1 Pə də əzɨ, aâgbɔ̂ azü nə̂ aawotokrɔ nə ngbô tə̂ əndje gâ tə̂ nə də aâgbɔ̂ azü nə gâ ndə aawoyisə̂ âgbɔ̂ əpʉ nə̂ Mayïzə gâ ndə aangbɔ ngbanga nə ndə kə pa əndje dji tə̂ əndje. Əndje î Jezu nə ə nâ də ətshə ə zâ ətshə gâ lə kəna Pilatə. 2 Pilatə nə yû ətshə də əpʉ ə pa: «Əbə, bə sə tə əyïngerə nə̂ Ajuwufu a?» Jezu kîrə əpʉ kə ətshə ə pa: «Əpʉ nə kə sə̂ â bə pa kɔ.»

3 Aâgbɔ̂ azü nə̂ aawotokrɔ nə pâ əpʉ ngbatshe gâ lə kumu Jezu nə. 4 Pilatə nə yû ətshə kwatə̂ye ə pa: «Bə sə sə kə kirə əpʉ bale ne a? Wü aəpʉ sə̂ nɔ̂ ə̂në əndje lea əbə tə̂ nə kɔ.» 5 Bale, Jezu kîrə əpʉ kîrə kwatə̂ye bale ne â kumu Pilatə nə kpê pâ əndu ye.

6 Alɔnɔ̂ tə̂ əlo sandaga Pakə, Pilatə nə sə̂ kə wora ə̈bə̈ əyïkânga kə ə̂kpû azü nə, ətshə ə̂në əndje yû tshuku ye kɔ. 7 Kandää, ə̈bə̈ koshe ə̂në əɨrɨ ye kə də̂ Barabasə kɔ sə̂ lə anda kânga də angâ nə mbrə ə̂në əndje wô əzü alɔ ə̂në əndje âfɔ də awlra tə̂ əgbro azü əgɔ kɔ. 8 Ə̂kpû azü nə nâ mâ ndə Pilatə nə ə vɔ̂tə̂ kə yu ətshə tə̂ ərə ə̂në tshə sə kə ma nə mbrə əndje tə mandʉ nə kɔ. 9 Pilatə nə kîrə əpʉ kə əndje ə pa: «E yində nə ə pa mə wora də̂ əyïngerə nə̂ Ajuwufu nə kə e a?»

10 Mbrə ə̂në tshə wûsə̂ nə ə pa aâgbɔ̂ azü nə̂ aawotokrɔ nə zâ tshelə əndje ə zâ gâ tə̂ Jezu nə â kâ ətshə kə əne kɔ. 11 Bale, aâgbɔ̂ azü nə̂ aawotokrɔ nə frɔ̂ ə̂kpû azü nə ndə kə pa Pilatə nə wora də̂ Barabasə kə əndje. 12 Pilatə nə zâ əpʉ kwatə̂ye ə pâ kə əndje ə pa: «Rəkɔ, ərə yekɔ də̂ e yində nə ə pa mə mbrə tə̂ ətshə nə ə̂në e e ətshə ə pa əyïngerə nə̂ Ajuwufu kɔ?» 13 Əndje tâ râwâ kwatəndje ə pa: «Kü ətshə gâ ala masheyɔ!» 14 Pilatə nə yû əndje ə pa: «Bale, əmbrʉ ərə yekɔ də̂ tshə mâ a?» Əndje tâ râwâ kwatəndje rô pâ nə ə pa: «Kü ətshə gâ ala masheyɔ!» 15 Pilatə nə yîndə kə za ə̂rû gâ tə̂ lɔsu ə̂kpû azü nə â wôra Barabasə kə əndje. Mandânə ə̂në tshə zâ ama â atrugu dâ Jezu nə də djakwa gâ ye kɔ, tshə kâtə̂ ye kə əndje ndə kə pa əndje wo ətshə gâ ala masheyɔ nə.

16 Atrugu nə nâ də Jezu nə mâ lə anda nə̂ komandâ ə ê ə̂dû angâ əndje nə nɔ̂. 17 Əndje yî ə̈bə̈ ə̂drɔ̂ əgerə ləba gâ tə̂ ye; əndje mbrə̂ ə̈bə̈ kpɔtɔ ngerə də aəshi ə zâ gâ tə̂ kumu ye. 18 Mandânə, əndje vɔ̂tə̂ kə bla ətshə ə pa: «Wanda, əyïngerə nə̂ Ajuwufu!»

19 Əndje dâ tshelə kumu ye də wara ə kû ngrusu gâ tə̂ ye ə gbə̂te gâ tshekudu ye ə zâ kumu əndje su ashɔ. 20 Ə̂në əndje mɔ̂ ətshə ʉrrr gâ ye kɔ, əndje djɔ̂ ə̂drɔ̂ ləba nə tə̂ ye gâ tʉ ə yî aləba nə̂ ye nə gâ tə̂ ye ə nâ də ətshə ndə kə ku ətshə gâ ala masheyɔ nə.

21 Əndje zâ ə̈bə̈ koshe ə̂në tshə tô mâ lə kəndɨ â sə̂ kə gu nə kɔ də awlra ndə kə pa tshə za masheyɔ nə̂ Jezu nə. Əɨrɨ koshe nə kə də̂ Shemɔ, əzü əgɔ Siranə, abä Alegəzandrə gâ ndə Rufusə. 22 Əndje nâ də Jezu nə mâ tə̂ ətshe ə̂në əndje djî əɨrɨ nə ə pa Gɔlgɔta kɔ, âdâ nə kə də̂ «Ə̂sə̂ gbɔkrɔ». 23 Əndje zâ duva ə̂në mirə sə̂ lə nə kɔ kə ətshə ndə kə pa tshə ndju, bale, tshə wə̂ra tə̂ ye ndə kə ndju nə.

24 Əndje kû ətshə gâ ala masheyɔ nə ə krû tshelə aləba nə̂ ye lə takpa tə̂ əndje tə̂ äwä kə tɔ də kədi ndə kə pa əndje wu ərə ə̂në əzü bale bale sə kə za nə kɔ. 25 Alɔ ô gâ lafɔ də əzɨ*15.25 Lə fraka nə də ama grakə, əndje pâ: ə̈nü alɔ vəta mandâ kə kra tshe, «9h» tshe də əzɨ. â əndje kû Jezu nə gâ ala masheyɔ nə. 26 Əndje tâ ə̈bə̈ ngrowô gâ lafɔ ndə kə yisə̂ âdâ ngbanga kuzu nə ə̂në əndje wâ gâ lə kumu ye kɔ. Fraka nə pâ: «Əyïngerə nə̂ Ajuwufu.» 27 Əndje kû ətshə gâ ala masheyɔ nə gâ ndə alabə̈ aəmbrʉ azü bishi, ə̈bə̈ nə gâ ndə ndəkɔ ye, bale nə gâ ndə gəle ye. [28 Rəkɔ, əpʉ ə̂në Fraka nə̂ Ndjapä pâ kɔ, ndəma nə mbrə, ə̂në ə pâ: «Əndje dɨ̂ ətshə gâ lə ə̂grû tə̂ aəmbrʉ azü.»*15.28 Wu Eza 53.12.]*15.28 Əpʉ səke sə sə lə alabə̈ aangbrɔ afraka Ndjapä də ama grakə ne.

29 Azü ə̂në əndje sə̂ kə ro nə kɔ gû ətshə ə wûlu kumu əndje ə pâ: «He! Əbə ə̂në bə ngɔ Anda Ndjapä gâ tʉ ə mbrə əndʉ nə lə aəlo vəta kɔ, 30 shë tə̂ zə də ə̂tə̂ zə lə kuzu ə jërə la masheyɔ nə gâ tʉ!»

31 Aâgbɔ̂ azü nə̂ aawotokrɔ nə ndje də aawoyisə̂ âgbɔ̂ əpʉ nə̂ Mayïzə nə mɔ̂ Jezu nə lə takpa tə̂ əndje ə pa: «Tshə shê alabə̈ azü lə kuzu, bale, tshə lï lï ndə kə pa tshə she tə̂ ye də ə̂tə̂ ye lə kuzu ne! 32 Ətshə Kristə nə, əyïngerə əgɔ Isərayalə nə, tshə jërə gâ tʉ la masheyɔ nə katshä katshä səye ndə kə pa a wu ka ə za lɔsu əzə̂ kə ətshə!» Azü nə ə̂në əndje kû əndje gâ ala masheyɔ nə gâ ngotə̂ Jezu nə kɔ gû ndje ətshə.

33 Ə̂në alɔ kâ kpə ə̂grû ətshe kɔ, ətshe bû sɔ pâ ashɔ nɔ̂ ʉrrr alɔ nɔ̂nɔ tə̂ ye gâ ə̂grû nə. 34 Ə̂në alɔ nə nɔ̂nɔ tə̂ ye gâ ə̂grû nə gâ ye kɔ, Jezu tâ râwâ tə âgbɔ̂ ə pa: «Eloyi, Eloyi, lama sabatani?», âdâ nə kə də̂: «Ndjapä nə̂ əmə, Ndjapä nə̂ əmə, mbrə yekɔ də̂ bə tshî əmə tʉ kɔ?»*15.34 Wu Ətsh 22.2.

35 Alabə̈ azü ə̂në əndje sə̂ je kɔ djî əpʉ nə ə̂në tshə pâ kɔ ə pâ: «E djï-a, tshə sə kə e Eli!» 36 Ə̈bə̈ nə bale kpê ärɔ̈ ə ndrû ə̈bə̈ ndɔkɔrɔ gâ lə duva ə̂në ə kpi ə kpi kɔ ə î gâ tə̂ wara ə yî kə Jezu nə ndə kə pa tshə ndju ə pâ: «E kä ə kä, a wu kədə Eli ə na ə jerə də ətshə la masheyɔ nə je!» 37 Bale, Jezu tâ râwâ tə âgbɔ̂ ə tshû.

38 Əgerə ləba ə̂në əndje dû gâ lafɔ ə wâ tshelə Anda Ndjapä nə kɔ, tshelə nə sûru kprû bishi, djoko lafɔ sɔ djoko tʉ. 39 Kapita nə̂ atrugu nə ə̂në tshə kâ gâ ətshi Jezu nə kɔ wû äwä ə̂në tshə tshû də nə kɔ ə pâ: «Koshe səye sə ngâ tə Ɨrɨ Ndjapä!»

40 Alabə̈ ayashe sə̂ ndje je ə sə̂ ngrʉ̂ ə sə̂ kə wu ərə nə. Marə̂, əzü əgɔ Magədala, də Marə̂ əyï Əngʉ Zake də Jɔsə, gâ ndə Salome sə̂ lə takpa tə̂ ayashe səkɔ. 41 Əndje zâ äwä Jezu nə ə mbrə̂ kosəra mbrə ətshə alɔ ə̂në tshə dâka pə mâ lə əgɔ Galile kɔ. Alabə̈ ə̂dû ayashe nə sə̂ ndje je ə̂në əndje də a-Jezu nə nâ mâ Jeruzalamə nə kɔ.

42 Alɔ dɨ̂ gâ ye. Alɔ nə səkɔ sə̂ tə əlo kə gamba aərə mbrə saaba, əmbʉ sə̂ tə əlo saaba nə. 43 Jozafu, əzü gala Arimate, yî kumu ye. Tshə sə̂ tə ə̈bə̈ âgbɔ̂ əyïngbanga nə̂ Ajuwufu. Ətshə ndje, tshə sə̂ kə ka mbrəƏgɔngerə nə̂ Ndjapä. Awa mbrə̂ ətshə mbrə̂ ndə kə na mâ ndə Pilatə nə je ə yu ətshə ndə kə za əko Jezu nə ne. 44 Kumu Pilatə nə kpê pâ əndu ye ə̂në tshə djî ə pa Jezu nə tshû gâ ye kɔ. Tshə ê kapita nə̂ atrugu nə ə yû ətshə ə pa: «Jezu nə tshû əndʉ nə dɨ̂ gâ ye a?» 45 Mandânə ə̂në kapita nə̂ atrugu nə pâ əpʉ kə ətshə gâ ye kɔ, Pilatə nə zâ äwä kə Jozafu nə ndə kə pa tshə za əko Jezu nə. 46 Jozafu nə yɔ̂ ə̈bə̈ ləba. Tshə djɔ̂ əko Jezu nə la masheyɔ nə gâ tʉ ə wôle ətshə də ləba nə ə zâ ətshə gâ lə ə̈bə̈ ə̂dû ə̂në əndje djî gâ lə əkpʉ kɔ. Mandânə, tshə wûru ə̈bə̈ əgerə əkpʉ gâ tə̂ manda ə̂dû nə. 47 Marə̂, əzü əgɔ Magədala nə, gâ ndə Marə̂, əyï Jɔsə nə sə̂ kə shekɔ ətshe ə̂në əndje zâ ətshə gâ tə̂ nə kɔ.