1 Imi Paulu, ndakasungilwa Kristo Jesu, naTimoti mwanakwaina wedu. Kuna Filimoni unshingikwaina wedu unodikana 2 naAfiya unkazwaji wedu naAkipasi undwikwaina, negubungano linoshangana mungumba yiyo. 3 Chipiwo nolunyalalo lunova kunaMwali Tate bedu naTezi wedu Jesu Kristo lubekwamuli.

4 Ndoboka Mwali wangu unshaji wose pandinokumbulukwa muminamato yangu, 5 nokuti ndikumuwha nezwokudimbwa kuko munaTezi Jesu Kristo noludo lulo kubachena bose, 6 akale ndonamata kuti kukobelana kokudimbwa kuko kunyamule luzibo lwobubuya bwedu bwose munaKristo. 7 Mwanakwaina wangu ndakawana kushanta kukulwana nokunyalajwa muludo lulo, nokuti myoyo yabachena yakatonhojwa nokupindila mwauli.

8 Nezwo, kojoba ndili nefuba munaKristo kuti ndikulaye kuti ute zwinodikana, 9 koga pezhulu poludo ndoshala kukubwetekeja, ngweno imi, Paulu, umililili akale wakasungilwa Kristo Jesu, 10 ndokubwetekeja ndikumbilila mwana wangu, Onesimasi, undakaba tate babe mukusungwa kwangu. 11 Pakutanga aajakabelina lubhancho kwauli, koga ngweno unanolubhancho kasa kwauli nokwandili.

12 Ndimuumbwiliza kwauli Onesimasi, iye wandinoda sokutumija nomwoyo wangu kwauli. 13 Ndalushanta kasa kugala naye, kutila kuti endishingile akamilila iwi nonshaji wangu wokusungilwa indebo imbuya, 14 koga andijakashala kuta chinhu usandivumila kutila kuti bubuya bubo busibe bwokumanikijwa koga bomwoyo ulosupuka.

15 Pamwe ndizwo akapambukana nawi konshaji, kuti ube naye kwemisi yose, 16 esichili undanda koga zwinopindilija bulanda, somwanakwaina unodikana, kasa kwandili koga zwilopamijika kwauli, sonhu akale mwanakwaina munaTezi.

17 Kana unditola soumwe uwo, untambule nenzila yawalunditambula nayo. 18 Kana akakubipisila, kana elina chikwelete chicho, ilipisa imi. 19 Imi Paulu ndinokwala yezwi noluboko lwangu, ndinolipa—pesina zwandinoleba nezwe chikwelete chaunanacho iwi, kwandili chobupenyu bubo. 20 Nokudalo, mwanakwaina, ndibhanche somwanakwaina munaTezi. Tonhoja mwoyo wangu munaKristo.

21 Ndinanolubimbo lwokuwhilila kuko, ndokwala kwauli, ndiziba kuti unota zwinji kupinda zwandaleba. 22 Nonshaji wakalewo, undibambanyile ingumba yabezi, nokuti ndinobimba kuti neminamato yenu ndichavumila kwamuli.

23 Epafulasi unsungwakwaina munaKristo Jesu, ukumukumusa, 24 akale naMako, Alisitakasi, Dimasi, naLuka, bashingikwaina bangu bakumukumusa naibo.

25 Chipiwo chaTezi Jesu Kristo chibe nompepo wenu.