1 Mulawo untuzi wezwinhu zwibuya zwikumuzha, kusili chimo chawo, aungabalulamise yabo banoswendela pelyo, nemitebulo yeyo inopilwa igole negole, 2 Nokuti ngana zwisakadalo mitebulo yeyi basakayileka. Banamati bakabashambiswa, abajaluba noluyeyo lwoluchinyo. 3 Asi mumipilo yeyi kuna chikumbulujo choluchinyo igole negole. 4 Azwitotubulika kuti ilopa lyenkunzi nelyembuji kuti zwibhise luchinyo.

5 Nezwo Kristo paakezha munyika, wakati,

"Mipilo nemitebulo amujakaida,

asi mwakandibambila umbili.

6 Amujimutambula umpilo wemhuka ulopiswa pedebulilo,

akale nemipilo yoluchinyo, amujakashantilwa.

7 Kova nditi, ‘Ndezha,

kota kuda kwenu, imwi Mwali,

sezwazwilo kwalwa nezwangu muwhalo yomuLawo.’ "

8 Pakutanga wakati, "Imwi amujakashantilwa nemipilo akale nemipilo ilopiswa, nemipilo yoluchinyo" yeyi inopilwa zwinda noMulawu, 9 kova eti, ndipo yopano, "Ndezha koota kuda kwedu." Wakombiga kumbali yondiya wokutanga, akanyamulila pezhulu wabili. 10 Nezwi, takatiwa bachena pakupilwa kwombili waJesu Kristo kamwempela konshaji wose.

11 Akale untebuji wose unoma mazhuba ose etamishingo yobutebuji, epila, epama untebulo umwempela usinobhisa luchinyo. 12 Koga Kristo paakapila untebulo woluchinyo umwempela koonshaji wose, wakava agala kululyi lwaMwali, 13 emilila kuswikila babengi babe baba chitobelo chamakumbo awe. 14 Nontebulo umwempela konshaji wose chete wakabuza kupelelela kuna yabo bakacheneswa.

15 Akale uMpepo uNchena unopa busumikiji kunasu, mushule mokuleba yezwi,

16 "Yechi ndicho chivumilano chandichata nabo,

mushule mwawo mazhuba, unodalo She,

ndichabiga milawu mumyoyo yabo

nokuyikwala mundangalilo jabo,"

17 Unopamija eti, "Andichinooyeya luchinyo lwabo nokutayija kwabo." 18 Yopo pana kulekejelwa kwezwi, apachina untebulo unotilwa luchinyo.

19 Nokudalo, banakwaina, sezwo tili nomwoyo wokungwina mubugalo buchena pezhulu pelopa lyaJesu, 20 nenzila impya akale imhenyu, yaakatizhulila mudabiko, zwinova kuti nombili uwe. 21 Nokuti tina untebuji unkulugulu wengumba yaMwali, 22 ngatisendeleni pelyo nemyoyo yechokomende akale nokudimbwa kusimu, myoyo yedu ikashamupulujika isina indangalilo imbi nemibili iloshambiswa nevula inchena. 23 Ngatibhatisiseni tisinoleka, kulebulula lubimbo lwedu nokuti wakatibimbiswa ndiye ulobimbika; 24 akale ngatiyeyeseseni kuti tingasungwajana chini kuti tidanane nokuta mishingo mibuya, 25 tisinolekeja kushangana, sezwinotiwa nabamwe, koga tisungwajane kasakasa umwe nomwe sezwamunobona yelyo izhuba lisendela pelyo. 26 Kana tichinya nomwaza, mushule mwokuziba ichokomende, litakatambula, apachina untebulo unobhisa luchinyo unosala, 27 koga zwinoba zwasala, kumilila kutongwa kunotyisa, nebibi lyomoto lichoopisa babengi baMwali. 28 Unhu unotaluka Mulawo waMozesi unobulayiwa esinowhilwa ishe, kana peli nabasumikiji babili kana batatu. 29 Biya kunobeli chini kulangwa kwoyo unolelupisa Mwananhulumyana waMwali nokulingila pasi ilopa lyechivumilano lyaakacheneswa nalyo nokutuka uMpepo wechipiwo? 30 Nokuti tinounziba iye wakati, "Imbwilizilo ngeyangu, ndinobwilizila."Akale wakati, "She unootonga banhu babe." 31 Chinhu chinotyisa kasa kuwila mumaboko aMwali umpenyu.

32 Langalilani mazhuba akapinda pamwakati mushule mokuwana lumuniko, mwakasimilila kojoba mwakaba mujiijwa, 33 umwe unshaji mwakatukwa nokuwhiswa kulwaja mbeli kwabanhu, umwe unshaji mwakashanganiswa nabalobhatwa nenzila yakadalo. 34 Mwakawhila ishe basungwa, mukatambula nolushanto kutolelwa zwibiya zwenu nokuti mwakamuziba kuti munachuma chinokwemujwa kupinda yezwo akale chisinopela. 35 Nokudalo musilashe mwoyo wesimba, unoba iwo unendipilo ihulwana. 36 Ibani banotobeleja nomwoyo ndefu unonangatila, kutila kuti moota kuda kwaMwali, mutukotambula zwaakabimbisa. 37 Nokudalo

"Kwasala unshaji unshoma,

yoyo unozha, unoozha,

esinojilwa,

38 asi wangu ulolulama unooba umpenyu nokudimbwa,

koga kana ebwiilila mushule,

mwoyo wangu autowana lushanto naye."

39 Asi atitoba yabo banobwilila mushule kova bepalajwa, koga tinakudimbwa akale takachijwa.