1 Banodikana, musidimbwe umpepo wose, koga ibigeni mukukwejwa mipepo kuti mubone kuti ndiyaMwali na, nokuti bapolofeti banji bamaniepwa baimo munyika. 2 Munounziba uMpepo waMwali nezwi, umpepo wose, unovuma kuti Jesu Kristo wakezha akaba unhu, ngowa Mwali, 3 nooyo umpepo, usinovuma Jesu, autova kunaMwali, koga yoyu wakadalo umbengi waKristo, umwakawha kuti unozha, akale waba munyika kale.

4 Imwi bana muli baMwali, akale mwakabakoma ibo, nokuti yoyo umo mwamuli unkulwana kunooyo umomunyika. 5 Ibo ndibenyika, akale zwose zwabanolebeka ndizwenyika, nenyika inobawhilila. 6 Tili baMwali, aani naani, unonziba Mwali, unotiwha, koga aani naani, usi waMwali, aatotiwha. Nezwi tinoziba uMpepo wechokomende nompepo wamaniepwa.

7 Banodikana, ngatidananeni nokuti ludo lunova kunaMwali, akale iye una ludo ulozwalwa naMwali, akale unoziba Mwali. 8 Iye usina ludo, aatoziba Mwali, nokuti Mwali ludo. 9 Munayezwi ludo lwaMwali lwakazwitondeja pakati pedu, kuti Mwali wakatuma Mwananhulumyana uwe umwempela chete munyika, kutila kuti tilalame nomunaiye. 10 Yolu ndilo ludo kusi kuti takada Mwali asi kuti wakatida isu akatumila Mwananhulumyana uwe kuti ebe umpilo woluchinyo lwedu.

11 Balodikana, sezwo Mwali wakatida ali, neebo isu tokwelela kuti tidanane. 12 Apana unhu wakabona Mwali kana lini, koga kana tidanana, Mwali ugele mukati mwedu, noludo lulwe lunozhajikijwa mwatili.

13 Ndimomwatinoziba kuti tigele munaiye, neebo iye munasu, ulotipa uMpepo uwe. 14 Tabona akale tasumikija kuti Tate bakatumila Mwananhulumyana wabo kuti ebe uNchiji wenyika. 15 Yoyo unodimbwa kuti Jesu Mwananhulumyana waMwali, Mwali unogala mwaali, naiye unogala munaMwali. 16 Nokudalo toziba akale tinodimbwa muludo Mwali lwananalo kwatili.

Mwali ludo, nooyo unogala muludo unogala munaMwali, naMwali unogala mwaali. 17 Munezwo ludo lulwopelela kwatili kutila kuti tisime neZhuba lyokutongwa, nokuti sezwaali iye, ndimo mwatilibo munyika. 18 Amuna lutyo muludo, koga ludo lulopelela lunotatamila lutyo nokuti lutyo lunazwokuta nokulangwa, yoyo unotya aajilopelela muludo.

19 Isu tinoda, nokuti iye wakatida kutanga. 20 Kana umwe unhu eleba kuti, "Ndinoda Mwali," asi esinoda mwanakwaina uwe iniepi nokuti yoyo usinoda mwanakwaina uwe waanobona, aangade Mwali waasinobona. 21 Akale tina mulawo unova kuna iye, unoti, unoda Mwali, ngeedebo mwanakwaina uwe.