1 Ntolo Mwali wakabelebeleka namatategulu edu eshingisa bapolofeti, munzila jinji akale jilo siyanasiyana, 2 asi mumazhuba yawa okupejeleja wakalebeleka kunasu nomuMwananhulumyana, yoyu wakashalwa kuti ebe undyifuma wezwinhu zwose, pana iye zwinhu zwose zwakabumbwa. 3 Unotondejela lukujo lwaMwali akale elinhojela yaMwali, ulobhata zwinhu zwose newhi lilye linesimba. Paakachenesa luchinyo, Wakagala kuluboko lwokululyi, lwoyo opezhuluzhulu unokujwa.

4 Mwananhulumyana wakaba unkulwana kungilozi sezwo izina lyaakapiwa igulwana kupinda lyajo. 5 Ndikunaipi ingilozi Mwali kwakaleba kuti,

"Iwi uMwananhulumyana wangu,

nasi ndaba Tate babo kana kuti

"ndinooba Tate babe,

akale unooba Mwananhulumyana wangu."

6 Akale paachabuza imbano iye penyika unooti,

"Ngenamatwe nengilozi jose jaMwali."

7 Mwali paanolebeleka nozwengilozi unoti,

"Ndiye unota ingilozi jije jibebhepo,

nabashingi babe bebe kubilima komoto."

8 Koga nezwo Mwananhulumyana unoti,

"Chigalo chobushe chenu, imwi Mwali ngechisinopela.

Iswimbo yobululami ndiyo iswimbo yobushe bwenu.

9 Wakada bululami ukabenga zwisilolulama.

Ndizwo Mwali, Mwali uwo, wakakuguba

Namafuta olushanto kupinda bakwaina babo."

10 Akale wakati

" Tezi, wakabamba inyika pakutanga,

akale matenga mishingo yamaboko awo.

11 Banoopalala, koga iwi unoosala ulipo,

banooshakala bose sezwimbalo.

12 Unoobapeta seshashiko,

Akale banooshandulwa sechimbalo.

Asi iwi autoshanduka,

akale namakole awo aatojiba."

13 Ndikuneipi ngilozi kwaakati,

"Gala kuluboko lolulyi lwangu

Kujine ndite babengi babo

Chisanda chamakumbo awo."

14 Ingilozi ajitoba iyo mipepo inoshingila yakatumwa kooshinga, nokuda kwabo balootambula luchijo.