1 Əlo mindû amanə bale angbʉlînə ndə kə pa sandaga Pakə nə tê, Jezu nâ mâ Betani, əgɔ nə̂ Lazarə ə̂në Jezu shê ətshə lə takpa tə̂ akuzu kɔ. 2 Kôto, əndje kô ə̈bə̈ rəgo kə ətshə. Martə nə kə sə̂ kə to tshelə rəgo nə â Lazarə nə sə̂ tə ə̈bə̈ əzü lə takpa tə̂ əndje ə̂në əndje də a-Jezu sə̂ kə zɨ rəgo nə kɔ. 3 Marə̂ zâ ə̈bə̈ anga yombo ə̂në əndje mbrə̂ kʉ də ə̂ngû ə̈bə̈ ayɔ ə̂në əndje ê ə pa narə kɔ, ə̂në ndogɔ nə gbɔ̂ wââ kɔ, ə sɨ̂ gâ pâ aə̈nü Jezu nə â trû aə̈nü ye nə də sukumu ye. Tshefʉ yombo nə zâ tshelə anda nə nɔ̂. 4 Bale, Judasə Isəkariɔtə, ə̈bə̈ trawaya nə̂ Jezu nə, ətshə ə̂në tshə ka ətshə je kɔ, pâ əpʉ ə pa: 5 «Mbrə yekɔ də̂ əndje kâ yombo səye kâ də ə̂lê ngendja ngbangbo vəta*12.5 Ə̂lê ngendja ngbangbo vəta: Ə sə mata ngendja kosəra nə̂ ə̈bə̈ əyïkosəra lə ə̂ngû bale. Wu ndje Zââ 6.7, də əpʉ ə̂në ə sə tə̂ nə kɔ. (300) ndə kə pa əndje ko kə alayïəyo kəmə ne?» 6 Tshə pâ əpʉ səkɔ pâ mbrə ə̂në əpʉ alayïəyo nə zâ lɔsu ye ne, bale mbrə ə̂në tshə sə̂ tə əyïangba, â, ə̂në tshə sə̂ kə bata ngbede ngendja nə kɔ, tshə sə̂ kə ko aərə ə̂në azü ə kô gâ lə ngbede nə kɔ. 7 Bale, Jezu pâ əpʉ ə pa: «E kätə̂ ye, tshə bata yombo səke mbrə əlo kə shi əmə. 8 Alayïəyo sə alɔnɔ̂ lə takpa tə̂ e, bale, əmə, mə sə sə kə sə pə lə takpa tə̂ e alɔnɔ̂ ne.»

9 Əgerə ə̂kpû Ajuwufu nə wûsə̂ nə ə pa Jezu sə̂ mâ Betani. Əndje nâ nâ mâ je kʉ mbrə Jezu nə ne, bale əndje nâ ndje ndə kə wu Lazarə nə ə̂në tshə shê ətshə lə takpa tə̂ akuzu nə kɔ. 10 Bale, aâgbɔ̂ azü nə̂ aawotokrɔ zâ ndje ama ndə kə wo Lazarə nə, 11 mbrə ə̂në lə kumu ye də̂ Ajuwufu ngbatshe kâtə̂ äwä aâgbɔ̂ azü nə̂ aawotokrɔ nə â zâ lɔsu əndje kə Jezu nə kɔ.

12 Tshe nə krâ, əgerə ə̂kpû azü nə ə̂në əndje nâ ndə sandaga nə kɔ, əndje djî ə pa Jezu sə̂ kə na mâ Jeruzalamə je. 13 Azü nə kô ayana ayɔ ngbima ə nâ pra tshitshi ye ə sə̂ kə ta râwâ ə pa:

«A mbë Ndjapä!

Ndjapä tö ngwarə gâ pâ ətshə ə̂në tshə sə kə na də əɨrɨ Əyïlingû,

Əyïngerə əgɔ Isərayalə kɔ!»*12.13 Wu Ətsh 118.25-26.

14 Jezu sɔ̂tə̂ ə̈bə̈ aya kunda ə sə̂ gâ pâ ye, mata ə̂në Fraka nə̂ Ndjapä pâ ndə nə gâ ye kɔ ə pa:

15 «Awa mbrə̈ əbə mbrə̈ ne, gala Siɔ!

Wü-a! Əyïngerə nə̂ zə sə kə na gu nə.

Tshə sə gâ pâ ə̈bə̈ aya kunda.»*12.15 Siɔ: Siɔ nə sə tə ə̈bə̈ ata əɨrɨ gala Jeruzalamə. Wu Zaka 9.9.

16 Atrawaya nə̂ ye nə djî tshelə əpʉ səkɔ djî angbʉlînə ne. Bale, alɔ ə̂në Jezu nə lî gâ lə ə̂yî ye gâ ye kɔ də̂ əndje lî tshelə əndje ə pa əndje tâ əpʉ səkɔ gâ lə Fraka nə̂ Ndjapä gâ pâ ye â tâ kɔ, â azü nə mbrə̂ ndəma nə gâ tə̂ ye kɔ.

17 Ə̂kpû azü nə ə̂në əndje sə̂ gâ ngotə̂ Jezu nə tə̂ alɔ ə̂në tshə ê Lazarə nə lə ə̂dû â shê ətshə lə takpa tə̂ akuzu kɔ, əndje pâ ndə əpʉ ərə nə ə̂në əndje wû kɔ. 18 Âdâ ərə ə̂në ə̂kpû azü nə nâ pra tshitshi ye kɔ kə sə̂, mbrə ə̂në əndje djî ə pa tshə mbrə̂ ərə ə̈lü səkɔ.

19 Rəkɔ, Afariza nə pâ lə takpa tə̂ əndje ə pa: «E wu gâ ye a! E sə sə kə tɔ gâ tə̂ ə̈bə̈ ərə bale ne. Azü nɔ̂ zâ äwä ye gâ ye.»

20 Alabə̈ Agrakə sə̂ je lə takpa tə̂ azü nə ə̂në əndje nâ ndə kə vrɔ Ndjapä tə̂ alɔ sandaga nə kɔ. 21 Əndje nâ gâ tə̂ Flipə, ə̂në tshə sə̂ tə əzü əgɔ Betəsayida lə ashɔ əgɔ Galile kɔ, ə yû ətshə də əpʉ ə pa: «Âgbɔ̂ əzü, ä yində kə wu Jezu.» 22 Flipə nə nâ ə pâ ndə əpʉ nə kə Andre, â əndje bishi nə nâ ə pâ ndə əpʉ nə kə Jezu nə. 23 Jezu nə kîrə əpʉ kə əndje ə pa: «Alɔ nə lî gâ ye ə̂në Əgblə nə̂ Əzü lï ndə kə sɔtə̂ ə̂yî ndə Ndjapä. 24 Djatra əpʉ, mə pa kə e, kədə ə̂lê ble kə te te gâ lə ashɔ â tshu tshu ne, ə sə kə daka pə kʉtə̂ ye. Bale, kədə ə tshu, ə sə kə le ro pâ nə. 25 Əzü ə̂në tshə yində kə bata əwu ye, tshə sə kə tshu nə. Bale, əzü ə̂në tshə wa wa ndə ye lə sorô tə̂ ye pâ ashɔ səye ne, tshə sə kə bata əwu ye mbrə sorô nə̂ alɔnɔ̂. 26 Kədə ə̈bə̈ əzü kə yində kə ma kosəra kə əmə, tshə zä äwä əmə, ka ətshe ə̂në, əmə, mə sə tə̂ nə kɔ, əyïkosəra nə̂ əmə nə sə kə sə ndje tə̂ nə. Kədə ə̈bə̈ əzü kə yində kə ma kosəra kə əmə, Abä əmə sə kə lʉ ətshə.»

27 «Ə̂në a ləye, mə sə sə də blatshe tə̂ lɔsu əmə ne. Bale, əpʉ yekɔ də̂ mə sə kə pa nə? Wala mə pa: "Abä, tshɔ̈ əmə lə alɔ əyo səye!" Bale, mbrə nə də̂ mə nâ ʉrrr kpə tə̂ alɔ səye kɔ. 28 Abä, mbë əɨrɨ zə!» Rəkɔ, ə̈bə̈ tshema tô mâ lafɔ ə pâ əpʉ ə pa: «Mə mbê gâ ye â mə sə kə mbe nə kwatə̂mə.» 29 Ə̂kpû azü nə ə̂në əndje kâ kôto ə djî tshema səkɔ pâ əpʉ ə pa: «Yavrɨ kə tshê kɔ.» Alabə̈ əndje pâ: «Ə̈bə̈ trawaya nə̂ Ndjapä pâ əpʉ kə ətshə.» 30 Jezu pâ kwatə̂ye ə pa: «Ə də̂ mbrə əmə də̂ tshema sə̂ kɨ̂ kɔ ne, bale mbrə e də̂ ə kɨ̂ kɔ. 31 Alɔ kə wa ngbanga azü tshepashɔ kə sə̂ kpəsəye kɔ; alɔ kə wli makɔndji tshepashɔ gashu kə sə̂ kpəsəye kɔ. 32 Â ənə̂ əmə, alɔ ə̂në əndje zâ əmə pâ ashɔ ə zâ əmə tɔ gâ lafɔ gâ ye, mə sə kə mbrə ndə kə pa azü nɔ̂ na gâ tə̂ əmə.» 33 Tshə pâ əpʉ səkɔ ndə kə yisə̂ marä kuzu ə̂në tshə sə kə tshu nə kɔ. 34 Ə̂kpû azü nə kîrə əpʉ kə ətshə ə pa: «Ä-ä, ä djî lə âgbɔ̂ əpʉ ə pa Kristə nə sə kə sə pə piii; rəkɔ, ə mbrə atâ â bə pa: "Ə lï ndə kə pa əndje za Əgblə nə̂ Əzü tɔ gâ lafɔ kɔ?" Əgblə nə̂ Əzü nə də̂ əde?» 35 Jezu pâ kə əndje ə pa: «Ə̂yîəwo daka pə teashe lə takpa tə̂ e, e nä ana ə̂në e sə pə də ə̂yîəwo nə kɔ, kanika əbutshe te te gâ pâ e gbru ne. Əzü ə̂në tshə sə kə na ana lə əbutshe, tshə sə sə kə wusə̂ ətshe ə̂në tshə sə kə na tə̂ nə kɔ ne. 36 Ə̂në ə̂yîəwo nə sə pə lə takpa tə̂ e kɔ, e zä lɔsu e kə ə̂yîəwo nə, kanika ə do tə̂ e tə aneshe ə̂yîəwo nə.»

Mandânə ə̂në Jezu pâ əpʉ səkɔ, tshə rô ngrʉ̂ ə zâ tə̂ ye wû tə̂ əndje.

37 Ə̂në Jezu mbrə̂ aərə ə̈lü ngbatshe lə ala əndje kɔ, əndje zâ lɔsu əndje zâ kə ətshə ne, 38 kanika ndəma əpʉ ə̂në awopandəma Ndjapä Ezayi pâ gâ ye kɔ mbrə, ə̂në ə pa:

«Âgbɔ̂ Əyïngerə, əde kə yində əpʉ nə ə̂në ä mʉ̂ kɔ də lɔsu ye?

 əde də̂ Âgbɔ̂ Əyïngerə nə yîsə̂ awlra nə̂ ye kə ətshə?»*12.38 Wu Eza 53.1.

39 Ndje, əndje lî lî ndə kə pa əndje za lɔsu əndje kə ətshə ne, mbrə ə̂në Ezayi nə kwâtə̂ye ə pâ:

40 «Ndjapä mbrə̂ â ala əndje bû gâ ye.

Tshə mbrə̂ â əndje wusə̂ ərə wu ne,

kanika əndje lishi li ne,

əndje wusə̂ ərə wu ne,

kanika əndje tshi äwä angbrɔ kə mbrə tə̂ əndje tshi tʉ ne,

kanika mə gɔ grɔ rəka tə̂ əndje ne!»*12.40 Wu Eza 6.9-10.

41 Əpʉ ə̂në Ezayi nə pâ alɔ ə̂në tshə wû ə̂yî Jezu nə â pâ əpʉ gâ pâ ye kɔ kə sə̂.

42 Kandää, lə takpa tə̂ amakɔndji nə̂ Ajuwufu nə ndje, azü ngbatshe zâ lɔsu əndje kə ətshə; bale, mbrə Afariza nə, əndje pâ ndə nə pâ orâ gashu ne, kanika əndje grɔ əndje grɔ lə aanda aangbɔ gashu ne. 43 Mbrə ə̂në əndje yîndə kə mbe ətshe nə̂ azü ə rô kə mbe ətshe ə̂në ə to mâ ndə Ndjapä kɔ.

44 Jezu tâ râwâ ə pa: «Əzü ə̂në tshə za lɔsu ye kə əmə, ə də̂ əmə də̂ tshə za lɔsu ye nə kə əmə kɔ ne, bale tshə za kə ətshə ə̂në tshə wlâ əmə kɔ. 45 Â əzü ə̂në tshə wu əmə, tshə wu ətshə ə̂në tshə wlâ əmə kɔ gâ ye. 46 Əmə ə̂në mə də̂ ə̂yîəwo kɔ, mə nâ gâ pâ ashɔ ndə kə pa əzü nɔ̂ ə̂në tshə za lɔsu ye kə əmə, tshə sə sə kə daka pə lə əbutshe ne.

47 «Kədə ə̈bə̈ əzü kə dji aəpʉ nə̂ əmə â ba bata ne, ə də̂ əmə də̂ kə wa ngbanga gâ lə kumu ye ne, mbrə ə̂në mə nâ nâ ndə kə wa ngbanga gâ pâ azü tshepashɔ ne, bale mə nâ ndə kə tshɔ əndje lə kuzu. 48 Əzü ə̂në tshə wəra tə̂ ye tə̂ əmə â yində aəpʉ nə̂ əmə yi ne, awowa ngbanga gâ pâ ye sə je: əpʉ nə ə̂në mə pâ kɔ kə wa ngbanga gâ pâ ye je tə̂ ə̂dû əlo. 49 Mbrə ə̂në, əmə, mə pâ əpʉ pâ ndə kumu əmə ne, Abä ə̂në tshə wlâ əmə kɔ, ətshə də ə̂tə̂ ye kə zâ ama kə əmə də əpʉ ə̂në mə lï ndə kə pa nə gâ ndə əpʉ ərə ə̂në mə lï ndə kə yisə̂ nə kɔ. 50 Â mə wusə̂ nə ə pa əpʉ nə ə̂në tshə zâ ama də nə gâ ye kɔ, ə sə tə sorô nə̂ alɔnɔ̂. Rəkɔ, ərə ə̂në, əmə, mə sə kə pa əpʉ nə kɔ, mə sə kə pa ndə nə Lïndə̂ əpʉ ə̂në Abä pâ kə əmə kɔ.»