1 Ndibhuze biya, Mwali wakalasha banhu babe na? Mane pe! Imi nokwangu ndili uIzilayeli, inzwalo yaAbhulahamu, wemhingu yoluji lwaBhenjamini. 2 Mwali ajalasha banhu babe baakaziba kuva ntolo. Amutoziba kuti unkwalo unotini nezwaElija, kuti unoteteja chini kunaMwali pezhulu paIzilayeli? Unoti: 3 "Tezi, bakabulaya bapolofeti benu, bakolomola matebulilo, kwasala imi ndoga , akale bakumuda kundibulaya." 4 Koga inshandulo yaMwali kwaali ngeipi? Wakati, "Ndakazwilondotela zwiulu zwishanu zwina zwibili zwabanhu basijanu bafhugamila Bhali. 5 Zwili alo nanasi, baipo bakasiyijwa bakashalwa neshe jije. 6 Koga kana zwili pezhulu peshe, azwichili zwemishingo; nokuti ngana zwisakadalo ishe ajijaluba ishe.

7 Ini biya? Izilayeli yakakonwa kuwana zwayakabeshaka. Bakashalwa ndibo bakawana, koga bamwe bose bakaba nemyoyo mikukutu, 8 sezwo zwilokwalwa kuwhi, "Mwali wakabapa umpepo

9 Davidi unoti,

"Zwokulya zwabo ngazwibe kalabwi kanobateya, nedizwa linobapinga;

10 mesho abo ngaabe nedubi kutila kuti besibone,

akale bekotamise mishana yabo kwemisi isinopela!"

11 Nokudalo ndinobhuza, bakagubhulwa kuti bembwele na?Mane pe! Koga pezhulu poluchinyo lwabo luchijo lwaswika kuna Bokuzhe kutila kuti bokwaIzilayeli bebe nefupa. 12 Ngweno kana luchinyo lwabo lufumisa inyika, akale kana kukonwa kwabo kufumisa Bokuzhe, biya zwinooba chini pabachochingunuka bose!

13 Ngweno ndikumulebeleka namwi Bokuzhe. Sezwo ndili umpositoli kunaBokuzhe, ndinotunhumwija unshingo wangu 14 kutila kuti banakwaina bangu baJuda, bebe nefupa akale bewane kuchijwa pezhulu pangu. 15 Kana kulambwa kwabo kuleba kuchingunuka kwenyika, biya kutambulwa kwabo kunolebani, kunoleba kupa bupenyu kunabakafa!

16 Kana buswa bulofuwiwa bunopilwa semichelo yotanga buli buchena, nechifuwo chose chili alo; akale kana unji uli unchena nenhabi jili alo. 17 Asi kana jimwe inhabi jakaba jatemwa, iwi uli katabi ko-olivi womushango, kova unamatijwa pajakava, kuti mukobane bufumi bwonti we-olivi, 18 leka kuzwikuja pezhulu penhabi. Kana ungozwikuja, kumbulukwa kuti autoba iwi unosimikija miji, asi miji ndiyo inokusimikija iwi.

19 Unooti, "Inhabi jakatemwa kutila kuti imi ndinamatijwe pakale." 20 Yelyo ichokomende. Jakatemwa pezhulu pokusodimbwa kwajo, asi iwi bhatisisa chete nokudimbwa kukwo. Nokudalo usizwikuje koga gala ukatya. 21 Nokuti kana Mwali esakawhila ishe inhabi jomene, nawi aatokuwhila ishe. 22 Linga bubuya nobukali bwaMwali kunaabo bakawa, koga ishe jaMwali kwauli kana ugala mushe jije; kana zwisakadalo nawibo unootemwa. 23 Akale bamwe kana bangosiya kusodimbwa kwabo, banoonamatijwa nokuti Mwali unesimba lyokubanamatija kabili. 24 Nokuti kana iwi wakabatemwa kuva ponti weolivi womushango, kova unamatijwa, zwisinokwendelana namamelelo onti munti we olivi unolimwa, zwilelu chini kuti yeji inhabi jomene chinamatijwe ponti wajo weOlivi.

25 Nino musishiye muti mulochenjela, ndinoda kuti muwhisise isiswa yeyi banakwaina; chimwe chikamu cheIzilayeli chakomesa moyo, kujine chilabo chose chaBokuzhe jangwina, 26 nezwo Izilayeli yose inoochijwa, sezwilokwalwa kuwhi,

"uNchiji unova kuZiyoni,

,uchoobhisa kusoba nobumwali kunduji jaJakobe";

27 "yechi ndicho chichaba chivumilano changu nabo

yopo pandichoobhisa luchinyo lwabo."

28 Tikalingana neNdebo iMbuya, zwita zwaMwali, kutila imwi; asi tikalingana nokushalujwa, balodikana pezhulu pamatategulu abo. 29 Nokuti zwipo akale nokushoba kwaMwali azwitofa zwashanduka. 30 Sezwo umwe unshaji musakawhilila Mwali, asi ngweno mwatambula ishe, pezhulu pokusowhilila kwabaJuda, 31 nezwo ngweno baba basinowhilila kutila kuti neshe jakatondejelwa kwabali, betambule ishe neebo. 32 Nokuti Mwali wabiga banhu bose mukusowhilila, kuti ebe neshe kubanhu bose.

33 Aaa! Untika wefuma, buchenjevu noluzibo lwaMwali! Kutonga kukwe akutoshakika nenzila jije ajitowhisisika.

34 Ndiyani wakaziba indangalilo yaTezi,

kana ndiyani wakaba undayi uwe?"

35 "Kana kuti ndiyani wakapa chipo kwaali kuti obwilizilwa na?"

36 Nokuti kuva kuna iye nomuna iye zwinhu zwose zwakatiwa. Kuna iye ngakube lukujo kwemisi isinopela. Ameni.