1 Pana zwimunyeulwa kuti munabusangu mukati mwenu, ibwo businowanikwa kana mukati mwabokuzhe, nokuti unhulumyana umushangana nonkaji watate babe. 2 Akale munoshiya! Amutokwelela kuti mulile na, akale nokutata mukati mwenu yoyo ukumuta yezwo? 3 Kojoba ndisipo kwombili ndinanamwi mumpepo, ndapa kale untongo muzina lyaJesu kuna yoyu wazwita soti ndinamwi, 4 Pamunoshangana, umpepo wangu una namwi, nesimba lyaTezi Jesu, 5 yoyu nhulumyana mumpile kunaSatani kuti umbili uwe upalajwe, kutila kuti umpepo uwe uchijwe nezhuba lyaTezi Jesu.

6 Kuzwitunha kwenu akutoba kubuya. Amutoziba kuti umfufumuso unshoma unofufumusa chifhuwha chose. 7 Bhisani umfufumuso wantolo kuti mube chifhuwha chipya musina umfufumuso nokuti ndimo mwamuli. Nokuti Kristo imhwizana yedu yepasika, wakapilwa. 8 Nokudalo ngatipembeleleni miliya yeyi, tisinoshingisa umfufumuso wantolo, umfufumuso wolunya nobubi, koga nechinkwa chisina umfufumuso chenjikamo nechokomende.

9 Ndakamukwalila mulukwalo lwangu kuti musikamujane nabasangu, 10 ndisinova basangu benyika yeyi, kana mapazwi nabapambi, kana banonamata zwimwali, nokuti kana kwakadalo, mwalukwelela kubhuda munyika. 11 Koga ngweno ndikumumukwalila kuti musikamujane nonhu unezina lyokuti mwanakwaina, kana elinondandu wobusangu, bupazwi, unonamata zwimwali, unogala akatukana, unkolwi, umpambi, amutokwelela kana kulya naye wakadalo.

12 Nokuti imi ndinaneni nokupa untongo bokuzhe? Abatoba ibo na baimo mugubungano bamunokwelela kubetesa? 13 Mwali unotonga bokuzhe. "Tatani unhu yoyo umbi pakati penu."