1 Ngweno pezhulu penyaya imwakakwala.

Zwibuya kuti unhulume esinde pabulo nonhukaji. 2 Koga pezhulu pechikwejo chobusangu, unhulume umwe noumwe ngeebe nonkaji uwe, nonhukaji bo umwe noumwe nondume uwe. 3 Undume ngepe unkaji uwe inkwelelo yiye sonkaji uwe, nonkaji ete alo kundume uwe. 4 Nokuti unkaji aatotonga umbili uwe, asi undume uwe ndiye unountonga, zwili alo bo undume aatotonga umbili uwe asi unkaji uwe. 5 Musiminyane inkwelelo youmwe kunoumwe, kuzhe kwokuti mwawhanana kwonshaji, kuti mube nonshaji wokunamata, asi mubuye mushangane akale kutila kuti Satani elekeje kumukweja pezhulu pokusotubula kwenu kuzwibhata.

6 Ndoleba yezwi sechivumilano, kusi kumumanikija. 7 Imi ndaluda kuti ngana bose baba sobwandili. Koga umwe noumwe unanechipo chiche chaalomisilwa chinova kunaMwali, umwe unopiwa cholu luji akale umwe cholumwe.

8 Kuna basilolobolwa kana kulobola, nokunchilikaji ndinoti zwibuya kwabali kuti begale boga sami. 9 Koga, kana besinotubula kuzwibhata ngebelobole kana belobolwe. Nokuti kulobola kana kulobolwa kubuya kupinda kupya neshungu jolulakamilo.

10 Kuna balolobolana ndobalaya, kusi kuti ndimi koga ndiTezi, kuti unkaji esipambukane nondume uwe. 11 Asi kana apambukana naye ngegale eli ega esakalobolwa, kana kuti ebwilizane nondume uwe akale kuti undume esishime unkaji uwe.

12 Kunamwi bamwe mose, ndimi ndinoti, atoba Tezi pe, kuti kana peli nomwanakwaina unanonkaji usinodimbwa, asi unkaji evuma kugala naye, iye aatokwelela kuunshima. 13 Kana unhukaji elinondume usinodimbwa, asi undume evuma kugala naye, iye bo aatokwelela kuunshima. 14 Nokuti undume usinodimbwa unocheneswa pezhulu ponkaji uwe, akale nonkaji usinodimbwa unocheneswa pezhulu pondume uwe. Ngana kusi alo, bana benu ngana belishambwa, asi feno bachena. 15 Koga kana yoyo usinodimbwa eda kupambukana, ngezwibe alo, nokuti pakadai wechinhulume nowechinhukaji esilosungililwa. Nokuti Mwali wakatishobela kugala nolunyalalo. 16 Iwi nkaji, ungaziba chini kuti ungoonchija undume uwo? Iwi ndume, ungaziba chini kuti ungoonchija unkaji uwo?

17 Umwe noumwe ngelalame bupenyu bwaakapiwa naTezi, akale Mwali bwaakonshobela. Yoyu ndiwo mulawo wangu mumakubungano ose. 18 Upo na wakaba akamhalajwa nonshaji wokushobwa kukwe? Esishake kubhisa imhande yemhalajo. Upo na wakaba esakamhalajwa nonshaji wokushobwa kukwe? Esishake kumhalajwa. 19 Nokuti kumhalajwa kana kusomhalajwa akutobhancha chinhu, asi kulondota milawo yaMwali ndiko kulokosha. 20 Umwe noumwe ngegale muchimo chaakashobelwa. 21 Wakaba uli undanda pawakashobwa na? Usizwilye mwoyo nazwo. Asi kana zwitikana kuti ungawana lusungunuko lulwo, lushake ukweje kuluwana. 22 Nokuti yoyo wakashobelwa kunaTezi eli undanda, unhu ulosupuka waTezi. Zwili alo bo, yoyo wakashobwa eli ulosupuka undanda waKristo. 23 Mwakatengwa nendipo, musibe balanda babanhu. 24 Banakwaina, aani nani ngegale muchimo chaakabeli paakashobwa naMwali.

25 Ngweno penyaya yabasilolobolwa, andina undayo waTezi, koga ndomupa unjeyo wangu sonhu ulobimbika akale wakawana ishe jaTezi. 26 Kuyeya kwangu ndinoti zwibuya kuti pezhulu penjabulo jipo ngweno, unhu ngegale sobwaali. 27 Ulosungililwa kunkaji uwo na? Usishake kusungunulwa. Aujilolobola na? Usishake kulobola. 28 Asi ungolobola, aujachinya, akale kana unsichana elobolwa, aajimuchinya. Koga banolobola kana kulobolwa banoshangana namasheto omunyika, imi ndoda kumutabilija munaizwo yezwi.

29 Banakwaina ndimuleba kuti, unshaji wakatalwa waba umfupi kasakasa, kuvila feno yabo bana bakaji begale sabasina, 30 akale banolila bebe sabasinolila, baloshanta bebe sabasiloshantilwa, akale banotenga bebe sabasina chinhu, 31 yabo banoshinga zwenyika bebe sabasilo sungwa nazwo zwenyika. Nokuti chimo chenyika yeyi chikumupinda.

32 Ndoda kuti musungunuke munazwinomulya moyo. Unhulume usilolobola unozwilya moyo pezhulu pezwinhu zwaTezi, kuti angashantisa chini Tezi, 33 asi unhulume unankaji, unozwilya moyo nozwenyika, kuti angonshantisa chini unkaji uwe, 34 nezwo ishungu jije jiloganukana. Unhukaji kana unsichana usilolobolwa unozwilya moyo pezhulu pezwaTezi, kuti angaba unchena chini mumbili nomumpepo, koga unhukaji ulolobolwa unozwilya moyo pezhulu pezwenyika, kuti angashantisa chini undume uwe.

35 Yezwi ndimuzwilebela kuti mubhanchikane, kusi kuti ndimujibilije koga kuti ndinyamule chilayijo chamakwendelo mabuya akale kuti mube munozwipila kasa kunaTezi.

36 Kana peli nounoyeya kuti aachijilojikama mubugalo bubwe pezhulu pemhandala iye yalotangila, akale kana ishungu jije jolulakamilo junkubukila, kana ewha eda kulobola, ulokwelela kuta kuda kukwe. Aajikumuchinya. 37 Koga yoyo ulozikatila mumwoyo uwe, esina lushako koga etubula kuzwibhata muludo lulwe, akale ekazwimisila mumwoyo uwe kuti esiundobole, unota zwibuya kana ayeya kusoundobola unsichana. 38 Nokudalo yoyo unolobola imhandala iye, unota zwibuyanana, akale noyo unolekeja kulobola unota zwibuyanana kasa.

39 Unkaji ulosungililwa kundume uwe kana eli umpenyu. Kana undume angopalala, ulosupuka kuti elobolwe kana nani waanoda, asi ngebe unodimbwa munaTezi. 40 Asi umbonelo wangu ngowokuti angaba nolushanto lukulwana kasa angogala sobwaali. Akale ndoyeya kuti nami ndina noMpepo waMwali.