1 Ndikumuleba ilebeswa munaKristo, andijikumuniepa, indangalilo yangu inowililana noMpepo uNchena mukupa busumikiji kwandili, 2 kuti ndineshungu ihulwana kasa nokulwajilwa kwomoyo kusinopela. 3 Nezwo imi ndaluba nechido chokuti ngana ndafhizhwa ndikabhiswa kuva munaKristo kutilwa banakwaina bangu, bokunasu nokwoluji. 4 Ibo baIzilayeli, akale bwana bunhulumyana ngobwabo, lukujo, zwivumilano, kutalwa kwomulawu, kunamata nezwibimbiso, 5 kunaibo kunowanikwa matategulu, akale oluji lwabo, sozwenyama, Ndiye Kristo. Mwali upo pezhulu paizwo zwose ngekombolelwe kwemisi isinopela. Ameni.

6 Asi azwitoba sokuti iwhi lyaMwali lyakakonelwa. Nokudalo atoba ibo bose benzwalo yokwaIzilayeli bali baIzilayeli, 7 akale akutoba kuti ibo bose bana baAbhulahamu nokuti ndibenzwalo yiye koga Mwali wakati,"Inzwalo yiyo ichashobelwa muzina lyaIsaki." 8 Yezwi zwinoleba kuti bana baMwali atoba bana benyama, koga bana bechibimbiso ndibo banolingwa sechizekululu. 9 Yezwi ndizwo zwakalebwa nechibimbiso kuti, "Nonshaji unanga sono ndinoobuya, akale Sala unooba nomwananhulumyana."

10 Akale zwisili yezwi chete, koga neebo Labheka paakaba nemimba yabana nonhulume umwempela, tategulu bedu Isaki, 11 kojoba basakabanu bazwalwa, akale besanu bata chinhu chibuya kana chibi, kutila kuti chinangwa chaMwali chenshalujo chindile mbeli kusili kuti pezhulu pemishingo asi pezhulu pokushoba kukwe, 12 wakabujwa kuti, "Unkulwana unooshingila untukutuku." 13 Sezwo zwilokwalwa kuti, "Ndakada Jakobe, asi Isawu ndakombenga."

14 Ini zwatingalebe biya? Kuna kusolulama na kubhazu lyaMwali? Azwili alo pe! 15 Nokuti unoti kunaMozesi, "Ndinooba neshe kunoyo wandinowhila ishe, akale ndinooba neshungu kunoyo wandinowhila ishungu." 16 Nezwo azwitonda nechido kana kukweja kwonhu, asi pezhulu peshe jaMwali. 17 Lukwalo luchena lunoti kuna Falo, "Ndakakulela ndili nechinangwa chokutondejela isimba lyangu mwauli, kutila kuti izina lyangu lipupulwe munyika yose." 18 Nezwo uneshe pezhulu paani naani azwe waanoda akale unokomesa moyo wayoyo waanoda kukomesela.

19 Pakalepo iwi unooti kwandili,"Ini biya ewana undandu? Nokudalo ndiyani angalamba chido chiche?" 20 Asi uli ani iwi, unhu, ungashandulana naMwali? Chibumbwa chingati kumbumbi wacho, "Wakandibumbilani ali".? 21 Ani umbumbi aana isimba na pezhulu pevu, kuti ebumbe nevu lyakalelo chibigilo chokuyeba nechokushingisa.

22 Kana Mwali eda kutitondejela bukali bubwe akale kuti isimba lilye lizibikane, wakaba nomwoyo undefu kuzwibigilo zwobukali zwakabumbilwa kupalajwa, 23 kutila kuti kuzibikane ifuma yolukujo lulwe kuti zwibigilo zweshe jije, yezwo zwaakabambanyila pakutanga kutila lukujo, 24 nasubo baakashoba, zwisinova kubaJuda chete, asi naBokuzhe naibo? 25 Ndizwo zwaanoleba munaHosiya eti,

"Yabo basijakabeli banhu bangu

ndinoobashoba kuti ‘banhu bangu,"

akale noyo usakabeli undikani

ndinoonshoba kuti ‘undiwa wangu.’ "

26 ‘Mubugalo yobwo pazwakalebwa kwabali kuti, ‘Amutoba banhu bangu’,

banooshobwa kuwhi ‘bana baMwali umpenyu. ’ "

27 Isaya unoshomeja kasa nozwaIzilayeli eti: "Kojoba bana baIzilayeli beli banji sonseche wegungwa, asi bashoma babo chete ndibo bachoochijwa; 28 nezwo Tezi unoopa untongo ulolulama akale nokukambijisa, pezhulu penyika." 29 Sezwaakaleba mbeli Izaya eti, "Ngana Tezi wezwibumbwa esakatisiyila zwizekululu, taluba seSodoma tikatiwa seGomola."

30 Ini zwatingalebe, biya? Kuti Bokuzhe basijakatobela bululami, bakabuwana, ndikwo kuti bululami bwokudimbwa; 31 asi kuti Izilayeli wakatobela bululami bumile pamulawu ajakabhudilila mukuzhajikija mulawo yoyo. 32 Ini biya? Nokuti abajakabutobela nokudimbwa asi bakazwita sokuti zwakabeli zwemishingo. Bakagubhulwa nebwe lyechikonejo, 33 sezwo zwikakwalwa, kuti

"Lingani, ndimubiga ibwe muZiyoni, lichagubhula banhu

mwala uchata kuti bembwele;

akale yoyo unodimbwa

kwaali aatoswabiswa neshoni."