1 Ndokwelela kushiya kojoba pesina zwazwinobhancha, koga ndonda mbeli ndilebeleka nozwemibono nemipamulo inova kunaTezi. 2 Ndoziba umwe unhulume umomunaKristo wakanyamulilwa kudenga lyetatu mumakole igumi linamana apinda, kana wakabeli mumbili kana kuzhe kombili anditoziba, Mwali unoziba. 3 Ndinoziba kuti unhu yoyu wakanyamululwa kuPaladiso, kuti wakabeli mumbili kana mane anditoziba, koga Mwali ndiye unoziba, 4 wakawha zwinhu zwisinolebwa, zwinhu unhu zwaasingashamule. 5 Pezhulu poyo unhu ndoshiya, asi imi nokwangu anditoshiya, kuzhe kobutela bwangu. 6 Kana ndikada kushiya, anditoba ilema, nokuti ndoba ndilebeleka ichokomende. Asi ndozwikabula munaizwo, kutila kuti pesibe uchandikuja kupinda zwaanobona pandili kana nezwaanowha kunami.

7 Akale kutila kuti ndisizwikuje nobunji bwemimpamulo, ndakapiwa miwha munyama yangu, untumwa waSatani, kundijiija, kutila kuti ndisizwikuje. 8 Tutatu ndakateteja Tezi neezwi, kuti zwibhiswe kwandili, 9 koga iye wakati kwandili, "Chipiwo changu chilokwana kwauli, nokuti isimba lyangu linopelelejwa mubutela." Nokudalo ndichashiya nolushanto mubutela bwangu, kutila kuti isimba lyaKristo ligale panami. 10 Pezhulu paKristo, nino, ndinogunchikana nobutela, kutukwa, bukukutu, kuyangatiswa, nemhalajo, nokuti pandili idela, ndipo pandinesimba.

11 Ndakazwita ilema! Ndimwi mwakatisa kuti ndite alo, nokuti ndakabekwelela kulebelekelwa namwi. Nokuti andiipo pasi muchimilo kuna yaba banowhi bapositoli babuyanana, kojoba imi ndisichinhu. 12 Zwitondejelo zwobupositoli bwechokomende zwakatiwa pakati penu nokugontama, nezwitondejelo, nezwichenamiso, nemishingo mikulwana. 13 Ani imwi mwakataijisilwani zwakapiwa mamwe makubungano, kuzhe kwokuti imi nokwangu andijakamulemeja? Ndibhatileni luchinyo yolu!

14 Ngweno ndilozwibambila kuzha kwamuli ketatu. Akale anditooba untolo, nokuti apana chenu chandinoshaka asi imwi, nokuti bana abatoba ibo banokwelela kulela bazwali, asi bazwali ndibo banokwelela kulela bana babo. 15 Imi ndoshantila kulipa zwandinanazo nokuda kobupenyu bwenu. Kana ndimuda kasa, imi ndilokwelela kudiwa zwishomanana na?

16 Sezwo ndisakaba untolo kwamuli, koga imwi munoti ndinchengeji, akale bamwe bangayeya kuti ndakamukoma nobutali! 17 Ndakamuputelela na, naabo bandakatumija kwamuli? 18 Ndakasungwaja Taitasi kuti ende, akale ndikatumija noumwe mwanakwaina. Taitasi wakamuputelela na? Atijakata nenzila imwempela na? Atijakatola matanho mamwempela na?

19 Mubweni soti tikumulebeleka yezwi tizwilwila na? Mane! Tikumulebeleka mbeli kwaMwali sabashingi baKristo, zwose zwitilwa kuti mubakike banodikana. 20 Ndikumutyila kuti pamwe pandichaswika ndoowana musi sezwo zwandinoda, namibo mundiwana ndisili sezwamunoda. Ndotyila kuti kungaba nebhopoto, ifupa, kunyema, lulyo, kupita, kunyeya, ishiyo, nenyonganyonga. 21 Ndotyila kuti pakuswika kwangu akale posa Mwali wangu unoondiswabisa mbeli kwenu, akale ndikalilila banji baabo bakachinya ntolo, basijakazwifija kubushambwa, busangu, nezwinosheshemesa zwibakata.