1 Ngweno uMpepo unoleba pachena kuti munshaji unozha bamwe banoobhuda mukudimbwa nokuwhilila mipepo inochengela akale nendayijo yemipepo mibi, 2 bachengeji babaniepi bana nomwoyo ulokoma beta sabakapiswa imhande nesimbi inopisa, 3 banolambisa banhu kulobolana akale besungwaja kulamba kulya kwakabumbwa naMwali kuti kutambulwe nokuboka naabo banodimbwa akale beziba ichokomende. 4 Nokuti zwose zwakabumbwa naMwali zwibuya, akale apana chinokwelela kulambwa kana chatambulwa nokuboka, 5 nokuti chilo cheneswa newhi lyaMwali akale nonamato.

6 Ungolayija yezwi kubanakwaina, unoba unshingi umbuyanana waKristo Jesu, wakakubuswa newhi lyokudimbwa akale nendayijo imbuyanana yawatobela. 7 Usitobele indebo jisina bumwali akale jobulema. Uzwilayije kuzwibhata sezwi nodiwa naMwali. 8 Kojoba kulayija kokusimisa umbili kuli nolubhancho, kutya Mwali kunodikana muzwinhu zwose, sezwo kuli nechibimbiso mubupenyu bwangweno akale nomubupenyu bunozha. 9 Isumo yechokomende inodikana akale inokwelela kutambulwa zwizhele. 10 Nokuti yezwi ndizo zwatinoshingilila nokufundumalila, nokuti lubimbo lwedu lupo panaMwali umpenyu, iye unchiji wabanhu bose, kasakasa waabo banodimbwa.

11 Laya akale ulayije yezwi zwinhu. 12 Pesibe nonhu uchakushundila butukutuku bubo, koga ube chitondejelo kubavumili mundebo, muchimilo, muludo, mukudimbwa nomubuchena. 13 Kuswikila ndezha, bona kuti iwhalo inchena jikumubalilwa banhu bose, ubhaunula, usungwaja nokulayija. 14 Usilekelele chipo cha unanacho, chiwakapiwa nonshamulo wechipolofeti negota lyabakulwana begubungano pa lyakakubiga maboko. 15 Unshingo yoyu unte, uzwipile kwazwiili, kutila kuti bose bebone kubhudilila kuko. 16 Zwilondote, nokundayijo iyo, akale ubhatilile kunezwi nokuti ungodalo unozwichija iwi nabawhilili babo banokuwha.