1 Tili bashingi pamwempela naMwali, tomubweta kuti musitambule chipiwo chaMwali zwisina unshingo. 2 Nokuti iye unoti,

"Nonshaji ulokwelela

ndakamuwha, akale

ndikamubhancha nezhuba lyokuchijwa".

Ilingani, ngweno ndiwo unshaji ulokwelela, ngweno ndilyo izhuba lyoluchijo.

3 Atitobiga chikoneso munzila kana yani, kutila kuti pesibe uchawana kulundula munshingo wedu, 4 koga sabashingi baMwali tozwilebelekela isu tomene munzila jose, nokutobeleja kukulugulu, mukusheteswa, mubukukutu, munjabulo, 5 mukulobwa, mukusungwa, mubhilimanyondo, mukushinga kasa, mukusolala ihope busiku, nomunzhala. 6 Mubuchena, muluzibo, mukuzwibhata, mushe, muMpepo uNchena, muludo lwechokomende, 7 mundebo yechokomende, akale nesimba lyaMwali, nezwilwaniso zwobululami kuluboko lokululyi akale nokuluboko lokuchesho, 8 mulukujo nomusheshemo, mumpuwo imbi nomumpuwo imbuya. Titolwa sezwitwakubili, koga tilimuchokomende, 9 sabasinozibikana, koga tizibikana kasa, sabamufa koga tibapenyu, sabakalangwa koga tisakabulayiwa, 10 sabaneshungu, koga tigala tikashanta unshaji wose, sabasheti, koga tifumisa banji, sabasina chinhu, koga tili nezwinhu zwose.

11 BaKolinte tinolebeleka takasupuka kwamuli, moyo wedu ulozhulika. 12 Ludo lwedu kwamuli alujilojibijwa, asi mwajibija ludo lwenu kunasu. 13 Ngweno ndikumulebeleka sokuti mubana bangu, tikwazabulileni myoyo yenu namwibo.

14 Musijogwe pamwempela nabasinodimbwa. Nokuti zwinolyijana chini bululami nobubi? Kana kuti mwenje nenhilima zwinokamujana chini? 15 Kristo angawhanana chini naguluzhanje? Kana kuti undimbwi unoshangana chini nousinodimbwa? 16 Ngechipi chivumilano chingaba pakati petempeli lyaMwali nezwimwali? Nokuti isu titempeli lyaMwali umpenyu, sezwakaleba iye Mwali eti,

"Ndoogala mwabali akale

ndookwenda mukati mwabo,

ndooba Mwali wabo,

ibo banooba banhu bangu. 17 Nokudalo Tezi unoti, "bhudani mwabali, mupambukane nabo, akale musibhate zweshambwa, ndipo pandichamutambula, 18 akale ndoobaTate benu, imwi mooba bana bangu banhulumyana nabanhukajana."