1 Kana umwe wenu eli nondandu nomwanakwaina ulokwelela na kunda kumakota abasinodimbwa kuna kuti ende kubachena? 2 Amutoziba na kuti bachena banootonga ipasi lyose? Akale kana inyika yose itongwa namwi, imwi mungasotubula kubetesa milandu mitukutuku na? 3 Amutoziba na kuti isu toopa untongo ingilozi? Nezwo tingakonwa neni nenyaya jobupenyu yobu! 4 Nokudalo kana muli nenyaya yakadai, moyisengelani kuna yabo basinolemekejwa negubungano? 5 Ndinoleba yezwi kuti mube neshoni. Ndimo na kuti apana umwempela pakati penu ulochenjela angatubula kutonga inyaya jabanakwaina? 6 Koga mwanakwaina unosenga mwanakwaina kugota lyomulawo, akale yezwi ezwita pambeli pabasinodimbwa!

7 Kusengana kumakota omulawu zwinoleba kukonwa kwenu. Ini musinotambula kuchinyilwa? Ini musinovuma kuchebelwa? 8 Koga imwi momene mochinya nokuchebela, akale yezwi muzwitila banakwaina benu. 9 Amutozwiziba na kuti basilolulama abatoopiwa ifuma yobushe bwaMwali? Musichengwe, basangu, banonamata zwimwali, bapomboli, nabanolala nabanhulumekwaina, 10 nembava, mapazwi, bakolwi, batuki, kana bapambi apana uchoolya ifuma yobushe bwaMwali. 11 Bamwe benu bakabeli alo. Asi mwakashambiswa, mukacheneswa, mukalulamiswa muzina lyaTezi Jesu Kristo, akale nomuMpepo waMwali wedu.

12 "Ndinovumijwa kuta zwinhu zwose," asi azwitoba izwo zwose zwinobhancha. "Ndinovumijwa kuta zwinhu zwose," asi anditoopiwa undanda nechimwe chinhu. 13 "Kulya kwakatilwa untumbu akale untumbu kulya," asi Mwali unoopalaja bubili bwazwo. Umbili aujilotilwa kuta busangu, koga kushingila Tezi, akale Tezi kuba nesimba pezhulu pombili. 14 Mwali wakamusa Tezi, akale unootimusa nasubo nesimba lilye.

15 Amutozwiziba na kuti mibili yenu imhingu jaKristo? Biya ndingatola imhingu jaKristo kova ndijishanganisa nemhingu jombili wevemu na? Mane pe! 16 Amutozwiziba na kuti yoyo unozwishanganisa nevemu unoba umbili umwempela nalyo? Sezwilokwalwa kuti, "Yabo babili banooba umbili umwempela." 17 Koga yoyo ulobhatana naTezi unoba umpepo umwempela naye.

18 Tizhani busangu! Lwose lumwe luchinyo lunotiwa nonhu lukwo kuzhe kwombili, asi unhu unsangu unochinyila umbili uwe. 19 Amutozwiziba na kuti umbili wenu itempeli lyoMpepo uNchena, unolalama mwamuli, umwakatambula kuva kunaMwali? Akale amutoba benu, 20 nokuti mwakatengwa nendipo. Nokudalo kujani Mwali nemibili yenu.