1 Ndinomuzibisa nezwonkazwaji wedu Febhi, undikonikaji wegubungano lyokuKenikeliya, 2 kutila kuti muuntambule munaShe sezwilokwelela bachena, akale muumbhanche munazwose zwanoshaka kwamuli, nokuti wabeli umbhanchi wabanji akale nokunami. 3 Mumuse Pulisila naAkwila bashingikwaina bangu munaKristo Jesu, 4 ibo bakabiga bupenyu bwabo mungozi pezhulu pangu, kusili imi ndonga koga namakubungano ose aBokuzhe anoboka. 5 Mumuse iGubungano linoshanganila mungumba yabo. Mumuse Epenetasi unodikana, waluba wotanga kuchingunukila kunaKristo muEzhiya. 6 Mumuse Mariya washinga kasa pakati penu. 7 Mumuse Andilonikasi naJuniyasi, makamu angu akale basungwakwaina, banolemekejwa pakati pabapositoli akale bakanditangila kuba munaKristo. 8 Mumuse Ampiliyatasi, undiwa wangu munaShe. 9 Mumuse Abhanasi unshingikwaina wedu munaKristo naSitakisi undiwa wangu. 10 Mumuse Apelesi ulotambulwa munaKristo. Mumuse yabo bemhuli yaAlistobhulasi. 11 Mumuse Helodiyoni igamu lyangu, akale mumuse yabo baimo munaShe, bomumhuli yaNakisasi. 12 Mumuse yabo bashingi baTezi, Tilaifina naTilaifosa. Mumuse unodikana Pesisi, washinga kasa munaShe. 13 Mumuse Lufasi unkulugulu munaShe, akale naamai babe, belibangu neebo. 14 Mumuse Asingilitasi naFelegoni naHemisi, naPetilobhasi, naHemasi nabanakwaina babananabo. 15 Mumuse Filologasi naJuliya, naNeleyasi nonkazwaji uwe, naOlimpasi nabachena bose babananabo. 16 Imusanani umwe nomwe nokumyonta kuchena. Makubungano ose aKristo anomumusa.

17 Ndinomubweta banakwaina, kuti muchenjelele yabo banobuzilija kusowhanana, nobulemu zwinonyenyejana nezwilayijo zwimwakalayijwa; mubasiye. 18 Nokuti banhu bakadalo abatoshingila Tezi wedu, Kristo, koga bamushingila zwilakamilo zwabo, banoshingisa mawhi abo benakisa lulimi bechengela myoyo yabasina luzibo. 19 Kuwhilila kwenu kunozibikana kunaibo bose, nezwo ndinoshantiswa namwi, koga ndinoda kuti mube namaano muzwinhu zwibuya akale musununguke muzwinhu zwibi; 20 nezwo Mwali wolunyalalo unopwanya Guluzhanje pasi pamakumbo enu. Ishe jaShe wedu Jesu Kristo jibe namwi. 21 Timoti unshingikwaina wangu, unomulezwa; naLusiyasi naJasoni naSosipatulo makamu angu anomulezwa neebo. 22 Imi Tetiyasi unkwali wolukwalo yolu, ndinomumusa munaShe. 23 Geyasi mweni wobugalo pandigele nopatinoshanganila negubungano lyose, unomumusa. Elasitasi umbhati wechikwama cheguta nomwanakwaina wedu Kotusi unomumusa. 24 Ishe jaShe wedu Jesu Kristo jibe namwi mose. Ameni.

25 Kunaiye unotubula kumusimisa nenzila yeNdebo iMbuya yangu yandinobhaunula nezwaJesu Kristo, sokufumulwa kwechichenamiso chakagajikwa musiswa kwonshaji undefu, 26 asi ngweno chakaba pachena akale mumakwalo abapolofeti, chinozibiswa kunyika jose, sechilayo chaMwali usinojiba kuti zwibuze kuwhilila kwokudimbwa. 27 lukujo ngalube kunaMwali umwempela unabuchenjevu, lini nalini nomunaJesu Kristo! Ameni.