1 Ndinachido kuti munditile moyo undefu mubulema bwangu bushomanana. Nditileni moyo undefu! 2 Ndowha ifupa lyobumwali kunamwi, kuti ndakamubimbisa kundume umwepela uliKristo, kuti ndimupile semhandala inchena kwaali. 3 Koga ndotyila kuti sezwo inyoka yakachenga Eva nobutali bwayo, indangalilo jenu jinoolashika inzila yojikama nokuzwipila kuchena kunaKristo. 4 Nokuti kana umwe unhu eswika ebhaunula umwe Jesu usi utakabhaunula, kana mungatambula umwe umpepo usi umwakatambula kwatili, kana mungotambula iNdebo iMbuya ilosiyana neyamwakatambula, muzwitambula nokukambija.

5 Ndinoyeya kuti anditoba untukutuku kana pashoma kubapositoli yabo banoshobwa bewhi bakulwana. 6 Kojoba ndisi imhizha mukulebeleka, luzibo ndina nalwo, takazwitondejela zwose yezwi kwamuli pachena muzwinhu zwose.

7 Ndakachinya na kuzwininipisa kuti imwi mukujwe, nokuti ndakabhaunula iNdebo iMbuya yaMwali zwisina indipo kwamuli? 8 Ndakapamba kuna amwe makubungano nditambula lubhancho lunova kwabali, ndishingila imwi. 9 Akale pandakabeli namwi ndishayiwa, andijakanyaja unhu, nokuti zwindakabeshayiwa zwakabuzwa nabanakwaina bokuMasedoniya. Nokudalo ndakazwimisila kuti ndisimusengese bulemu, akale ndilozwimisila kuti ndisimunyaje munzila jose. 10 Sezwo ichokomende chaKristo chili mwandili, yoku kushiya kwangu kundinanakwo apana uchakupeja mumatunhu okuAkeya. 11 Akale pezhulu peni? Nokuti anditomuda na? Mwali unoziba kuti ndomuda!

12 Akale zwandinota ndondila mbeli ndizwita, kutila kuti ndipeje indebo jaabo banozwikwelanisa nasu mushiyo lyemishingo ibanota. 13 Nokuti banhu bakadalo bapositoli bamaniepwa, bashingi banochengeja, banozwita sabapositoli baKristo. 14 Akale azwitochenamisa, nokuti Satani naiye unozwifhungula sengilozi yechimuniko. 15 Nokudalo azwitochenamisa kana bashingi babe bezwifhungula sabashingi bobululami. Mapejelejo abo anookwendelana nemishingo yabo.

16 Ndopamha nditi, kusibe nouchayeya kuti ndilema, koga kana mundiyeyela kuti ndilema, nditambuleni selema, kutila kuti ndishiye bo pashomanana, 17 yezwi ndozwileba musimumasimba aTezi asi selema, mukushiya yoku kwandina nakwo, 18 sezwo banji beshiya nokushiya kwenyika, namibo ndooshiya. 19 Nokuti motila moyo ndefu malema, imwi muli bachenjevu! 20 Nokuti imwi mota moyo ndefu kana unhu emuta balanda, kana kumuputelela, kana kumushingisa, kana kumudadila, kana kumumakula. 21 Neshoni jangu, ndolebeleka nditi, isu takabeli matela munoozo!

Koga kana pelina una zwaanokweja kushiya nazwo ndikumulebeleka selema namibo ndokweja kushiya nazwo. 22 BaHebhelu na? Namibo ndili iye. BaIzilayeli na? Namibo ndili iye. Ngibenzwalo yaAbhulahamu na? Namibo ndili iyo. 23 Bashingi baKristo na? Imi ndolebeleka sounopenga. Ndili iye umbuyanana kasa, ndimulebeleka unamishingo mikulwana kasakasa, nokusungwa kunjinji kupinda bamwe, nokulobwa zwisinolabwa, tunjinji pelyo nokusoofa. 24 Kashanu baJuda bakandikwabhula ishamu makumi matatu jinenshanu nena. 25 Ndakalobwa katatu nemizato, ndakapubulwa kamwempela namabwe. Ndakakunuka katatu nobwato, ndikazhuzhuka mugungwa kamwempela busiku namasikati. 26 Ndikaba munjendo jilopamululwa, mumakubaji enjizi, mumakubaji abapambi, mumakubaji anova kubanhu bokunasu, mumakubaji abokuzhe, igubaji muguta, igubaji mugwegulu, igubaji mugungwa, negubaji linova kubanakwaina bamaniepwa, 27 mukushingaila nomubukukutu, nokushayiwa ihope busiku, munzhala nenyota, kanji nokushayiwa kulya, mumhepo nokushayiwa zwofuka. 28 Akale kuzhe kwezwimwe zwinhu, pana kuchigilijwa kwamazhuba ose kokubilailila kwangu makubungano ose. 29 Ndiani idela, imi anditoba idela? Ndiani ulotilwa kugubhulwa, imi andilonyema?

30 Kana ndishiya, ndoshiya nezwinhu zwinotondejela butela bwangu. 31 Mwali, Tate baTezi Jesu, iye ulokombolelwa kwemisi isinopela, unoziba kuti andijikumuniepa. 32 KuDamasikasi, untongi pasi paShe Aletasi wakalinda iguta lyeDamasikusi kuti endibhate, 33 Asi ndakabhelujwa muchizuma ndibhisilwa pechibwilibajimu chobulambo bweguta, ndikapuluka mumaboko awe.