1 Isu tinamasimba tilokwelela kuba nomwoyo undefu nokukonelwa kwabo basina isimba, akale tisizwishantise isu nokwedu, 2 umwe nomwe wedu ngeshantise umbakijani uwe kuti zwibe zwibuya kwaali, kuti ombake. 3 Nokuti Kristo iye ajakazwishantisa, asi sezwilokwalwa kuti, "Kutuka kwaabo bakamutuka, kwakawila panami." 4 Zwose zwakabakakwalwa mumazhuba antolo, zwakabakakwalilwa kulayija isu, kuti nokubhatilila akale nokukutaijwa namakwalo machena, kuti tingaba nolubimbo. 5 Mwali womoyo undefu nobusungwaji, ngana amupa bupenyu bogajikana nabamwe mulunyalalo, munaKristo Jesu, 6 kuti pamwempela mube newhi limwempela mukukuja Mwali akale beli Tate baTezi wedu Jesu Kristo.

7 Tambulanani, nokuti, Kristo wakamutambula imwi, kutila lukujo lwaMwali. 8 Nokudalo ndomubuja kuti Kristo wakaba unshingi kuna bakamhalajwa kutondejela buchokomende bwaMwali, kutila kuzhajikija zwibimbiso zwakatiwa kumatategulu, 9 akale kutila kuti Bokuzhe bekuje Mwali mushe jije. Sezwo kulokwalwa kuti,

"Nokudalo ndinoomukuja pakati paBokuzhe,

akale nokukwimbila izina lyenu,"

10 akale kunowhi,

"Shantani, imwi Bokuzhe nabanhu Babe.

11 Akale,

"Kujani Tezi, imwi mose Bokuzhe,

akale lekani banhu bose bonkuje,"

12 Izaya unondila mbeli eti,

"Inzwalo yaJese inoozha,

Iye uchanyamuka kotonga Bokuzhe,

Bokuzhe banoobimba naye."

13 Mwali wolubimbo, ngana amuzhaja mose nolushanto nolunyalalo mukudimbwa, kutila kuti nesimba lyoMpepo uNchena, muzhale lubimbo.

14 Imi nokwangu ndilogunchikana namwi banakwaina bangu, kuti imwi muzhele bubuya, muzhele luzibo lwose, akale motubula kulayijana. 15 Koga munolu lukwalo, ndamukwalila ndisinotya sechikumbulujo, pezhulu pechipiwo chindakapiwa naMwali, 16 kuba unshingi waKristo Jesu kuna bokuzhe wakandipa unshingo wobutebuji ndibhaunula iNdebo iMbuya yaMwali, kutila kuti umpilo waBokuzhe utambulike, ukacheneswa noMpepo uNchena. 17 MunaKristo Jesu, ndina chisoko chokushiya nonshingo wangu munaMwali. 18 Nokudalo anditolebeleka zwimwe zwinhu kuzhe kwezwinhu zwakatiwa naKristo endishingisa kuti ndizunde ndiwane kuwhililwa naBokuzhe, muwhi nomuzwito, 19 nesimba lyezwitondejelo nezwichenamiso, nesimba lyoMpepo uNchena, kuti kuva kuJelusalema akale nokule kungaba sokuswika kuIilikumu, ndakapupula zwizhele iNdebo iMbuya yaKristo, 20 ndizwo zwakatisa kuti ndibe neshungu jokubhaunula iNdebo iMbuya, yoko Kristo kwaakabasanu abhaunulwa, kutila kuti ndisibakile pamagajikilo omwe unhu, 21 asi sezwilokwalwa kuti,

"Banoobona yabo bakabasanu babujwa neZwizwe,

akale banoowhisisa yabo basakabanu bawha neZwizwe."

22 Yechi ndicho chisoko chalundikoneja kuti ndizhe kwamuli. 23 Koga ngweno, sezwo ndisichina unshingo munaya mapazu, akale nokuti ndakabeshaka kuzha kwamuli kwamakole manji, 24 ndinobimba kuti ndomubona pandichapinda ndinda kuSipeyini, akale kuti ndibhanchwe namwi mulwendo lwangu lwokunda kwakale, ndashantilwa nokuba namwi konshaji unshoma. 25 Kwangweno ndikumunda kuJelusalema ndisenga lubhancho lwabachena. 26 Nokuti iMasedoniya neAkeya jakapila zwipo nolushanto kubachena bokuJelusalema banoshayiwa; 27 bakashantilwa kuta yezwi, akale chokomende bakabewha zwakakwelela, nokuti kana Bokuzhe bezha kuti bokobelana makombolelo abo oMpepo nabaJuda, banokwelela bo kuba nolubhancho mumakomboelo abo ozwenyika. 28 Nokudalo kana ndapeja yezwi, ndaswincha yezwi zwakawanikwa kunaibo, ndichapinda kwamuli mulwendo lwangu lwokunda kuSipeyini; 29 akale ndoziba kuti pandinozha kwamuli, ndozha kwamuli ndilizhele makombolelo aKristo.

30 Banakwaina, ndinomukumbilisisa, munaShe wedu Jesu Kristo nomuludo lwoMpepo, kuti mube pamwempela nami muminamato yenu kunaMwali mundinamatila, 31 kuti ndichijwe kunaibo basilodimbwa bokuJudiya, akale kuti lubhancho lwangu kuJelusalema lutambulike kubachena, 32 kutila kuti nechido chaMwali ndizhe kwamuli nolushanto, akale ndoonyetutukwa pakati penu. 33 Mwali wolunyalalo ebe namwi mose. Ameni.