1 Ini zwatingalebe biya? Tingandila mbeli muluchinyo kuti ishe jiwande na? 2 Azwingabe alo! Zwingaba chini kuti isu takafa muluchinyo, tigale mwaluli? 3 Munoziba na kuti isu tose takabhabhatizwa muna Kristo Jesu, takabhabhatizwa mulufu lulwe? 4 Nokudalo takajikwa naye mulufu nombhabhatizwo, sezwo Kristo akamuswa mubafi nolukujo lwaTate, isu neebo tingakwenda mubupenyu bupya.

5 Kana takashanganiswa naye mulufu lunanga solulwe, chokomende tinooshanganiswa naye sokumuka kukwe. 6 Tinoziba kuti buntolo bwedu bwaka kahamilwa panchinjikwa naye, kutila kuti umbili unaluchinyo upalajwe, akale atichinooba balanda kuluchinyo. 7 Nokudalo yoyo wafa unosunungulwa muluchinyo. 8 Asi kana takafa naKristo, tinobimba kuti nasu bo tichalalama naye. 9 Nokudalo tinoziba kuti Kristo nokumuswa kukwe mubafi, aachinofa kabili, lufu aluchina isimba pezhulu pape. 10 Lufu lwaakafa wakafila luchinyo kamwempela nokujiba, asi bupenyu bwanolalama unolalamila Mwali. 11 Imwi neebo mulokwelela kuzwilangalila sabakafa muluchinyo akale mulibapenyu kunaMwali munaJesu Kristo.

12 Musileke luchinyo lutonga mumibili yenu inopalala, mutobeleja zwilakamilo zwayo. 13 Musilekeje imhingu jenu jichinya sezwishingiso zwobubi, koga zwipileni imwi kunaMwali, sabanhu babhiswa mulufu bebuzwa mubupenyu, akale mupile nemhingu jenu kunaMwali sezwishingiso zwobululami. 14 Nokudalo luchinyo alutoba namasimba pezhulu penu, sezwo amupo pasi pomulawu asi mupo pasi peshe.

15 Ini biya? Tingachinya nokuti atipo pasi pomulawu na, koga pasi peshe? Mane pe! 16 Amutoziba na kuti mungozwipila kana kunani, sabalanda banowhilila, mubalanda boyo unhu wamunowhilila, woluchinyo, zwinosenga kulufu, kana wokuwhilila zwinosenga kubululami? 17 Koga topa kuboka kunaMwali, kuti mwakabeli balanda boluchinyo, mwaba banowhilila nomwoyo muzwilayijo zwamwakawana munozu zwimwakazwipila. 18 akale kuva pamwakasungunulwa muzwibi, mwaba balanda bobululami. 19 Ndikumulebeleka sonhu pezhulu pobutela bwenu. Nokudalo sezwo mwakabapila imhingu jenu mune zwisakalulama, akale muluchinyo lukulwana, nokudalo ngweno sengani imhingu jenu mukululama kobuchena.

20 Pamwakabeli balanda boluchinyo, mwaka bakasungunulwa mubululami. 21 Asi ini zwamwakawana muzwinhu yezwi zwamuneshoni nazwo ? Kujiba kwezwinhu yezwi lufu. 22 Sezwo ngweno mwasungunulwa muluchinyo, akale mwaba balanda baMwali, indipilo yamunowana bupenyu buchena, mapejelejo bupenyu businopela. 23 Nokuti indipo yoluchinyo lufu, koga chipo cheshe chaMwali bupenyu businopela muna Kristo Jesu Tezi wedu.