1 Imi Paulu, umpositoli waKristo Jesu nechido chaMwali, naTimoti mwanakwaina wedu.

Ndikumukwalila igubungano lyaMwali likokuguta igulwana liko kuKolinte, nabachena bose baimo mudunhu igulwana lyeAkeya yose.

2 Chipiwo nolunyalalo kunamwi zwiva kunaMwali Tate bedu akale nokunaTezi Jesu Kristo.

3 Mwali ngekombolelwe Tate baTezi wedu Jesu Kristo, Tate beshe akale Mwali unotipa imbalaijo yose, 4 iye unotinyalaja mumasheto edu wose, kutila kuti titubule kunyalaja yabo baimo mumasheto angaba kana api zwawo, nolubalaijo Mwali lwanotibalaija nalo. 5 Kana tisheteswa kasa nokuda kwaKristu ndipo patinowha kubalaijwa kulopamijwa munaKristo. 6 Kana tisheteswa, lubalaijo noluchijo lwenu, akale kana tibalaijwa, ngezwo lubalaijo lwenu, lwamulozibila mungota umoyo undefu mwakabhatilila mukusheteswa zwatikumutiwa. 7 Lubimbo lwedu namwi alutodengeda, nokuti tinoziba kuti sezwo mulina unkobe mumasheto edu, mooba nenkobe mulubalaijo lwedu.

8 Banakwaina, atidi kuti musibe noluzibo, nezwamasheto makulwana atakashangana nawo muEzhiya, zwakatiswincha pakulasha lubimbo lwobupenyu. 9 Chokomende takawha sabatongelwa lufu, koga yezwi zwakatikana kuti tisizwibimbe isu nokwedu, koga tibimbe naMwali unomusa bakafa, 10 wakatisungunula mugubaji igulwana lyolufu, akale unootisungunula akale. Panaiye ndipo patabiga lubimbo lwedu kuti unootisungunula akale, 11 pamunotibhancha neminamato yenu. Pakalepo banhu banji banoboka bakatimililila pezhulu pamakombolelo atakapiwa ilinshandulo inova kuminamato yabanhu banji.

12 Nokuti kushiya kwedu busumikiji boluyeyo lwedu luchena kuti takabelalama mubuchena akale nomuchokomende kasa mukulyijana namwi, akale takabebimba nechipiwo chaMwali kusi nobuchenjevu bwabanhu. 13 Nokuti tomukwalila chete zwamunotubula kubala akale muwhisisa. Ndinalubimbo kuti mozwiwhisisa kuzhele, 14 sezwamwawhisisa muchikamu, kuti mungashiya nasu sezwatinoota namwi, nezhuba lyaTezi Jesu.

15 Nokuti ndakabakasimisa nezwi, ndakabeda kutanga kuzha kwamuli kuti mubenokunakilijwa kulopamwa, 16 ndaandida kumushanyila ndichinonda kuMasedoniya, akale kuzha kwamuli ndiva kuMasedoniya akale kuti mundipindilije mulwendo lwangu lwokunda kuJudiya. 17 Ndakabekahajika na pandakabeda kuta yezwi? Ndota zwilongwa zwangu sonhu wenyika na, ndakazwilonganyila kuti, "Eya" nokuti, "Pe," panhu pamwempela? 18 Chokomende sezwo Mwali ekabimbika, mawhi edu kwamuli aatoba okuti "Eya," akale "Pe." 19 Nokuti Mwananhulumyana waMwali, Jesu Kristo, utakabhaunula pakati penu, Imi, Silivanasi naTimoti, wakaba esi, "Eya" na "Pe," koga muna Iye ndi, "Eya" unshaji wose. 20 Nokuti zwose zwibimbiso zwaMwali ndi Eya. Nokudalo munaKristo tinoti Ameni tikuja Mwali. 21 NdiMwali unotigajika zwilozikatila isu namwi munaKristo. Akale wakatishala, 22 akabiga imhande yiye panasu sechitondejo chokuti tilibabe, akale akatipa uMpepo uwe mumyoyo yedu sechibimbiso chezwinhu zwichinozha.

23 Koga ndoshoba Mwali kuti ebe unsumikiji, kumuwhila ishe kwakata kuti ndisizhe kuKolinte. 24 Kusi kumubhata nesimba mukudimbwa kwenu, toshinga namwi titila lushanto lwenu, nokuti mulosima mukudimbwa kwenu.