1 Ngweno pezhulu penyaya yonsupo wabachena, sezwandakaleba kumakubungano okuGalatiya, kuti namwibo mute alo. 2 Nezhuba lyotanga lyeviki jose, umwe noumwe wenu ngeebige zwimwe kumbali elondote sokuwana kukwe. Kutila kuti zwisitange kubunganiswa pandichaswika. 3 Akale kana ndaswika, ndootuma yabo bamwakashala, newhalo kuti besenge zwipo zwenu kuJelusalema. 4 Kana zwooboneka zwili zwibuya kuti namibo ndindebo, banoondipelekeja.

5 Ndoomushanyila pandichapinda nomuMasedoniya, nokuti ndilonanga kupinda nomuMasedoniya, 6 posa ndingava ndagala namwi, kana kupeja unshaji wemhepo, kutila kuti mundibhanche kwandinobenda. 7 Nokuti andidi kumubona ngweno ndipinda chete, ndinalubimbo lwokupeja unshaji ndefu ndilinamwi, kana Tezi beda.

8 Koga ndogala kuEfesu kuswikila iPentekositi, 9 nokuti unkoba ulokwazabuka wokushinga zwanana wazhulwa kwandili, akale babengi banji.

10 Paachezha Timoti mubone kuti unogala namwi esinalutyo, nokuti ukumuta unshingo waTezi sami. 11 Nokudalo kusibe nounonshunda, koga umpindijeni mulunyalalo mulwendo lulwe, kuti ebuye kwandili, nokuti ndilondingilila pamwempela nabanakwaina.

12 Pamwanakwaina wedu Apolosi, ndakonsungwaja nesimba kuti emushanyile nabamwe nabanakwaina, asi achijakabeli chido chiche kuzha ngweno. Unoozha paachawana unshaji.

13 Galani mwakabhwazula, simani mukudimbwa kwenu, ibani nomwoyo, simani. 14 Zwose zwamunota, muzwite muludo.

15 Ngweno, banakwaina, moziba kuti imhuli yaSitefanasi ndiyo yakatanga kushanduka kudunhu igulwana lyokuAkeya, akale balozwipila kubhata unshingo wabachena. Banakwaina, ndomusungwaja, 16 kuti muwhilile banhu bakadai akale nokunabo banoshinga nesimba. 17 Ndashantilwa nokuzha kwaSitefanasi naFochunatusi naAkaikusi nokuti batipa zwatabeshayiwa nokusobaipo kwenu. 18 Bamusilija umpepo wangu nowenu. Balemekejeni banhu bakadayi.

19 Makubungano okuEzhiya akumumusa. Akwila naPulisika pamwempela negubungano limomungumba yabo bakumumusa kasa munaTezi. 20 Bose banakwaina bakumumusa.

Mumusane nokumusana kobwanakwaina kuchena.

21 Imi Paulu, ndakwala noluboko lwangu, ndimumusa.

22 Kana unhu esinoda Tezi ngaabe ulofhizhwa.

Izhani Tezi wedu!

23 Chipiwo chaTezi Jesu ngachibe namwi! 24 Ludo lwangu lube namwi mose munaKristo Jesu. Ameni.