1 Əlo bishi mandânə, sandaga kə ko tə̂ ətshe sə̂ je mâ Kana lə ashɔ əgɔ Galile. Əyï Jezu sə̂ mâ je. 2 Əndje ê ndje Jezu nə gâ ndə atrawaya nə̂ ye ndə sandaga kə ko tə̂ ətshe nə. 3 Ə̂në duva nə nglɔ̂ gâ ye kɔ, əyï Jezu nə pâ kə ətshə ə pa: «Duva nə nglɔ̂ tə̂ azü nə gâ ye.» 4 Bale, Jezu pâ kə ətshə ə pa: «Yashe, ərə yekɔ nə̂ zə tə̂ əmə? Alɔ nə̂ əmə te te pa ə lï ne.» 5 Əyï nə pâ kə alayïkosəra nə ə pa: «E mbrə̈ ərə nɔ̂ ə̂në tshə sə kə pa ndə əpʉ nə kə e kɔ.»

6 Alabə̈ aləsû mindû amanə bale ə̂në əndje mbrə̂ də əkpʉ kɔ sə̂ je kôto, ə̂në Ajuwufu sə̂ kə to ə̂ngû lə nə ndə kə yutu də əmbrʉ ərə tə̂ əndje tə mandʉ ərə kɔ; ləsû bale lï ndə kə ko litrə mata ngbangbo bale (100). 7 Jezu pâ kə alayïkosəra nə ə pa: «E tö ə̂ngû gâ lə aləsû səye ə su trɔ̂.» Əndje tô ə̂ngû nə gâ lə nə ə sû tshe tshe tshe. 8 Tshə pâ kə əndje ə pa: «E tö ə̂ngû nə, ə̂në a lə ye, ə nä də nə kə âgbɔ̂ əzü rəgo sandaga nə.» Əndje nâ də nə kə ətshə. 9 Alɔ ə̂në âgbɔ̂ əzü rəgo sandaga nə trâ ə̂ngû nə ə̂në ə dô tə̂ ye tə duva kɔ, tshə wûsə̂ ətshe ə̂në duva səkɔ tô tə̂ nə kɔ wû ne. Kandää, alayïkosəra nə ə̂në əndje tô ə̂ngû nə kɔ wûsə̂ nə gâ ye. Bale, tshə ê koshe nə ə̂në tshə tô yashe nə kɔ 10 ə pâ kə ətshə ə pa: «Alɔnɔ̂, azü sə kə sɨ tshelə ə̂rɔ̂ duva angbʉlînə tə̂ azü gâ ye, â alɔ ə̂në ə lï də əndje gâ ye kane, â gâ mandânə, əndje sə kə sɨ tshelə ənə̂ sə̂ ə̂në ə sə grɔ mandânə kɔ. Bale, əbə, bə zâ ə̂rɔ̂ duva nə gâ-e ʉrrr kpə tə̂ ərə səye a!»

11 Angbʉlî ərə ə̈lü ə̂në Jezu mbrə̂ mâ Kana lə ashɔ əgɔ Galile kɔ kə sə̂. Tshə yîsə̂ ə̂yî ye gashu, â atrawaya nə̂ ye zâ lɔsu əndje kə ətshə. 12 Mandâ ərə səkɔ, tshə nâ mâ Kaprənayɔmə, ətshə də əyï nə də alaye nə gâ ndə atrawaya nə̂ ye nə, â əndje mâ aəlo kʉ teashe mâ je.

13 Sandaga Pakə nə̂ Ajuwufu ndô trö, â Jezu nâ mâ Jeruzalamə. 14 Tshə sɔ̂tə̂ aawoka apagra də andalimi də aplejɔ lə Anda Ndjapä, gâ ndə aawoshandje ngendja ə̂në əndje sə̂ ndje gâ tʉ kɔ. 15 Tshə mbrə̂ ə̈bə̈ djakwa ə̂wû ə grɔ̂ əndje nɔ̂ lə Anda Ndjapä nə gashu, də andalimi nə gâ ndə apagra nə. Tshə gʉ̂ tshelə ngendja nə̂ aawoshandje ngendja nə tə̂ ashɔ, ə gêta andabâ nə̂ əndje nə gâ tʉ, 16 ə pâ kə aawoka aplejɔ nə ə pa: «E kö aərə səye nɔ̂ kotəye ə rö də nə! E kätə̂ kə mbrə anda nə̂ Abä əmə tə anda kə ka ərə gâ ye!» 17 Ə̂sə̂ əpʉ sə̂ ə̂në əndje tâ gâ lə Fraka nə̂ Ndjapä kɔ ə tê gâ lə əndje, ə̂në ə pa: «Ndjapä, əgo anda nə̂ zə sə kə zɨ əmə ə zɨ.»*2.17 Wu Ətsh 69.10.

18 Aâgbɔ̂ azü nə̂ Ajuwufu zâ əpʉ ə pâ kə ətshə ə pa: «Ərə ə̈lü yekɔ də̂ bə sə kə mbrə nə ndə kə yisə̂ nə kə ä ə pa Ndjapä kə wlâ əbə ndə kə pa bə mbrə aərə səkɔ?» 19 Jezu kîrə əpʉ kə əndje ə pa: «E ngɔ̈ Anda Ndjapä səye gâ tʉ, lə əlo vəta, mə sə kə mbrə əndʉ nə gâ lafɔ.» 20 Aâgbɔ̂ azü nə̂ Ajuwufu nə pâ: «Əndje mbrə̂ Anda Ndjapä səye lə ə̂ngû zazü bishi də mindû amanə bale, â əbə, lə əlo vəta, bə sə kə mbrə əndʉ nə gâ lafɔ!»

21 Bale, Anda Ndjapä nə ə̂në, ətshə, tshə pâ ndə nə kɔ, kə də̂ tshekotə̂ ye. 22 Rəkɔ, alɔ ə̂në Jezu shê lə takpa tə̂ akuzu gâ ye kɔ, ə̂sə̂ əpʉ sə̂ ə̂në tshə pâ kɔ, ə tê gâ lə atrawaya nə̂ ye nə; əndje yîndə Əpʉ Ndjapä nə də əpʉ ə̂në Jezu nə pâ kɔ də lɔsu əndje.

23 Alɔ ə̂në Jezu sə̂ mâ Jeruzalamə, tə̂ alɔ sandaga Pakə nə kɔ, azü ngbatshe zâ lɔsu əndje kə ətshə, ə̂në əndje wû aərə ə̈lü ə̂në tshə mbrə̂ kɔ. 24 Bale, ətshə, Jezu nə zâ lɔsu ye zâ gâ pâ əndje ne, mbrə ə̂në tshə wûsə̂ əndje nɔ̂ gâ ye, 25 â mbrə ə̂në tshə mâ mâ əgo ndə kə pa əndje pa əpʉ ə pa gâ pâ ə̈bə̈ əzü kə ətshə ne. Ətshə, tshə wûsə̂ ərə ə̂në ə sə̂ tə̂ lɔsu əzü kɔ gâ ye.