1 Nokudalo auna inzila yokuzwilwila, Iwi nhu, kojoba ube aani paunoshungula umwe; nokuti yopo paunotonga umwe ukumuzwipa undandu iwi nokuko, nokuti iwi ntongi ukumuta zwakalezwo bo. 2 Tinoziba kuti kutonga kwaMwali ndikwechokomende kunobhulukila yabo banota zwakadalo. 3 Unoyeya kuti, Iwi unhu, kana utonga bamwe banota zwakadai nawi uzwita, ungapujumuka kubutongo bwaMwali na? 4 Kana kushunda bukulwana bweshe jije, nokutobeleja nokuba nomwoyo undefu kukwe? Autoziba kuti yeji ishe jaMwali jilokwelela kukutungamilila mukushanduka na? 5 Nobukukutu bomwoyo akale nokusozwifhija ukumuzwikwilikila nokukwo bukali nezhuba lyobukali, nezhuba lyokuzwitondeja kwokutonga kwaMwali kulolulama. 6 Iye unoolipa umwe nomwe zwinda nemishingo yiye; 7 kuna yabo banoti nokuwhilila, nokuta zwibuya beshaka lukujo nempuwo imbuya, nokusofa, unoobapa bupenyu businopela. 8 Koga yabo banonyenyeja, besinolemesa ichokomende, bewhilila manyepwa banotilwa bukali nokunyemelwa. 9 Kunooba injabulo nokulwajilwa, kwonhu wose unota zwisakalulama kutanga kubaJuda zwizha kubaGiliki, 10 koga lukujo nempuwo nolunyalalo kuna yabo bose banota zwilolulama, kutanga noJuda zwinda kunGiliki. 11 Nokuti Mwali aana inshalulo.

12 Bose bakachinya besina mulawo, banoopalala bakadalo besina Mulawo, naabo bakachinya beli pasi pomulawu, banootongeswa nooyo Mulawo. 13 Nokuti atoba banowha Mulawo balolulama mbeli kwaMwali, koga banota zwomuMulawu, ndibo bachalulamiswa. 14 Kana Bokuzhe basina mulawo beta zwinhu zwomulawo nenzila yozwebhatuko lyabo, ibo bomene banoba mulawo kwabali, kojoba besina mulawo. 15 Yezwi zwinotondejela kuti zwinodikanwa nomulawo zwakakwalwa mumyoyo yabo, akale luyeyo lwabo lunoba unsumikiji, kunyenyezana kwendangalilo jabo kunobapa undandu kana chimwe chilo kubalandula, 16 nelyo izhuba, sokuleba kweNdebo iMbuya yangu, Mwali unotonga isiswa lyabanhu munaKristo She.

17 Kana uzwishoba uti unJuda, ubimba nomulawo akale uzwitunha nokukamujana kukwo naMwali 18 akale uziba chido chiche nokuvumila zwibuyanana, nokuti ulolayijwa mumulawo, 19 ulinelebeswa kuti ndiwi untungamili kunabo basina mesho, uli chimuniko chaabo baimo munhilima, 20 uli unkololi wamalema, undayiji wabana nokuti iwi unaluzibo nechokomende chomulawo. 21 Iwi unolayija bamwe autozwilayijabo na? Iwi unobhaunula kuti kusikwibwe, iwi unokwiba na? 22 Iwi unoti unhu esipombole, iwi unopombola na? Iwi unoshunda zwibezhwa, unopamba mumatempeli na? 23 Iwi unozwikuja pezhulu pomulawo, autolemekeja Mwali nokuvuna milawu na? 24 Sezwilokwalwa kuti, ‘Izina lyaMwali linoshundwa pakati paBokuzhe pezhulu penu.’

25 Chokomende, kumhalaja kunobhancha kana ulondota Mulawo koga kana uli usinotobela Mulawo, kumhalaja kuko kunoba sousakamhalajwa. 26 Koga kana usakamhalajwa elondota zwilayijo zwomulawo, andimo na kuti unokwelaniswa nowakamhalajwa? 27 Nezwo yabo banoti kojoba besakamhalajwa nokwebhatuko asi belondota mulawo, banoomupa undandu imwi munotaluka Mulawo, kojoba mwakamhalajwa akale mukakwalilwa mulawo. 28 Nokuti unJuda welebeswa atoba kwokumesho chete kana kumhalajwa kwombili koga, kumhalajwa kwomumwoyo. 29 UnJuda womene ndiyoyo womukati, nokumhalajwa kwomene kwimo mumwoyo kusi ikwo kwomulawu kwakakwalwa koga kuli kwompepo. Kutunhumwijwa kukwe akutova kubanhu koga kunaMwali.