1 Ndinomukumbila banakwaina bangu, neshe jaMwali, kuti mupile mibili yenu sombhayilo umpenyu, unchena akale unotambulika kunaMwali, kunoba ikwo kunamata kwenu kwompepo. 2 Musitobeleje zwenyika yeyi asi mushandulwe mundangalilo jenu jibe impya kutila kuti muzibe chido chaMwali, munazwibuya nezwinotambulika akale zwilopelelela.

3 Nokudalo nechipiwo chandakapiwa ndinoti kunoumwe noumwe, upo pakati penu, esizwikukumaje kupinda zwaali, koga ngezwideleje mundangalilo, zwinda nokudimbwa kwaakapiwa naMwali. 4 Nokuti mumbili umwempela tinemhingu inji, akale imhingu jose jina unshingo ulosiyana, 5 zwakadalo isu, kojoba tilibanji,tiumbili umwempela munaKristo, umwe noumwe imhingu ilosiyana yombili umwempela. 6 Tili nezwipo zwilosiyana nokuda kweChipiwo jatakapiwa isu, ngatizwishingiseni: kungaba kupolofita, zwikwendelana nokudimbwa kwedu; 7 kana kuli kushinga, ngatishingeni, unolayija, ngelayije, 8 iye unosungwaja, ngesungwaje, iye unobhancha, ngebhanche mulusungunuko, iye unopa ngesungwale mukukoba , iye unaneshe, ngete nolushanta.

9 Ludo ngalube lwomene, bengani zwibi, bhatililani kasa muzwibuya. 10 Dananani noludo lwobwanakwaina: Sungwalani mukulemekejana. 11 Musilengwale, vilimani mumpepo, mushingile Tezi. 12 Shantani mukubimba kwenu, mube nomwoyo ndefu mukusheta, bhatisani mukunamata 13 Babhancheni bachena nezwabanoshayiwa, mutambule bezi namaboko mabili.

14 Kombolelani yabo banomujiija; bakomboleleni musibafhizhe. 15 Ishantani nabo banoshanta, mulile nabo banolila. 16 Gajikanani mulunyalalo; musizwinyamule koga lyijanani nabanhu bopasi akale musishiye.

17 Musibwilizile chibi nechibi, asi muyeye kuta zwibuya pambeli kwaibo bose. 18 Kana zwitubulika akale zwili mumasimba enu, galani mulunyalalo naibo bose. 19 Banodikana, imwi musibwilizile, asi zwisiyileni kubukali bwaMwali, sezwo zwilokwalwa kuwhi," lubwilizilo ngolwangu, ndichabwilizila, unodalo She." 20 Kana umbengi uwo eli nezhala, umpe zwokulya, kana eli nenyota umpe zwokunwa, nokuta alo unobebutitika masimbe anopisa pansholo uwe. 21 Musizundwe nobubi, koga komani bubi nobubuya.