1 Bakumbuluje bavumili kuzwideleja kubatongi nokubutongi, kuwhilila, kuzwimisila kuta kana upi unshingo ulolulama, 2 kusoolebeleka bubi nabamwe banhu, kusokakabajana, kuba banyolo, akale kugala ukalemekeja unhu wose zwilopelelela. 3 Nokuti isu noumwe unshaji takabeli malema, tisinowhilila, titungamililwa kumbali, balanda bendakamilo jilosiyanasiyana nokunakilijwa kunjiinji, mazhuba edu eli obubi nobuchiba, tibengwa nabanhu akale tibengana umwe noumwe. 4 Koga ishe noludo lwaMwali uNchiji wedu pazwakapamuka, 5 wakatichija isu, kusi nezwatinota mubululami bwedu, koga neshe jije, nomukushambiswa kokuzwalwa bupya nokumusilijwa muMpepo uNchena. 6 Mwali waakadila patili zwizhele umpepo unchena nomunaJesu Kristo uNchiji wedu, 7 kutila kuti talulamiswa nechipiwo chiche, tibe balyifumi zwikwendelana nolubimbo lobupenyu businopela. 8 Yeyi indebo ngiyechokomende.

Chido changu kuti usimise yezwi zwinhu, kutila kuti yabo bakadimbwa munaMwali bete zwito zwibuyanana. Yezwi zwinhu zwibuya akale zwina lubhancho kubanhu. 9 Koga lekejani kukakabajana kobulema, machinde amatategulu, imhalalano akale nokujojobolana nezwomulawo, nokuti azwina lubhancho akale azwina nshingo. 10 Koga unhu unopambulanya bamwe, unkabule kotanga nakabili kuva yopo, muumpe mesho usina chokuta naye, 11 unoziba kuti unhu yoyo umbi akale unchinyi, wazwilasha iye.

12 Pandichatuma Alitemasi kana Tichikasi kwauli, ukweje nesimba kuzha kwandili kuNikopolisi, nokuti ndasunga kuti ndiko kwandichabeli unshaji wemhepo wose. 13 Ita nokukimbija zwimomumasimba awo kuti Zinasi igweta naApolosi bengwine inzila ngweno, ubone kuti apana chabanoshayiwa. 14 Akale ita kuti banhu bokunasu bezibe kuta zwito zwibuyanana, kutila kuti bebhanche nokukambijisa munyaya jinoda kukambijilwa nolubhancho, akale besibe basina nshingo.

15 Bose bandinanabo bakumumusa. Umuse yabo banotida mukudimbwa.

Chipiwo chibe namwi mose.