ə pa Efrayïmə kɔ. Tshə sə̂ mâ je də atrawaya nə̂ ye nə. 55 Sandaga Pakə nə̂ Ajuwufu ndô trö gâ ye. Â ə̂kpû azü əgɔ nə nâ mâ Jeruzalamə əlînə tə̂ əlo Pakə nə ndə kə yutu aəmbrʉ aərə tə̂ əndje ndə kə pa əndje sə mvo lə ala Ndjapä. 56 Əndje sə̂ kə pra Jezu â sə̂ kə pa lə takpa tə̂ əndje lə Anda Ndjapä nə ə pa: «E wu ənə̂ e atâ a? Tshə sə sə kə na ngâ ndə sandaga nə ne a?» 57 Kandää, aâgbɔ̂ azü nə̂ aawotokrɔ nə gâ ndə Afariza nə zâ ama gâ ye ə pa kədə ə̈bə̈ əzü kə wusə̂ ətshe ə̂në tshə sə̂ tə̂ nə kɔ, tshə pa ndə nə kə alane, kanika əndje tegbɔ ətshə.