1 Imi Paulu wakashobwa kuba umpositoli waKristo Jesu nokuda kwaMwali, akale nomwanakwaina wedu Sositenesi, 2 kugubungano lyaMwali liko kuKolinte, nokunaabo bakacheneswa munaKristo Jesu, nabakashobwa kuba bachena naabo bose baiko kubugalo bulosiyanasiyana beshoba izina lyaTezi wedu Jesu Kristo, Tezi wabo nowedu.

3 Chipiwo nolunyalalo zwinova kunaMwali Tate bedu akale naTezi Jesu Kristo zwibe namwi.

4 Ndinoboka Mwali unshaji wose pezhulu pechipiwo chiche chamwakapiwa munaJesu Kristo, 5 kuti munzila jose mwakafumiswa, mundebo akale nomuluzibo lwose munaiye. 6 Sezwo busumikiji munaKristo bwakasimatijwa mukati mwenu, 7 kutila kuti musishayiwe zwipo zwoMpepo, muchilomilila kutondejelwa kwaTezi wedu Jesu Kristo, 8 uchamukaba kuswikila kumapejelejo, musina luchinyo nezhuba lyaTezi wedu Jesu Kristo. 9 Mwali ulobimbika, iye wakamushobela kubwanakwaina bwoMwananhulumyana waMwali, Tezi Jesu Kristo.

10 Ndinomubweta banakwaina, muzina lyaTezi wedu Jesu Kristo, kuti mose muvumilane kuti kusibe nokukakabajana pakati penu, koga kuti muvumilane mundangalilo akale nondingilo umwempela. 11 Banakwaina bangu, ndakanyeulilwa nabanhu baKuloyi kuti kuna kukakabajana pakati penu. 12 Zwandikumuleba ndizwokuti umwe noumwe wenu umuti, "Imi ndotobela Paulu," kana kuti, "Imi ndotobela Apolosi," kana kuti "Imi ndotobela Kefasi," kana kuti "Imi ndotobela Kristo." 13 Kristo ulopambulanywa na? Paulu wakakahamililwa imwi na? Kana kuti mwakabhabhatizwa muzina lyaPaulu na?

14 Ndinoboka Mwali kuti apana wandakabhabhatiza kuzhe kwaKilisipusi naGeyasi, 15 kuti pesibe umwe wenu angati mwakabhabhatizwa muzina lyangu. 16 (Ndakabhabhatiza bo imhuli yaSitefanasi. Kuzhe kwaaba, anditokumbulukwa kuti pana bamwe bandakabhabhatiza. 17 Nokuti Kristo aajakandituma koobhabhatiza, koga koobhaunula iNdebo iMbuya, akale zwisi zwobuchenjevu bwopandomo, zwingava zwashampula unchinjikwa waKristo upejwa isimba.

18 Nokuti iwhi lyonchinjikwa mayabwe kunaabo bakumupalala, koga kunasu tikumuchijwa, isimba lyaMwali. 19 Nokuti kulokwalwa kuti,

"Ndoozakunula buchenjevu bwabachenjeli

akale busoso bwabalochenjela ndoobuzunila."

20 Upoponi unchenjevu? Upoponi unkwali womulawo? Upoponi unyenyeji wamazhubaano? Mwali aajata kuti buchenjevu bwopenyika bube mayabwe na?

21 Nokuti mubuchenjevu bwaMwali, inyika ayijakaziba Mwali zwiva mubuchenjevu, zwakashantisa Mwali kuti kuva mubulema bwatinobhaunula kuchijwe yabo banodimbwa. 22 Nokuti baJuda banoda zwishamiso akale baGiliki banoshaka buchenjevu, 23 koga isu tinobhaunula Kristo wakakahamilwa, chikonejo kubaJuda akale bulema kunaBokuzhe, 24 koga kunaabo baloshobwa, kubaJuda nokubaGiliki, Kristo isimba lyaMwali akale nobuchenjevu bwaMwali. 25 Nokuti bulema bwaMwali buchenjevu bukulwana kuna buchenjevu bwabanhu, akale butela bwaMwali bunesimba linopinda lyabanhu.

26 Banakwaina, yeyani kushobwa kwenu, abatoba banji benu bakabaka chenjela sezwilongwa zwenyika, abatoba banji bakabeli nesimba, abatoba banji bakabakazwalwa mubushe, 27 koga Mwali wakashala zwamayabwe munyika kuti eswabise balochenjela, Mwali wakashala zwisina isimba munyika kuti eswabise banamasimba, 28 Mwali wakashala zwipopasi nezwiloshundwa munyika, kana zwinhu zwisipo, kuzakunyula zwipo kuti pebe pesichina zwipo, 29 kutila kuti pesibe nonhu uchazwitunha pambeli paMwali. 30 Mwali ndiye wakamuta kuti mube munaKristo Jesu, iye Kristo wakatiwa naMwali kuti ebe buchenjevu bwedu. Kristo wakatita kuti tibe balulami, bachena akale nolusupuko. 31 Nokudalo, sezwilokwalwa kuti, "Yoyo unozwitunha, ngezwitunhe munaTezi."