1 Banakwaina, andijalolebeleka namwi sabanhu bompepo, koga sabanhu benyika, sabana bacheche munaKristo. 2 Ndakamunwisika unkaka, kusi kulya kukukutu, nokuti amujakabanu mwakwelela ikwo, akale kojoba alo amujanu mwakwelela, 3 nokuti nangweno muchili benyika. Nokuti kana pelinoluchibo nokukakabajana mukati mwenu, amutoba benyika yeino na? Akale amujikumuta zwinotiwa nabanhu koga na? 4 Nokuti kana umwe eti, "Imi ndinotobela Paulu," umwe eti, "Imi ndinotobela Apolosi," amuli ibo banhu benyika na?

5 Ani Apolosi ndiani na? Paulu ini? Bashingi bakamuta kuti mudimbwe, umwe noumwe wakashinga sokupiwa kukwe naTezi. 6 Imi ndakabyala imbeyu, Apolosi wakadilila, koga Mwali ndiye wakakubusa. 7 Nokudalo umbyali, kana unodilila abatoba chinhu, koga ulokosha ndiMwali unokubusa. 8 Yoyo unobyala noyo unodilila bana chinangwa chimwempela, asi umwe noumwe unootambula indipo yiye sokushinga kukwe. 9 Nokuti isu tibashingikwaina baMwali, imwi muminda waMwali, muchibakwa chaMwali.

10 Nezwe chipiwo chandakapiwa naMwali, sombaki unabumhizha ndakabiga chimisikilo, umwe unhu ukumubaka pezhulu pacho. Nokudalo umwe noumwe ngechenjelele kuti unobaka chini pezhulu pacho. 11 Nokuti apana chimwe chimisikilo chingabigwa noumwe kuzhe kwecho chakabigwa kale, icho chili Jesu Kristo. 12 Feno kana umwe angobaka pezhulu pechimisikilo yechi nendalama, isiliva, mabwe alokosha, namapango, kana mashanga, nobuhwa, 13 unshingo wonhu nonhu unozwitondejela, nokuti iZhuba yelyo linoozwibhisila pachena, nokuti unoofumulwa nomoto, akale moto unookweja kuti unshingo womwe noumwe ulotiwa chini. 14 Kana unshingo wakabakwa nonhu pezhulu pechimisikilo ungowanikwa ulimile mushule mokukwejwa nomoto, umbaki yoyo unotambula indipo. 15 Asi kana unshingo wonhu ungopiswa, yoyo unolashikilwa nazwose, kojoba iye nokukwe akachijwa, asi kuchijwa kukwe kunoba sonhu wachijwa mumoto.

16 Imwi amutoziba na kuti mutempeli lyaMwali, akale nokuti uMpepo waMwali unogala mwamuli? 17 Kana unhu epalaja itempeli lyaMwali, Mwali unoompalaja. Nokuti itempeli lyaMwali ijena, akale yelyo itempeli ndimwi.

18 Kusibe nouchazwichengeja. Kana umwe pakati penu eyeya kuti ulochenjela nouno unshaji, ngezwite ilema kuti ebe ulochenjela. 19 Nokuti buchenjevu bwopenyika yeeno mayabwe kunaMwali. Nokuti zwilokwalwa kuti, "Iye unobhata bachenjevu mubuchengeji bwabo," 20 akale iwhalo inchena jinoti, "Tezi unoziba kuti indangalilo jabachenjevu mayabwe." 21 Nezwo kusibe nonhu unozwitunha nozwabanhu. Nokuti zwose zwinhu ngozwenu, 22 kungaba Paulu, kana Apolosi, kana Kefasi, kana ipasi lyose, kana bupenyu, kana lufu, kana yono unshaji kana unozha, zwose yezwi ngozwenu, 23 akale imwi mulibaKristo, akale Kristo ngowaMwali.