1 Alaye əmə, e wü wü tshelə azü ə wü gâ pâ əpʉ lɔsu e ə̂në e zâ kə Âgbɔ̂ Əyïngerə ə̂yî nə̂ əzə̂ Jezu Kristə kɔ ne. 2 Mə sə kə pa ə̈bə̈ əpʉ: kədə ə̈bə̈ əzü ə̂në tshə yi aləba ə̂në ə tshe woye woye kɔ də bingi lɔrə tə̂ kəna ye kə li gâ lə aangbɔ nə̂ e, â ə̈bə̈ əyïəyo də aləba əbru kə li ndje gâ lə aangbɔ nə. 3 Â kədə ala e sə kʉ gâ tə̂ ətshə nə ə̂në tshə yî aləba nə ə̂në ə tshe ə tshe kɔ â e pa kə ətshə ə pa: «Âgbɔ̂ əzü, sə̈ gâ tʉ gâ tə̂ ə̂rɔ̂ ətshe səye!» Â bale kədə e pa kə əyïəyo nə ə pa: «Əbə, kä gâ lafɔ mâ koye!» wala: «Sə̈ gâ lə ashɔ gâ tə̂ mbata ə̈nü əmə!» 4 Ə̂në e mbrə rə, e wû alabə̈ azü wû kpî tə̂ alabə̈ angâ əndje lə takpa tə̂ e ne a? E sə sə tə aawowa tshelə aəpʉ ə̂në aəmbrʉ aəpʉ sə tə̂ lɔsu e kɔ ne a?

5 Alaye əmə ə̂në mə yində e tə bandanə kɔ, e djï əpʉ səye: Ndjapä kê kê də̂ azü ə̂në azü tshepashɔ wu əndje tə alayïəyo kɔ ndə kə pa əndje sə tə alayïrishi lə əpʉ lɔsu ne a? Tshə kê əndje ndje tə alayïəgɔngerə nə̂ ye ə̂në tshə zâ ama də əpʉ nə gâ ye kə azü ə̂në əndje yində ye kɔ. 6 Bale e-e, e lʉ lʉ əyïəyo ne. Kandää, alayïrishi nə kə sə̂ â na pâ e â ko e na nə gâ ətshi ngbanga kɔ, ə sə sə rə ne a? 7 Ə də̂ əndje də̂ kə sə̂ â gû ə̂rɔ̂ əɨrɨ ə̂në Ndjapä ê gâ pâ e kɔ ne a?

8 Kədə e mbrə ərə Lïndə̂ âgbɔ̂ əpʉ Əgɔngerə nə̂ Ndjapä ə̂në ə sə lə Fraka nə̂ Ndjapä kɔ, ə̂në ə pa: «Yïndə ngâ zə də əzü mata ə də əbə də ə̂tə̂ zə»*2.8 Wu Əkrɔ 19.18., ngâ, e mbrə ərə tə ə̂rɔ̂nə gâ ye. 9 Bale, kədə e sə kə wu tshelə azü ə wu â mbrə ərə rə, nyaka kə sə̂ â e mbrə kɔ, kandää e mbrə ərə ə̂në âgbɔ̂ əpʉ wə̂ra tə̂ ye tə̂ nə kɔ gâ ye. 10 Mbrə ə̂në, kədə ə̈bə̈ əzü kə bata aəpʉ nɔ̂ ə̂në ə sə lə âgbɔ̂ əpʉ nə kɔ, â bale, kədə tshə ndɨ kʉtə̂ ə̈bə̈ əpʉ nə bale, kandää əpʉ âgbɔ̂ əpʉ nə nɔ̂ sə gâ lə kumu ye. 11 Mbrə ə̂në Ndjapä nə ə̂në tshə pâ: «Pä prä yashe wala koshe kpî tə̂ əwɔ zə wala tə̂ äkɔ̈ zə ne» kɔ, pâ ndje: «Wö əzü wö.»*2.11 Wu Wutu 20.13,14. Rəkɔ, kədə bə pra yashe wala koshe pra kpî tə̂ əwɔ zə wala tə̂ äkɔ̈ zə ne, bale â wo əzü kɔ, bə mbrə tə awombrə ərə kpî tə̂ âgbɔ̂ əpʉ nə gâ ye. 12 E pä əpʉ ə mbrə̈ ərə mata azü ə̂në Ndjapä sə kə wa ngbanga gâ lə kumu əndje Lïndə̂ âgbɔ̂ əpʉ ə̂në ə djɔ əzü lə kanga kɔ. 13 Mbrə ə̂në, əzü ə̂në tshə wu əyo angâ nə wu ne kɔ, əndje sə sə kə wu əyo ye tə̂ alɔ kə wa ngbanga ne. Kə wu əyo azü za äwä kə əzü ndə kə pa tshə tɔ lə ngbanga nə.

14 Alaye əmə, kədə ə̈bə̈ əzü kə pa əne sə də lɔsu â mbrə ə̈bə̈ ərə mbrə ndə kə pa tshə yisə̂ əpʉ lɔsu ye nə gashu ne kɔ, ə sə kə mbrə yekɔ? Lɔsu nə lï ndə kə pa ə tshɔ ətshə lə kuzu a? 15 Kədə ə̈bə̈ aye wala ə̈bə̈ kobɔ kə sə sə də ləba ndə kə yi nə ne â sə sə də rəgo lə əlo bale bale ndə kə zɨ nə ne, 16 â ə̈bə̈ əzü lə takpa tə̂ e pa kə ətshə ə pa: «Gü je lə blatshe! Tshekotə̂ zə wö lə ləba, zɨ̈ rəgo tshelə zə sü!» Bale, kədə tshə ko ko aərə ə̂në ə lï ndə kə pa ə mbrə ə̂rɔ̂nə kə ətshə kɔ kə ətshə ne, yekɔ də̂ amba əpʉ nə sə kə mbrə kə ətshə? 17 Əpʉ lɔsu nə sə ndje kʉ rə. Kədə əzü kə sə də lɔsu â mbrə kosəra lɔsu nə mbrə ne, lɔsu ye nə sə mata ərə ə̂në ə tshû gâ ye kɔ.

18 Bale, ə̈bə̈ əzü sə kə pa nə ə pa: «Əbə, bə sə də lɔsu; əmə, mə sə kə mbrə akosəra.» Rəkɔ, mə sə kə kirə əpʉ kə ətshə ə pa: «Yïsə̂ əpʉ lɔsu zə nə ə̂në ə mbrə kosəra mbrə ne kɔ gashu mə wu; ənə̂ əmə, mə sə kə yisə̂ nə kə əbə tə̂ äwä akosəra ə̂në mə mbrə kɔ gashu ə pa mə sə də lɔsu.» 19 Əbə, bə wusə̂ nə tə̂ lɔsu zə ə pa Ndjapä sə kʉ bale a? Ə̂rɔ̂nə də̂ bə mbrə kɔ. Aafrɔ yîrə̂ ndje wusə̂ nə lə əndje ə pa Ndjapä sə kʉ bale â əndje gu ə gugu. 20 Rəkɔ, əbə ə̂në kumu zə sə sə tə̂ nə ne kɔ, bə yində kə wusə̂ nə ə pa əzü ə̂në tshə sə də lɔsu â mbrə kosəra nə mbrə ne kɔ, lɔsu ye nə tɔ tɔ gâ tə̂ ə̈bə̈ ərə bale ne a? 21 Ätä əzə̂ də Abraamo, tshə sə̂ sə̂ tə ə̂rɔ̂ əzü leme-e lə ala Ndjapä tə̂ äwä aərə ə̂në tshə mbrə̂ kɔ ne a? Tshə sə̂ tə ə̂rɔ̂ əzü lə ala Ndjapä nə alɔ ə̂në tshə zâ ɨrɨ nə də Izakə ə tô əkrɔ də ətshə pâ gblaka kə Ndjapä nə kɔ. 22 Bə wu ə pa lɔsu ye də aərə ə̂në tshə mbrə̂ kɔ na äwä bale; â tə̂ äwä aərə ə̂në tshə mbrə̂ kɔ də̂ lɔsu ye nə lï nɔ̂ kɔ. 23 Ə sə rə də̂ ndəma Fraka nə̂ Ndjapä mbrə, ə̂në ə pa: «Abraamo zâ lɔsu ye kə Ndjapä â mbrə nə Ndjapä nə wû ətshə tə ə̂rɔ̂ əzü lə ala ye», â əndje ê ətshə tə gbɔbəngâ Ndjapä nə.*2.23 Wu Vɔtə̂ 15.6; Eza 41.8; Gal 3.6. 24 E wu ə pa lə kumu kə mbrə aərə də̂ əzü sə kə sə tə ə̂rɔ̂ əzü lə ala Ndjapä, ə də̂ kʉ tə̂ äwä əpʉ lɔsu tshî də̂ ne.

25 Ə də̂ ndje tə̂ äwä aərə ə̂në Rahabə, tə əmbrʉ yashe, mbrə̂ leme-e, də̂ tshə sə̂ tə ə̂rɔ̂ əzü lə ala Ndjapä kɔ ne a? Tshə mbrə̂ alayïawla tə ə̂rɔ̂nə ə kô əndje gâ tə̂ äwä kpî â əndje gû na ye. 26 Äwä bale ə̂në əndu əzü ə̂në yîrə̂ ye sə sə lə nə ne kɔ tshû gâ ye kɔ, äwä bale ndje lɔsu ə̂në ə mbrə kosəra mbrə ne kɔ ə tshû gâ ye.