João 6

Jezu kô rəgo kə azü sake mindû

1 Mandâ aərə səkɔ, Jezu nâ mâ ətshî dala ə̂ngû əgɔ Galile ə̂në əndje ê ndje tə̂ nə ə pa dala ə̂ngû Tiberiadə kɔ. 2 Ə̈bə̈ əgerə ə̂kpû azü zâ äwä ye, mbrə ə̂në əndje wû aərə ə̈lü ə̂në tshə mbrə̂ â grɔ̂ arəka tə̂ alayïrəka kɔ. 3 Bale, Jezu ô gâ pâ kaga, â sə̂ gâ tʉ kôto də atrawaya nə̂ ye. 4 Kandää Pakə, ə̂në ə sə̂ tə sandaga nə̂ Ajuwufu kɔ ndô trö gâ ye. 5 Jezu lîshi gâ lafɔ ə wû ə pa ə̈bə̈ əgerə ə̂kpû azü sə̂ kə na gu nə gâ tə̂ əne. Bale, tshə yû Flipə ə pa: «A yɔ mapa kotâ â azü səye ə zɨ?» 6 Tshə pâ əpʉ səkɔ ndə kə pa tshə tra lɔsu Flipə nə, mbrə ə̂në, ətshə, tshə wûsə̂ ərə ə̂në tshə sə kə mbrə nə kɔ gâ ye.

7 Flipə nə kîrə əpʉ kə ətshə ə pa: «A sə kəmə də ə̂lê ngendja ngbangbo bishi*6.7 Ə̂lê ngendja ngbangbo bishi: Tə̂ tshekɨ nə səkɔ, ə̂lê ngendja bale sə tə ngendja kosəra nə̂ əzü lə əlo bale. Ə̂lê ngendja ngbangbo bishi sə tə ngendja kosəra nə̂ əzü lə yipʉ mindû amanə vəta. (200) ə lï lï ndə kə pa a yɔ də mapa ka əzü bale bale sɔtə̂ nə teashe ka ə zɨ ne.» 8 Ə̈bə̈ trawaya nə̂ ye bale, Andre, aye Shemɔ Piarə pâ kə ətshə ə pa: 9 «Ə̈bə̈ mɔdɔ sə kotəye ə sə də mapa mindû ə̂në əndje mâ də ndjuwu ɔrjə kɔ gâ ndə asungû bishi. Bale, ə tɔ gâ tə̂ yekɔ mbrə azü ə̂në əndje ngbâ ə rô pâ nə gâ ye kɔ?» 10 Jezu pâ əpʉ ə pa: «E pä əpʉ kə azü nə əndje sə gâ tʉ.» Güsü rô pâ nə tə̂ ətshe səkɔ gâ ye â azü nə sə̂ gâ tʉ. Kumu əndje sə̂ mata sake mindû (5 000). 11 Bale, Jezu kô amapa nə ə zâ mərshe kə Ndjapä ə krû tshelə nə tə̂ azü nə ə̂në əndje sə̂ je kɔ. Tshə mbrə̂ ndje kʉ rə tə̂ asungû nə, â kô kə əndje ə lî də əgo nə̂ əndje nə. 12 Alɔ ə̂në tshelə əndje sû gâ ye kɔ, Jezu zâ ama kə atrawaya nə̂ ye nə ə pa: «E rɔ̈ ə̂dû aə̈ndö amapa nə ə̂në ə daka pə kɔ, kanika ə̈bə̈ ərə bale sə sə pə ka ə ndɨ ne.» 13 Rəkɔ, əndje rɔ̂ â akakli yashe morofo amanə bishi sû də aə̈ndö amapa ɔrjə mindû nə ə̂në azü nə zɨ̂ ä ə̂dû nə dâka pə kɔ.

14 Alɔ ə̂në azü nə wû ərə ə̈lü nə ə̂në Jezu nə mbrə̂ kɔ, əndje pâ əpʉ ə pa: «Ətshə kə sə ngâ tə̂ Awopandəma Ndjapä ə̂në tshə sə kə na gâ pâ ashɔ kɔ.»