1 Nokudalo sezwatilo zyungulukilwa noluvute lwabasumikiji, nasubo ngatisiyeni mitolo noluchinyo kulobhatilila pelyo nasu, kova tilabuka tinangatila unjiijano watakatalilwa, 2 tilingilila kunaJesu untangisi wokudimbwa kwedu umpejisisi woluvumilo lwedu, iye wakati amisilwa pezhulu polushanto lunozha, akanyamula unchinjikwa esineni nechiswabiso chawo, akanogala kululyi lwechibhula chobushe bwaMwali.

3 Langalilani iye wakasimilila kukakabajwa kwakadai kuva kubachinyi, kutila kuti musinyale kana kupelelwa nolubimbo. 4 Mukulwisana kwenu noluchinyo amujanu mwaswika penhambo yokunangatija kujine kukutuke ilopa lyenu. 5 Mwakanganwa na, chilayilo chinosuma kwamuli sabana banhulumyana chinoti?

"Mwana wangu, usishunde kulayiwa kunova kunaShe,

usilashe mwoyo kana walangwa naiye.

6 Nokuti She unolanga yoyo waanoda,

akale unolaya umwe nomwe mwana waanotambula.

7 Mukulangwa zwinotilwa kuti mube nokusima, Mwali unomubhata sabana babe, nokuti ngoupi mwana usinolangwa natate babe? 8 Kana musinolangwa sobukunotiwa kunhu wose, zwinoleba kuti muli bokunungwa akale amutoba bana babe. 9 Kuzhe kwezwi, takabeli nawo matate openyika akatilanga, tikaalemekeja. Ani biya atitozwideleja pasi paTate bompepo kuti tiwane bupenyu? 10 Nokuti bakatilanga kwonshaji umfupi sokuda kwabo, koga Mwali banotilanga kuti tibe babuya akale tikobelane buchena bwabo. 11 Kwafeno kulangwa kunota sokuti kunobuza kulwajilwa pana kushantilwa, mukukwenda kwonshaji kunobuza unchelo wolunyalalo bobululami kunaabo bakalangwa.

12 Nokudalo simisani maboko enu asina masimba akale nezwivi zwilodemuka! 13 Mubambile makumbo enu inzila jilokololoka kutila kuti zwinoshuja zwisisonyoke koga zwilapiwe.

14 Babalilani kugala mulunyalalo nabanhu bose, akale mubuchena nokuti kana pesina yezwi apana angabona She. 15 Muchenjele kuti apana unokonwa kuwana chipiwo chaMwali, kuti kusibe nomwe uchaba "sonji unobaba" unomela unyaja banhu, nawo banji banoswibhiswa, 16 kusibe nomwe unopombola kana usina bumwali saIsawu, wakatengesa indulamo yobumbano bubwe pezhulu pokulya kumwempela. 17 Munoziba kuti mushule mwezwo paakajoda kutola makombolelo, wakalambwa, nokuti aajakawana unshaji wokuchingunuka, kojoba wakaashaka nemishoji.

18 Imwi amujakezha kuna zwinogumwa, ibibi lyomoto, nenhilima nokufufikwa nebhepo igulwana, 19 nokulila kwewamanda, kana iwhi lyakadalo lilebeleka mawhi kuti yabo bakaliwa bakakumbilisa kuti kusibe naamwe mawhi anolebelekwa kwabali. 20 Abajakatubula kulondota indayijo yabakapiwa yokuti, "Kana imwe imhuka ikaguma idunhu, inoopubulwa namabwe." 21 Chokomende zwakaboneka zwakazwityisa kujine Mozesi akati, "Ndimuteketa nolutyo."

22 Koga imwi mwakezha kuDunhu lyeZiyoni, nokuguta lyaMwali umpenyu, iJelusalema lyedenga nokuluvute lwengilozi jisinolabika jakabunganila miliya, 23 nokugubungano lyembano jinamazina alokwalwa kudenga, nokuntongi uli iyeMwali wazwose, nokumipepo yabanhu yabakalulama bakatiwa bakapelelela, 24 nokunaJesu, umililili wechivumilano chipya, nokulopa lyakashashailwa linolebeleka zwibuyanana kupinda ilopa lyaAbhelo.

25 Musilambe iwhi lyoyo ukumulebeleka. Nokuti kana yabo bakalamba kuwhilila yoyo wakabalaya elipenyika besakatubula kunyeluka, kwedu kulangwa kunoopindilija kana tilamba kuwhilila yoyo unotichenjeja eli kudenga. 26 Iwhi lilye lyakazyunguza inyika asi ngweno wabimbisa kuti, "Ndichazunguja kamwempela akale kusi kuti inyika yoga asi nedenga bo." 27 Mawhi yaya, "kamwempela akale" anotondeja kuti zwinhu zwakabumbwa zwinoozungunujwa zwibhiswe, kutila kuti yezwo zwisinotubulika zungunuka zwigale zwilipo.

28 Nezwo ngatibokeni nokuti takapiwa bushe businozungujika, ngatinshingileni iye nokunamata Mwali tili nolulemekejo pamwe nolutyo, 29 nokuti Mwali wedu moto unopalaja.