1 Wose unodimbwa kuti Jesu ndiKristo, yoyo unhu unozwalwa naMwali, akale unhu wose unoda unzwali, unoda mwana uwe. 2 Nezwo tinoziba kuti tinoda bana baMwali, kana tada Mwali tilondota nomulawo uwe. 3 Nokuti yolu ludo lwaMwali, kuti tilondote milawo iye. Akale milawo yiye ayitolema. 4 Nokuti wose unozwalwa naMwali chinozunda inyika, yoku ndiko kuzunda kunokoma inyika, kudimbwa kwedu. 5 Ndiani angakoma inyika, kuzhe koyo unovumila kuti Jesu Mwananhulumyana waMwali.

6 Yoyu ndiye wakezha nevula nelopa, Jesu Kristo kusi ivula chete koga nevula nelopa, umpepo ndiye unsumikiji, nokuti Umpepo ndiye ichokomende. 7 Kuna basumikiji butatu, 8 uMpepo, ivula nelopa, akale yezwi zwitatu zwinowililana. 9 Kana titambula busumikiji bwabanhu, busumikiji bwaMwali bukulwana kupinda, nokuti yobu ndibo busumikiji bwaMwali bwaakasumikija nezwo Mwananhulumyana uwe. 10 Yoyo unodimbwa muMwananhulumyana waMwali una busumikiji yobu mukati mumwe, asi yoyo usinodimbwa munaMwali, unounta inyepi, nokuti aajakadimbwa busumikiji bwaMwali bwaanosumikijila pezhulu poMwananhulumyana uwe. 11 Yobu ndibwo busumikiji bwokuti, Mwali wakatipa bupenyu businopela, akale yobu bupenyu bwimo muMwananhulumyana uwe. 12 Yoyo unano Mwananhulumyana, una nobupenyu asi, usina Mwananhulumyana waMwali, aanabupenyu.

13 Ndinomukwalila yezwi, imwi mulodimbwa muzina lyoMwananhulumyana waMwali, kuti muzibe kuti muna nobupenyu businopela. 14 Akale yolu ndilo lubimbo lwatina nalo muna iye, lwokuti kana tikumbila chose chinhu, nenzila yokuda kukwe, unotiwha. 15 Akale kana tiziba kuti unotiwha panazwose zwatino kumbila, tinoziba kuti tawana zwatakumbila kwaali.

16 Kana ungobona mwanakwaina echinya luchinyo lusinotungamila kulufu unokwelela kunamata akale Mwali uchompa bupenyu. Ndikumuleba yabo banaluchinyo lusinotungamilila kulufu. Pana luchinyo lunotungamilila kulufu, andijikumuva kuti munamate nezwazwo. 17 Zwose zwisilolulama luchinyo, koga pana luchinyo lusinotungamilila kulufu.

18 Tinoziba kuti yoyo unozwalwa naMwali, aatondilambeli echinya, koga Mwali unobalondota bana babe, akale umbi aatobaguma.

19 Tinoziba kuti tiliba Mwali, akale inyika yose imomusimba lyaguluzhanje.

20 Tinoziba kuti Mwananhulumyana waMwali waswika akale watipa kuwhisisa kutila kuti tiunzibe iye zwechokomende, akale timo mwaali iye wechokomende, muMwananhulumyana uwe Jesu Kristo. Yoyu ndiye Mwali wechokomende, ndiye bupenyu businopela.

21 Imwi bana, musizwishanganise muzwimwali.