1 Unhu wose ulokwelela kuba pasi pamasimba obutongi. Nokuti akuna butongi kuzhe kwobo bunova kuna Mwali, akale nobwo bupo bwakabigwa naMwali. 2 Nokudalo iye unolamba butongi walamba zwabigwa naMwali, akale yabo banolamba banopiwa untongo. 3 Nokuti batongi abatotyisa kuna yabo banota zwibuya, koga kuna yabo banota zwibi. Amungontye nayoyo upo pabutongi? Nezwo itani zwakalulama akale munoowana lukujo lulwe, 4 nokudalo unshingi waMwali, wokubhancha imwi. Koga kana muta zwisakalulama, ityani, nokuti iye atongobhata chete igwalabaza esalishingisa; iye unshingi waMwali unolanga umbipisi. 5 Nokudalo munokwelela kuba pasi pobutongi, kusikutizha bukali bwaMwali kuli kutila luyeyo pezhulu pokuziba zwibi nezwibuya.

6 Nechisoko chimwempela molipa untelo, nokuti batongi, bashingi baMwali, belikumuta chinhu chakale yechi. 7 Lipani bose indipilo yabo, untelo ilipani kwaunokwelela, imali kwainokwelela kulipwa, lulemekejo kunoyo unokwelela kulemekejwa, lukujo kunoyo unokwelela kukujwa.

8 Usibe nechikweleti kunomwe, koga mudanane chenuchenu , nokuti yoyo unoda umbakijani uwe wazhajikija mulawo. 9 Milayo inoti "Usimbombole, usibulaye,usikwibe, usichibe," neimwe milayo zwayo, iloshanganiswa muchilebo yechi chinoti, "Ida umbakijani uwo sobunozwida iwi". 10 Ludo alutota chibi kumbakijani, nokudalo ludo luzhajikijo lwomulawu.

11 Kuzhe kwezwi munoziba kuti unshajini, waswika unshaji ngweno kuti mumuke mukulala kwenu. Luchijo lwabapelyo nasu ngweno, kupinda patakatanga kudimbwa, 12 Busiku bwapinda, kwaleboja. Nezwo ngatilasheni mishingo yenhilima, tibige chitabilijo chechimuniko. 13 Atiteni zwilokwelela kutiwa masikati, zwisili zwokunakilwa mulidupwa, nokukolwa, zwisili zwobusangu nobuhungu, zwisili zwokukakabajana kana luchibo. 14 Imbalani Tezi Jesu Kristo, asi musishake kushantisa mibili muzwilakamilo zwayo.