1 Biya unJuda unopinda bamwe neni? Ani kumhalajwa kuna lubhanchoni? 2 Kasa munzila inji. Kokutanga baJuda bakapiwa iwhi lyaMwali. 3 Ani ngana bamwe bakaba besinobimbika? Kusobimbika kwabo kunoota na kuti kubimbika kwaMwali kusibe ipo? 4 Mane! Mwali ngebe ichokomende, kojoba unhu wose enyepa sokukwalwa kwazo kuti,

"Utondeje kululama kukwo mumawhi awo,

akale ubhudilile pakutongwa kukwo."

5 Koga kana bubi bwedu butondejela bululami bwaMwali, tinotini? Kuti Mwali aajilolulama kubuza bukali bubwe panasu? (Ndimulebeleka sonhu wenyama). 6 Mane akujili alo! Mwali walutonga chini inyika?.

7 Koga kana nokunyepa kwangu kuli isimiso lyaMwali lyakubusa lukujo lulwe, ndichinolashilwani biya sonchinyi. 8 Biya ini kusinotiwa bubi kuti bubuya buzhe? Sezwo bamwe betipita nokulebeleka kwabo. Kulashwa kwabo kulokwelela.

9 Biya ini? Isu baJuda, tinobapinda na? Mane, atitobapinda; Nokuti ndazwibona kuti banhu bose, baJuda nabaGiliki baipo pasi pesimba loluchinyo, 10 Sezwo zwilokwalwa kuwhi:

"Apana ulolulama, apana kana umwempela;

11 apana unowhisisa, apana unopyanga Mwali.

12 Bose bakapambuka, bakalundula pamwempela,

apana unota bubuya, apana kana nomwempelazwe."

13 "Ihulo jabo makumbu alozhulika, banoshingisa lulimi lwabo pakuchengeja,

butulu bwenyoka bupo pemilomo yabo."

14 "Milomo yabo izhele kufizha nolunyemo."

15 "Makumbo abo anokambijila kunokutula ilopa,

16 munzila jabo munakupalaja nenjabulo.

17 Akale nenzila yolunyalalo abatoyiziba."

18 "Lutyo lwaMwali alumo mumesho abo."

19 Ngweno tinoziba kuti zwose zwinolebwa nomulawu lunolebeleka kunabo baipo pasi pomulawu kutila kuti wose undomo umiswe, akale inyika yose ibe pasi pobutongo bwaMwali. 20 Nezwo akuna unhu uchawhi wakalulama mumesho aMwali pezhulu pemishingo yomulawo, nokuti nomulawu kunozha luzibo lwoluchinyo.

21 Koga kwangweno bululami bwaMwali bwakatondejelwa kuzhe komulawu kojoba bwakasumikijwa nomulawu nabapolofeti, 22 kululama kwaMwali kunova mukudimbwa munaJesu Kristo kuna bose banodimbwa. Nokuti akuna unsiyano; 23 tose tilochinya, atitoswikila kabuchena bwaMwali, 24 balolulamiswa neshe jije sechipo mukumunulwa kumwo munaKristo Jesu, 25 iye wakabigwa naMwali kuti, nelopa lilye ebe undipo unotambulwa nokudimbwa. Yezwi zwakabeli zwinotondejela bululami bwaMwali nokuti mubuchena bubwe wakawhila ishe muluchinyo lwokumatangisilo; 26 kwakabeli kusimatija panoyo unshaji kuti iye emene wakakululama, akale unosimatija yoyo unodimbwa munaJesu.

27 Biya kuzwitunha kwedu kupoponi? Kulosiyiwa. Pezhulu peni? Pezhulu pemishingo na? Mane, asi pezhulu pokudimbwa. 28 Nezwo tinoti unhu unolulamiswa nokudimbwa, kuzhe kwemishingo yomulawo. 29 Ani Mwali ngowabaJuda chete na?Aatoba Mwali waBokuzhe bo na? Eya ngowaBokuzhe bo, 30 sezwo Mwali umwempela, akale ndiye unoolulamisa bakamhalajwa pezhulu pokudimbwa kwabo akale basakamhalajwa nokudimbwa kwabo. 31 Nezwo tingalasha mulawo nokukudimbwa na? Azwili alo ne, koga tinosimisa mulawo.