1 Bose yabo baipo pasi pejogwe lyobulanda ngebekuje matezi abo, kutila kuti izina nendayijo yaMwali zwisibipiswe. 2 Yabo bana beni banodimbwa abatokwelela kubalelupisa nokuti banakwaina, koga banokwelela kubashingila zwibuyanana kasa nokuti yabo bamushingilwa badimbwi akale badikani.

Layija akale usungwaje mishingo yeyi. 3 Kana peli nouchalayija zwisiyezwi akale esinovumilana namawhi echokomende aTezi wedu Jesu Kristo akale nendayijo inokwendelana nokutya Mwali, 4 yoyu ulofutilwa nokuzwitunha, apana chaanoziba, ulolakamila impikenkani nokunyenyejana namawhi, zwinobuzilija izhisho ibi, kupalalana, kunyeya, nokuyeyelana zwibi, 5 akale kukakabajana pakati pabanhu bendangalilo imbi nabasina ichokomende, belangalila kuti kutya Mwali inzila yokuwana ingwano.

6 Panowanikwa indipo ihulwana kasa pakutya Mwali nokugunchikana, 7 nokuti apana zwatakabuza munyika, akale apana zwatingabhise munyika, 8 koga tingoba nokulya nezwombala, nezwi togunchikana. 9 Koga yabo banodisisisa kufuma banowila mukukwejwa, mukalabwi, nomuzwilakamilo zwinji zwisinamaano zwinokubaja zwichumwikija banhu mukunyonyolwa nokupalajwa. 10 Nokuti kudisisisa imali ndikokutangisa kwobubi bose, nechi chilakamilo bamwe bakabhuda mukudimbwa bakazwibhayaula myoyo yabo namalwaji manji.

11 Koga iwi, nhu waMwali, chintuka kunaizwo zwose yezwi, inanga bululami, bumwali, kudimbwa, ludo, busungwali, nobunyolo. 12 Ilwa kulwana kubuya kokudimbwa, bhatilila nesimba kubupenyu businopela buwakashobelwa pawakavuma zwibuyanana mbeli kwabasumikiji banji. 13 Mbeli kwaMwali unopa bupenyu kuzwinhu zwose, akale naKristo Jesu iye wakapa busumikiji bubuya mbeli kwaPontiyasi Pilato, 14 ndokulaya kuti ulondote mulawo pesina chibi akale pesina kushundwa kujine kooba nokupamuka kwaTezi wedu Jesu Kristo, 15 zwichootondejelwa nonshaji ulokwelela naiye ulokombolelwa akale eli iye ega uNtongi, She wamashe akale Tezi wamatezi, 16 iye ega unabupenyu businopela akale unogala mulumuniko lusinoswikika, iye usanu abonekwa nonhu akale usinoboneka. Kunaiye ngekube lukujo nobutongo businopela. Ameni.

17 Laya yabo balofuma muneno inyika, balaye kuti besishiye, kana kuti bebimbe nobufumi businobimbika koga munaMwali iye unotipa zwose zwinotishantisa. 18 Banokwelela kuta zwibuya, befume muzwito zwibuya, bepe bekasupuka akale bekazwipila kukobelana nabamwe. 19 Nokudalo banozwilonganyila matangisilo mabuya kunezwambeli, kutila kuti bebe nobupenyu buli ibo.

20 Timoti, linga zwaawakapiwa kuti ulondote. Lekeja kulebeleka zwisina bumwali akale nokunyenyejana pezhulu pezwinowhi luzibo eli maniepwa, 21 nokuvumila yezwi bamwe bakapambuka mukudimbwa.

Chipiwo chaMwali chibe namwi mose.