1 Imi Paulu undanda, waJesu Kristo, ndakashobwa kuba umpositoli weNdebo iMbuya yaMwali.

2 Yaakabimbisa ntolo nabapolofeti babe mumakwalo machena, 3 iNdebo inolebeleka pezhulu poMwananhulumyana uwe, wakazwalwa kunzwalo yaDavidi nokwenyama 4 akale akatondejelwa kuti Mwananhulumyana waMwali, mumasimba nokundila mumpepo wobuchena, nokumuka kukwe mubafi, Jesu Kristo Tezi wedu, 5 nomunaiye takatambula chipiwo nobupositoli kuti kube ipo kuwhilila kokudimbwa, kunduji jose nokuda kwezina lilye, 6 kushanganisa namwi bakashobwa kuti mube baJesu Kristo.

7 Kunamwi mose badiwa baMwali bokuRoma, mwakashobelwa kuba bachena.

Chipiwo nolunyalalo lwaMwali Tate bedu naShe Jesu Kristo zwibe kwamuli.

8 Kutanga ndinoboka Mwali wangu kunaJesu Kristo, pezhulu penu mose, nokuti kudimbwa kwenu kumupupulwa munyika yose. 9 Mwali wandinonamata nompepo wangu muNdebo iMbuya yoMwananhulumyana uwe, ndiye unsumikiji wangu kuti ndosomubanda mazhuba ose muminamato yangu, 10 ndikumbila kuti ndibe nonshaji wokuzha kwamuli kana Mwali eda. 11 Nokuti ndinodisisa kumubona kuti ndimukobele chipo chompepo kuti musimiswe, 12 zwinoleba kuti tisungwajane imwi nami nokudimbwa kwedu.

13 Ndinoda kuti muzibe banakwaina kuti ndakaba ndida kuzha kwamuli kuti ndoowana michelo nokunamwi nokunejimwe induji jaBokuzhe (koga ndakachelejwa kanji kujine kube ngweno). 14 Ndina unshingo kubaGiliki nokubanhu banangalilo unolingilwa pasi, kuna banabuchenjevu namalema, 15 zwakadalo ndinodisisa kuti ndibuze iNdebo iMbuya kwamuli bokuRoma.

16 Nokuti andina ishoni neNdebo iMbuya; ilyo isimba lyaMwali linochija bose banovumila kutanga kuNjuda akale nokuNgiliki. 17 Nokuti kululama kwaMwali kunotondejelwa muna iyo kutanga nokudimbwa chete; sobuzwakakwalwa kuwhi, Wakalulama unolalama nokudimbwa."

18 Nokuti bukali bwaMwali bunotondejelwa buva kudenga pabuhungu bwose nobubi, bwabanhu banosisa ichokomende mububi bwabo. 19 Nokuti zwakazibiswa naMwali zwipopachena kwabali nokuti iye Mwali nokukwe wakazwibiga pachena. 20 Kuvila pakubumbwa kwenyika chimo chiche chisinoboneka nesimba lilye lisinopela nobumwali bubwe, zwakaboneka kasa zwitondejelwa panezwakabumbwa. Ndizwo besina inzila yokuzwilandulila, 21 nokudalo kojoba bakounziba Mwali abajakonkuja kana kuumboka saMwali, kuyeya kwabo akujakabechinoshinga, akale nendangalilo jabo jakaswibhijwa. 22 Mukuzwita bachenjevu bakaba malema, 23 bakashandula lukujo lwaMwali usinofa, bakata zwitojaniso zwonhu unofa, nozwenyuni nozwemhuka nozwamakabi.

24 Nokudalo Mwali wakabalamwa kuti bete zwilakamilo zwemyoyo yabo zwobuhungu, nezwinosheshemesa nemibili yabo chabo chabo. 25 Nokuti bakashandula ichokomende lyaMwali bakalita mayabwe, bakanamata bekuja zwibumbwa kupinda uMbumbi, iye unokwelela kukujwa kujine kube lini nalini! Ameni.

26 Ndizwo Mwali wakabalekeja mukukwemujwa kwabo. Nabechinhukaji babo bakashandula zwito zwabo zwebhatuko beta zwisilozibilika, 27 nenzila imwempela banhulume bakasiya kudanana nabechinhukaji bakakwemujana chabo chabo, banhulume beta zwito zwinopisa ishoni, nezwo bakawana indipilo ilokwelela kulundula lwabo.

28 Sezwibasakada kuziba Mwali, Mwali wakabalamwa kuti bebe nendangalilio jilohunguka, beta zwisakalulama. 29 Nokudalo bakandyondyomela muna zwisilolulama zwose, bubi, ifupa nolunya. Bakazhala noluchibo, nobubulayi, nokunyenyejana, nobuchengeji nobukali beli banyeyi, 30 banonyepejela, nabanobenga Mwali nabamachinzebe nabanoshiya nabanozwitunhumwija nabanolonga zwibi nabasinowhilila bazwali, 31 namalema nabasinodimbwa nabasinaludo nabasinowhila ishe. 32 Kojoba beziba mulawo waMwali unoti yabo banochinya alo balokwelela kufa chete, ibo abatochinya chete asi banosungwaja bamwe kuta zwakalezwo.