1 Nokuti yoyu Melukizedeki, tezi woku Salemu, untebuji waMwali unkulugulu, wakashangana naAbhulahamu eva kunobulaya mashe, akonkombolela, 2 akale Abhulahamu wakonkobela chegumi chezwinhu zwose. Chotanga, izina lyokuti Melukizedeki linoleba kuti " She wobululami", nokuti wakabeli she weSalemu, zwiva kuti, "she wolunyalalo." 3 Iye aana tate kana amai, kana ichinde akale aana matangilo amazhuba kana kupela kobupenyu, asi ekatoja mwananhulumyana waMwali unondilambeli elintebuji nokusinopela.

4 Bonani kuti unkulwana chini. Abhulahamu tategulu wakompa chegumi kunezwo zwaakabapamba kuhondo. 5 Nabo benzwalo yaLevi banogajwa butebuji banandayo mumulawo wokutola chegumi kuva kubanhu, zwiva kuti, kubanakwaina babo, kojoba yaba naibo belichizekululu chaAbhulahamu. 6 Koga yoyu unhu usi wechinde lyaLevi, wakatambula chegumi kuva kunaAbhulahamu akonkombolela iye wakaba eli nezwibimbiso. 7 Azwina kukahajika kuti untukutuku unokombolelwa nonkulwana. 8 Yopa zwegumi zwinotambulwa nabanhu banofa, koga kunelimwe bhazu, noyo unosumikijwa kuti umpenyu 9 Umwe angaleba kuti Levi womene unotambula zwegumi, iye wakapa zwegumi nomuna Abhulahamu, 10 nokuti wakabechi munhunji yaTate babe pakwakati Melukizedeki ashangamija Abhulahamu.

11 Ngana kupelelela kwakaba kuwanikwa nomubutebuji bwaLevi, nokuti mwabuli banhu bakatambula mulawo, kwaloshakilwani umwe untebuji kuti enyamuke eli wenzila yaMelukizedeki, esi woluji lwaAloni? 12 Nokuti kana kuli nokushanduka mubutebuji, kunokwelela kuba nokushandukabo mumulawo. 13 Nokuti yoyo umulebwa nezwizwe wakaba eli wolumwe luji, akuna unhu woluji lokunayibo wakabashingila pedebulilo. 14 Zwipo pachena kuti Tezi wedu ngowenzwalo yaJuda, akale nozwoluji yolo, Mozesi apana zwaakaleba nozwabatebuji.

15 Yezwi zwinoba pachena kasa kana umwe untebuji abhuka muchitojaniso chaMelikizedeki, 16 iye wakaba untebuji kusinotobelejwa zwilotalwa mumulawo asi nokuzwalwa muchinde, koga nesimba lobupenyu businopela. 17 Nokudalo kulosumikijwa nezwizwe kuwhi "iwi untebuji nokusinopela nenzila yaMelukizedeki." 18 Nejimwe inzila mulawo wotanga unosiywa kumbali, pezhulu pobutela bwacho nokushayiwa unshingo kwacho. 19 Nokuti mulawo aujakata chinhu chilopelelela, nejimwe inzila lubimbo lubuya lunosungulwa, akale lunotisendeja pelyo naMwali.

20 Akale akujakabelina kukowha. Yabo bakatanga kuba batebuji bakagajwa besakowha, 21 koga yoyu wakangwina nekowhe,

"Tezi wakakowha

akale atoshandula indangalilo jije,

‘Iwi untebuji nokusinopela.’ "

22 Yezwi zwinota Jesu ebechisimiso chechivumilano chibuyanana.

23 Batebuji botanga bakaba beli banji, nokuti bakaba bekonejwa nolufu kuti bendile mbeli munshingo, 24 koga iye unogala eli ntebuji, nokuti unondilambeli nokusinopela. 25 Nezwo unesimba lyokuchija nokusinopela yabo banozha kunaMwali munaiye, nokuti unogala ebakumbilila.

26 Nokuti zwakabekwelela kuti tibe nontebuji unkulwana wakadai, unchena, usinosoleka, usiloswibhiswa, ulopambulwa kubachinyi, ulonyamulwa kupinda matenga. 27 Azwitodikana kwaali kuti epile mipilo mazhuba ose, esinota sabamwe batebuji bakulwana banopila pezhulu poluchinyo lwabo pakutanga, kova beyipila pezhulu poluchinyo lwabanhu, yezwi iye wakazwita kamwempela konshaji wose paakazwipila iye. 28 Nokuti mulawo unogaja banhu mubutela bwabo sabatebuji bakulwana, asi iwhi lyekowe, lyakezha mushule mumulawo, lyakagaja Mwananhulumyana wakapeleleswa kusinopela.