1 Banakwaina, chido chomoyo nomunamato wangu kunaMwali ngowokuti ibo bechijwe. 2 Ndobasumikijila kuti balozwipila kasa kunaMwali, asi zwisina luzibo. 3 Nokusoba noluzibo lwobululami bunova kunaMwali, akale beda kushaka bwabo, abajakazwipila kubululami bwaMwali. 4 Nokuti Kristo Ndiye mapejelejo omulawu, kuti ani naani unodimbwa unolulamiswa.

5 Mozesi unokwala kuti unhu unotobeleja bululami bwomulawu unoogala nenzila yakaleyo. 6 Asi bululami bwokudimbwa bunoti; Usiti mumwoyo uwo, "Ndiyani biya uchenda kudenga?" (yoku kudeleja Kristo) 7 kana kuti "Ndiyani uchenda kunomila?" (ndikokuti, kunomusa Kristo kuna bakafa). 8 Koga limulebani? Iwhi lipo pelyo nawi, pandomo uwo akale nomumoyo uwo (ndilo iwhi lokudimbwa litinobhaunula), 9 nokuti, kana uleba nondomo uwo kuti Jesu ndiShe, akale udimbwa mumwoyo uwo kuti Mwali wakoumusa mubafi, unoochijwa. 10 Nokuti unhu unodimbwa nomwoyo uwe nezwo unolulamiswa, unoleba nondomo uwe nezwo unochijwa. 11 Iwhalo inchena inoti, "Akuna unodimbwa kwaali, uchooswabiswa." 12 Nokudalo apana unsiyano pakati koNjuda noNgiliki, nokuti wakaleyo Tezi, ndiShe waibo bose, akale unopa bufumi bubwe kunaibo bose banoshoba izina lilye. 13 Nokuti wose unoshoba izina lyaShe, unochijwa.

14 Asi banhu bangonshoba chini iye, ibo besakadimbwa kunaiye? Akale bangadimbwa chini kwaali ibo besanu bawha nezwizwe? Akale bangawha chini pesina umbhaunuli? 15 Akale banhu bangabhaunula chini kuzhe kwokuti batumwa? Sezwo zwakakwalwa kuti, "Kubuya chini kushanyilwa naabo, banobhaunula iNdebo iMbuya!" 16 Asi atoba ibo bose bakawhilila iNdebo iMbuya, nokuti Izaya unoti, "Tezi, ndiyani wakadimbwa zwaakawha kwatili? 17 Nezwo kudimbwa kunova munozwatinowha, akale zwinowhiwha zwinozha nokupupula kwaKristo.

18 Koga ndinobhuza, abajakawha na? Chokomende bakawha; nokuti,

"Iwhi lyabo lyenda munyika yose ,

akale namawhi abo kumapejelejo enyika."

19 "Akale ndobhuza, Izilayeli aijakawhisisa na? Pakutanga Mozesi unoti:

"Ndinoomuta kuti mube nefupa kunabo basiluji,

ndinooshingisa luji lwamalema uti munyetele."

20 Ngweno Izaya wabhudila pachena eti,

"Ndakawanikwa nabo basakandishaka,

Ndikazwitondejela kunaabo basakabhuza nozwangu."

21 Koga nozwabaIzilayeli unoti, "Izhuba lyose ndatambunuja maboko angu kubanhu basinowhilila akale banondishandukila."