1 Banakwaina pandakezha kwamuli, andijakezha kwamuli ndibhaunula isiswa lyaMwali ndishingisa mawhi obumhizha akale obuchenjevu bwabanhu. 2 Ndakashaluja kusoziba chinhu pakati penu kuzhe kwaJesu Kristo akale Iye wakakahamilwa. 3 Pandakezha kwamuli ndakaba ndili untela, ndiluluma kasa nolutyo, 4 akale indebo yangu nembhaunulo yangu zwakazwisi zwamawhi obwetekeja obuchenjevu bwabanhu, koga zwili zwechitondejelo chamasimba oMpepo, 5 kutila kuti kudimbwa kwenu kusibakilwe pezhulu pechimisikijo chobuchenjevu bwabanhu koga pamasimba aMwali.

6 Kunaabo bakubuka mumpepo, tolebeleka buchenjevu, koga busi buchenjevu bonshaji yoono kana bwabatongi benyika yeino, ibo bakumupalajwa. 7 Koga tolebeleka buchenjevu bulosisika bwaMwali, bwaakasunga Mwali kusanhu kwabumbwa inyika kuti chibe chikujo kwatili. 8 Apana wabatongi boono unshaji wakazwiwhisisa yezwi, nokuti ngana bakazwiwhisisa, abajalunkahamila Tezi wolukujo. 9 Koga, sezwilokwalwa kuti,

"Zwisanu zwabonwa namesho, kana kuwhiwa nenzebe,

kana kulangalilwa nendangalilo jonhu,

Mwali wakalonganyila yabo banounda."

10 Mwali wakafumula zwinhu yezwi kwatili noMpepo. Nokuti uMpepo unoshaka zwinhu zwose, kana muntika mwaMwali. 11 Ndiani unhu angaziba indangalilo jonhu kuzhe kwompepo umo munaiye mweni? Zwikadalo, apana unowhisisa miyeyo yaMwali kuzhe koMpepo waMwali. 12 Ngweno atijatambula umpepo wenyika, koga uMpepo unova kunaMwali, kutila kuti tiwhisise zwipo zwatilopiwa naMwali pesina indipo.

13 Akale isu toleba yezwi namawhi atisakalayijwa nobuchenjevu bwabanhu koga noMpepo, kupandululala ichokomende lyompepo kunaabo bananoMpepo. 14 Unhu wenyama aatotambula zwipo zwoMpepo waMwali, nokuti bulema kwaali, akale aatotubula kuzwiwhisisa nokuti zwinopenyengulwa nompepo. 15 Unhu unanoMpepo unopenyengula zwinhu zwose, asi iye nokukwe aangapenyengulwe noumwe.

"Ndiani unaluzibo nendangalilo jaTezi?

Kuti etubule kuundayija?"

Koga isu tinendangalilo jaKristo.